Waano Yaan̂e N̂enîrî On, Tapi Wanorî

1 Apa kah yawno, on wara mas opoko, oyehtopo mukuknometîkesî. Esewkukmara ro mak masî oyehtopo poko.

2 Oyeremetaw ow meen̂asî, oyawomyataw hara ow meen̂asî rma. Oyesehtînotopo meero mîhtînoyasî pahxarono rma.

3 Esama yaw owcetaw ow meen̂asî, oyetakriyataw marha. Ahce wa so na oyehtopo meen̂asî etpoyino pîn.

4 Omtapotarî marha mencetîkesî watohnî me ro mak.

5 Owacan warai me masî omamhokono wara. Oyepatai masî, omkai marha. Awamorî ke oyahsîn̂e wara marha masî.

6 Keserepokesî ro mak apoko Apa oyehtopo yentîkan̂e me awexirî ke. Ero wa tooto yehtopo yîhtînopîra ro mak was owî reha.

7 Ahna thakwa re kîwce Awekatî yai? Ahna thakwa re kesake ahyai?

8 Kah yaka owcetaw iito rma masî. Roowo yatumnaka owcetaw etakriso iito marha mas hara.

9-10 Enmarî yakro ro na kîwce tarin̂em wara, miya ro mak na kîwce tuuna imo mapitaka xa. Iito rma tko oyahsîn̂e me masî awamorî ke. Iito rma ow mecehcesî awamorî ke kaari n̂ixan ke.

11 On wara na wîîke anarimaw, Awarpan xa na oyeyamya, wîîkesî. Ero rma tko n̂etakîcesî katpan me hara, oyenpon̂e me.

12 Keyamra ro mak wa nasî awarpan an̂entorî me. Kosope meero nasî enmarî wara awya. Awarpan, katpan etîme re ro mak nas awya.

13 Oropotarî yakîhton̂enho meero Amoro. Yememe ropotaw ow mîkahye.

14 Kyopono ro xa Amoro ham, wîîkes awya Apa. Keserepokesî ro mak oyakîtotoponho poko awya. Kir̂wan̂he ro mak ow makîhcekn̂e, wîîkesî. Yaaro xa ero wa wîîkesî.

15 Enîhnî to rma ka oyexitaw ow meen̂akn̂e. Takîhso ro mak opun makîhcekn̂e roowo yatumnaw.

16 Opun meen̂akn̂e akîhtonaw rma ka. Akaritan yaw marha mîmewrekn̂e oyenmacho yukuknomacho. Ero wicakî xa nasî noro amn̂e waipîra, kacho mîmewrekn̂e. Ero wa mîmewrekn̂e enmarî yenîhra rma ka oyexitaw.

17 Tpoxwe ro mak nas owya opoko awesehtînotopo Apa. Mer̂pora ro mak nas opoko awesehtînotopo.

18 Opoko awesehtînotopo yukuknoma xe oyexitaw, okyo, axawa yopo ro mak nasî mer̂pora ro mak. Opakache ahyaw rma wasî. Ero wa mas opoko Apa.

19 Taa, on wara marha wîîkes awya Apa kicicme cehsom komo poko hara, noro yipu komo waihka xe xa was awya, wîîkesî. On wara wîîkesî kicicme cehsom komo ya hara, Ohyai kr̂a etocoko amyamro waihkano ciri xatî komo, wîîkesî yîwya so.

20 Apoko nîmtapowaxe n̂examro Apa, kicicme ro mak kica. Yukurumîkno pîn wara ro mak awetacaxe okwe.

21 On wara was ow Apa, aaxatî pîn komo xera ro mak wasî. Awîrîyakan̂e komo xatî pînî ro mak ow.

22 Noro yipu komo xera ro mak wasî, Wara n̂he mak yiixatî pîn ow, kacho mera ro mak wasî. Yiixatî pînî ro me kesehtînoyas ow. Ero wa kicicme cehsom komo wîhtînoyas ow.

23 Taa, on wara wîîkes hara awya Apa, oropotarî entîkakî ahce wa na oyehtopo yentome awya. Oyeserepokacho yîhtînoko, Ero wa xa nai ham, kachome awya opoko.

24 Kicicme oyehtopo enko ero ken̂e oyexitaw. Ow tak arko awesamarî yaw kehcamnotopo pîn yaw. Ero warai yaw ow arko.