Tapi Wanorî On

1 On wara wîîkes awya Apa, kir̂wan̂he xa mai ham okre, wîîkes awya tahwore xa. Naxe mer̂pora ponaro anarî komo yehtopo. Noro yipu komo n̂entarî me rma kewanomesî kir̂wan̂he awehtopo apoko.

2 Amînî ro wece kutupenwasî amamakan me. Kir̂wan̂he xa awehtopo poko marha kîmtapowasî. Kakronoman̂e me awehtopo poko kîmtapowasî, kemîknon̂e pîn me awehtopo poko marha. On wara mîîkekn̂e amna ya, Omtapotachonho ponaro xa ehcoko, oyosotî ponaro marha. Ero ponaro ehcoko ahce na yopo ro mak miyan komo yopo rma, mîîkekn̂e amna ya.

3 Pahxa rma on wara wîîkekn̂e awya, Owî cma re mîkaricesî, wîîkekn̂e cerewre ro mak. Ero ke ow meyukyakn̂e. Erasîn me tak ow miir̂akn̂e, oropotarî mîkaricekn̂e xa tak ha.

4 Amn̂e tak amtapotarî n̂encexe roowo pono kayaritomon komo ahnoro. Ero yimaw tak kir̂wan̂he awehtopo poko nahwowaxe.

5 Kporin komo yehtopo poko cewanomaxmu me tak naxe okre. Yaaro kexe ero wara. Kir̂wanî ro xa Mîk Kporin komo, Kyopono ro.

6 Kah yawno rma re Mîk Kporin komo. Tpoyino komo xawyakan me cesehtînosom komo ponarono rma tko tî Mîk okre. Ow xa kyopono okre, kan̂e komo reha n̂een̂asî mooxe mak. Ero wa nasî Kporin komo.

7 Kesemetanmekyasî roro okwe. Wara rma waipîra ow miir̂as okre. Opoko nîrwonaxe okwe ooxatî pîn komo. Awaporî tko mehyatkesî n̂examro yemetanmekn̂e me. Awamorî ke ow mukurunpesî kaari n̂ixan ke.

8 Oyenporitîkesî Kporin komo iime xa tak oyehtome. Miya roro kwakren̂e Amoro Apa, Ero wicakî mak kwakrexe so, kacho mera ro mak. Ero ke an̂irithîrî ahsîpînkara ro mak esko, wîîkes awya. Ero wa mak wîîkes awya Apa.