143
Tapi Wanorî On Ow Akîhreko Awanme Oyehtopo Poko, Kesî Tapi Kaan Ya
1 Apa, omtapotarî cma re mencesî. Kîmtapowasî awakro yiixe oyehtopo poko. Kemîknon̂e pînî ro mak Amoro, kir̂wanî ro xa. Ero ke omtapotarî cma re mencesî.
2 Oyen̂ekara cma re masî. Onoke thakwa re kir̂wan awya? Mer̂pora naxe roowo pono kom ha. N̂examro chew exihra ro mak nasî, Kir̂wan mîkro, kacho awya.
3 On wara was okwe, oyemetanmekyasî mak okwe ooxatî pîn. Oyerewnukn̂e wara nasî roowo pona roro oko. Awarpanaka oyahruyasî okwe pahxa waihxa pen wara.
4 Ero ke kahwokesî ro mak. Ahce wa tak wai okwe, wîîkesî.
5 Pahxa kar̂pe xa ciino miir̂akn̂e. Ero ponaro rma tko wasî. Keserepokesî awya ciino ritoponho poko, awamorî ke ciino miir̂akn̂e, ero poko ha.
6 Kapockanwasî awece. Aaxe ro mak wasî. Roowo wara nasî oropotarî turpem wara, tuuna xatî wara xa. Ero wara xa marha was ow hara, aaxe ro mak.
7 Yohno cma re ow meyukyas Apa. Kahwokesî ro mak okwe. Esewyahruxapu wara exihra esko. Ero wa awexitaw rma roowo yatumnaka tîtosom wara na wai okwe.
8 Enmarî yakro ro oyakronoman̂e me awehtopo entamexpoko owya. Apona mak ween̂asî. Oyesamarî enpoko owya yaw owtotome. Cewrewre xa tan kîmtapowasî awakro.
9 Naxe ooxatî pîn komo okwe Apa. Ero ke ow yukurunpeko. Awya xa ketkurunpesî.
10 Kaan xa Amoro ponaro oyehtopo. Ero ke awanme mak oyexi xe wasî. Ero wara oyehtopo poko ow yîhcamhokakî. Capahno warai pore oyarî xe wasî Awekatî ya, kir̂wanî ro ya.
11 Owî cma re mîkarices Apa, ayanan me oyexirî ke. Kir̂wanî ro Amoro. Ero ke esemetanmekîra tak ow cirko esemetanmexapunhîrî.
12 Owakren̂e ro xa Amoro. Ero ke ooxatî pîn komo yîhcamnoko. Oyemetanmekn̂e komo waihkakî. Ero wa ow yukurunpeko awanton me oyexirî ke. Ero wa wîîkes awya Apa.