142
Tapi Yesehtînotopo On. Kaan Yakro Yîmtapotachonhîrî, Ewtarî Yaw Yînmewrethîrî Kaan Mak Nasî Okurunpen̂e, Anarî Ooxatî Exihra Ro Mak Nasî, Kesî Tapi
1 On wara wasî, cerewre kîmtapowasî Kporin komo yakro. Yiixe oyehtopo poko kîmtapowasî Noro yakro.
2 Ahwora oyehtopo wekatîmtîkesî yîwya, oyesemetanmecho ha.
3 On wara wîîkesî yîwya, Apa, ahwora oyexitaw Amoro xa oyesamarî rma meen̂e. Oyesamarî yaka oyemcinotopo n̂iice ooxatî pîn kom okwe, en̂epa me n̂iice okwe.
4 Xehxa enko kaari panaw. Iito exihra ro mak nasî opoko ceserepokaxmu okwe. Okurunpen̂e exihra ro mak nasî tan okwe. Owaiyataw, Okwe okwe, kan̂e exihra thakwa nas okwe.
5 Ero ke awakro kîmtapowasî Apa cerewre. On wara wîîkes awya, Amoro xa masî okurunpen̂e me. Oyeken me marha masî tanî rma ka oyexitaw waipîn komo chew.
6 Omtapotarî cma re mencesî. Oyemetanmekyaxe ro mak ooxatî pîn komo. Kar̂pe xa naxe oyemetanmekn̂e komo oyopo. Ero ke ow yukurunpeko.
7 Kahrutopo yawno wara nasî oropotarî okwe. Ero ke owî cma re mahrunkesî awosotî poko oyahwotachome tak. Ero yimaw tak ohyaka n̂esenmekyaxe kir̂wan komo kir̂wan̂he xa awya oyakronomacho yenîrî ke. Ero wa n̂esenmekyaxe.