Tapi Wanorî On

1 Apa kah yawno, kîmtapowasî cerewre awakro. Ohyaka cma re mîmokyasî yohno. Awakro omtapowataw owî cma re mencesî.

2 Kotoporem wara rma omtapotarî entakî, akn̂ixapu wara. Awece oyapockanwataw owî cma re meen̂asî oyokutho pun yakn̂itopo wara, kokon̂i takn̂isom wara ha.

3 Ancu antomak Apa omtapotarî yakir̂waman̂e me. Omtarî picho nasî metata wara. Ero yenîn̂e me noro antomakî kicicme yîmtapotara ro mak oyehtome.

4 Kicicitho xatî pîn me xa ow cirko. Kicicitho pokono komo yakrono mera marha ow cirko. Yîn̂emerî komo yemen̂e pîn me ow cirko, tîkporem yemen̂e pîn me ha.

5 Oyetapacowpe rma reha kir̂wan komo. Oyakronomacho me rma tko nasî ero wa. Otwermacowpe marha. Noro yipu komo ya otwermacho nasî ohkapetopo wara. Ewetîn̂e pîn me ow cirihra cma re masî. Wara rma kicicme cehsom komo yehn̂anmecho poko kîmtapowasî roro awakro.

6 Kicicme cehsom kayaritomon pen komo nar̂mexe amn̂e waapa komo. Toopu poi rma nar̂mexe porin poi. Ero yimaw tak on wara kexe kicicme cehsom komo, Kir̂wan̂he kekn̂e ham, kexe tak omtapotarî poko.

7 On wara marha n̂examro kexe ero yimaw, Roowo pomesî mararî pomon̂e, tamnon̂em nakpayasî, ero wa xa marha amna yocho nakpayaxe amna waparî komo. Ewtarî potaka rma nakpayaxe amn̂e amna yocho yahrutopo potaka rma, kexe.

8 On wara tko was ow Apa, awece cewru tko wasî. Akurun yaw xa wasî. Ow tînomra esko owaparî komo nar̂marî me.

9 Oyemcinotopo warai n̂iice okwe. Ero yai cma re ow maar̂asî, kicicme cehsom komo mîîyen yai ro mak.

10 Tîmîyen komo yaka xa matko n̂etamxicowpe ciin̂enhîrî komo rma. Owî reha arko oyemcinotopo yai ro mak. Ero wa ow arko.