On wara tîxatken̂e Babiron̂a po kexitaw so, tuuna yepu yecihtaw ceremetken̂e. Tîwracetken̂e thakwa okwe Siaw pînîn yaw.

2 Ahwora ro mak tîxatken̂e okwe. Kratînthîrî komo takriyatken̂e mak sawkeru yepu pona, ahpatho ha.

3 On wara ketken̂e kaan̂enhîrî komo kîwya so, Ai, Awanorî komo kyam aacoko amna n̂entarî, ketken̂e kîwya so. Siaw po maar̂atken̂e ero aacoko tahwore, ketken̂e. Ero wa ketken̂e kîwya so kemyawnonhîrî komo yaan̂enho komo rma kica.

4 Ahce wa thakwa re Kporin komo wanorî taar̂atu anarî yana komo rowon po kexitaw so okwe.

5 Ai Xerusaren, ewto amoro, awakro kîmtapowasî. Ahcamnopu xera ro mak wasî. Ahcamnoyataw ketaw ha re owya camkî kr̂a tak n̂ehtîkape oyamotho hara kaaritho.

6 Ahcamnoyataw ketaw ha re owya on̂utho pen tak n̂etahsîpe okarantaka. Ero wa kr̂a oyexi xe wasî oyahworetopo me xa Xerusaren yenîhra oyexitaw ketaw ha re.

7 Apa kah yawno, on wara wîîkes awya, Eton yepamtho komo mtapotachonho yîhcamnopîra esko. On wara ketken̂e kica Xerusaren wacan yawkache amna waparî komo ya, Xerusaren wacantho kr̂a mohrakacoko, mîîmotho meero. Mapatanthîrî meero macakacoko, ketken̂e okwe. Ero wa kachonho yîwya so yîhcamnopîra esko.

8 Ai, Babiron̂a yemsîrî, awya wîîkes hara, Twaihkaxmu me thakwa mas amn̂e okwe. Tawake xa naxe amn̂e amna yepanîn̂e komo apoko.

9 Tawake naxe amxîkîthîrî yahsîn̂e komo, wahrai komo yahsîn̂e. Noro yipu komo ciki tak nar̂mexe kr̂a toh pona waihkachome so. Ero wa amxîkîthîrî pen komo waihkexe. Tawake naxe waihkan̂e komo. Ero wa naxe.