Waano Yaan̂e N̂enîrî On, Tapi Wanorî

1 On wara cma re wîîkes awya Apa, Naxe tan opoko expon komo, kicicme cehsom komo, waapa me cehsom kom ha. Ero ke owî cma re mukurunpesî.

2 Tîropotaw so yîwîrîmano ritopo poko n̂esehtînoyaxe. Emapona roro n̂esenmekyaxe waapa me tmohtome so okwe.

3 Tun̂uru komo pohcukman̂e wara ro mak naxe okoyi n̂uru wara. Yîmtarî picho yaw nasî okoyi yokumuru warai oko.

4 Kicicme cehsom komo wahkotoko Apa oyahsîso mokyataw so, ohrokamexpo xe exitaw so. Waapa me tmokyataw so ow yukurunpeko.

5 On wara naxe cehcoyoponkaxmu komo, oyemcinotopo warai n̂eyamyaxe. Tîmîyen warai kahyaxe oyahsîtopo okwe. Yaake oyemcinotopo n̂iir̂axe oyesamarî yaka. Ero wa n̂iir̂axe okwe.

6 On wara tko wîîkes awya Apa, Kaan xa Amoro, ponaro oyehtopo. Ero ke omtapotarî cma re mencesî, yiixe oyehtopo poko omtapotarî ha.

7 On wara marha wîîkes awya Apa, Kaan xa Amoro. Okurunpen̂e Amoro karitî xa. Ohtîpîrî yecen̂anman̂e Amoro owaparî komo mokuche.

8 Kicicme cehsom komo ehn̂anmeko Apa, Tohnawno me cirko yîwya so yînîhtînoputhîrî komo. Ehn̂ara exitaw so tînîhtînorî komo poko takîhsom me tak n̂esehtînoyaxe kica.

9 On wara cirko omamton̂e komo, tîmtapotachonhîrî komo yaw roro rma n̂examro tîpîrî ahruko.

10 Wehto roron n̂emarakape n̂examro pona. Wehto ywaka rma n̂examro ar̂mapoko yiixatî pîn komo ya hara. Ewtarî yaka xa na n̂examro penî cma re mar̂mesî yuhnakan yaka awomura ro mak tak ehtome so.

11 On wara xa cirko kicicme tîmtapotaxmu komo, tohnaw tooto komo poko tîmtapotaxmu kom ha, eken komo enpora ro mak esko yîwya so. On wara cirko waihkano rin̂e kom hara, n̂examro wenatîkan̂e wara cirko yîwîrîmacho kom ha.

12 Cesemetanmesom komo mtapotarî yakronoman̂e me ween̂asî Kporin komo, yupurantamnî komo yepanîn̂e me marha.

13 On wara reha kexe kir̂wan komo awya Apa, Awosotî cma xakn̂e amna kurun me, kexe. Amîtwono me rma n̂enmayaxe noro yipu kom ha. Ero wa naxe.