Tapi Wanorî On

1 On wara wîîkesî Kporin komo poko, Kir̂wan̂he xa mai ham okre, wîîkesî yîwya. Toopu warai Mîkî, oyapon warai ha. Oyamorî yîhcamhokan̂e Mîk ar̂mano ritopo poko. Oyamoyaran marha nîhcamhokesî ero poko.

2 Oyakronoman̂e ro Mîk, owacan warai marha, okurun warai. Omîn warai marha Mîk, kawno warai. Okurunpen̂e Mîk, oyecen̂an warai marha. Ero wa exirî ke Noro pona ween̂asî. Oyewetîmexpon̂e marha Mîk omaywen komo ya.

3 On wara wîîkes awya Apa, ahce wa amna meen̂a amna ponaro awehtome. Toototho mak amna, tooto xîkîtho kyam mak ha. Ahce kacho amna ponaro mai?

4 Kapepen wara kyam mak nas amna, tooto kom ha. Ahce na yekatî n̂esenpe, kaamo n̂iritho, yohno mak n̂esenpe. Ero warai xa marha amna yohno mak cehsom.

5 Kaapu komo tak wananko xiya Apa, xiya ahtoko. Îîpî komo apeko yîsînîmtome tak.

6 Awuhre mîn pepe kacho. Ero tak ar̂makî aaxatî pîn komo yakpachome, waihkachome marha.

7 Kah yai tak etapoyankakî oyowtome, okurunpetome ha. Tuuna kwai ow anîmko, mer̂pono pîn kwai. Anarî yana komo oyahsî xe naxe. Ero ke ow yukurunpeko.

8 Ero pîntho poko tîmtapotaxmu mîkyam kica. Emîknono rin̂e me marha naxe tamorî ke so kaari n̂ixan ke so. Ero ke ow yukurunpeko.

9 On wara tko was ow, waano yaxan waar̂as Apa an̂entarî me. Ahpaci yakro waar̂asî 10 ke tawyockem yakro. Apoko kahwotacho waar̂asî waano.

10 Kayaritomo komo kurunpen̂e Amoro, yiixatî pîn komo yopono me ciino rin̂e ha. Awanton mak ow ha, Tapi. Kacipara ke yînamarî komo pîn me orin̂e Amoro. Ero wa awexirî ke an̂entarî me kewanomesî.

11 Anarî yana komo naxe ooxatî pîn me okwe. Ero ke yînahsîrî komo pîn me ow cirko. Tohnawno poko mak nîmtapowaxe kica. Emîknono rin̂e me naxe tamorî ke so kaari n̂ixan ke. Ero ke ow yukurunpeko.

12 Ero wa okurunpetaw awya amna mumuru komo tak naxe akîhxapu wara, kar̂pamxan me rma ka cexitaw so. Naatî wara tak naxe, yohno tpor̂mamsom wara. Amna yemsîrî komo marha tak naxe kayaritomo mîn mapatan wara, kir̂wan̂he enporixapu wara.

13 Tawronohkatîkaxi marha nas amna natîrî yeperîrî mîn. Mîn hak mak nasî ero yimaw amna natîrî yeperîrî ero yaw so. Mer̂pora ro mak n̂epamyasî marha amna yoku oper̂a. 1.000 me so n̂epamya emapona. 10.000 me so n̂epamya anarimaw so. Ero wa n̂epamyas amna yoku amna woskaran po so.

14 Kar̂pe marha nas amna yoku paaka, tawsîn̂em yaan̂e me ha. Amna yewton wacan yawkara marha nasî waapa komo. Amna poyino komo yarîhra naxe tanton komo me. Okwe okwe, kacho esentara marha nas amna yesamarî yaw so.

15 Tawake xa naxe ero wa cehsom komo. Tawake xa naxe tooto komo Kporin komo exitaw ponaro ehtopo komo me. Ero wa naxe.