On wara wîîkes awya so, Kir̂wan̂he xa mai ham okre, kacoko Kporin komo ya. Kir̂wan Mîk okre. Miya roro kakronoman̂e Mîk yîtîhkan me ro mak okre.

2 Kir̂wan̂he xa mai ham okre, kacoko ponaro anarî yana komo yehtopo yopono ya, Kaan ya xa. Miya roro kakronoman̂e Mîk yîtîhkan me ro mak.

3 Kir̂wan̂he xa mai ham okre, kacoko poritomo komo Porin ya. Miya roro kakronoman̂e Mîk yîtîhkan me ro mak.

4 Ero wa kacoko yîwya cirihnî ciin̂e me exirî ke Noro mak ha. Keserepokacho komo ciin̂e marha Mîk ha. Miya roro kakronoman̂e Mîk yîtîhkan me ro mak.

5 Ero wa kacoko yîwya yuhnari yîhtînon̂e me exirî ke. Ero wa cexirî ke kaapu mko nakîhcekn̂e. Miya roro kakronoman̂e Mîk yîtîhkan me ro mak.

6 Ero wa kacoko yîwya roowo yehyatkarî ke tuuna rataka. Miya roro kakronoman̂e Mîk yîtîhkan me ro mak.

7 Ero wa kacoko yîwya kîkatparetopo yakîhton̂enho me exirî ke. Porin komo nakîhcekn̂e. Miya roro kakronoman̂e Mîk yîtîhkan me ro mak.

8 Kaamo tî nakîhcekn̂e enmarî ciitopo. Miya roro kakronoman̂e Mîk yîtîhkan me ro mak.

9 Nuun̂i marha tî nakîhcekn̂e, xirko mkko marha. Kosope kweipon̂e me tî ero komo nakîhcekn̂e. Miya roro kakronoman̂e Mîk yîtîhkan me ro mak.

10 Ero wa kacoko yîwya Exitu pono mumutho pen komo waihkarî ke, poturme ewruxapu pen komo waihkarî ke ha. Miya roro kakronoman̂e Mîk yîtîhkan me ro mak.

11 Exitu pono komo chei takî tî Ixaw Yana komo naar̂akn̂e. Miya roro kakronoman̂e Mîk yîtîhkan me ro mak.

12 Karitî me xa tamorî n̂enpekn̂e, taporî marha n̂enpekn̂e ehyatkaxapu wara. Ero wa tî n̂esenpekn̂e Ixaw Yana komo yarîrî ke. Miya roro kakronoman̂e Mîk yîtîhkan me ro mak.

13 Kir̂wan̂he xa mai ham okre, kacoko yîwya Cucurem Yewku yîhkoton̂enho me exirî ke. Miya roro kakronoman̂e Mîk yîtîhkan me ro mak.

14 Tuuna yotari takî tî Ixaw Yana komo naar̂akn̂e. Miya roro kakronoman̂e Mîk yîtîhkan me ro mak.

15 Paraw pen tî n̂enorinohkekn̂e Cucurem Yewku kwaka, noro sowtatun pen komo marha. Miya roro kakronoman̂e Mîk yîtîhkan me ro mak.

16 Ero yinhîrî tîyanan komo takî tî naar̂akn̂e pohnîntari. Miya roro kakronoman̂e Mîk yîtîhkan me ro mak.

17 Ero wa kacoko yîwya kayaritomo pen komo yar̂marî ke xa hara yîwya. Yukurumîkno pen komo nar̂mekn̂e. Miya roro kakronoman̂e Mîk yîtîhkan me ro mak.

18 Miya ro mak cekaiporesom komo mîkyam waihkekn̂e kayaritomo pen komo. Miya roro kakronoman̂e Mîk yîtîhkan me ro mak.

19 Sion pen tî waihkekn̂e, Amohew komo kayaritomon pen ha. Miya roro kakronoman̂e Mîk yîtîhkan me ro mak.

20 Oki pen marha tî waihkekn̂e, Basan pono komo kayaritomon pen. Miya roro kakronoman̂e Mîk yîtîhkan me ro mak.

21 Yîrowonthîrî komo nîmyakn̂e anarî komo ya eken komo me. Miya roro kakronoman̂e Mîk yîtîhkan me ro mak.

22 Ixaw Yana komo yeken me tî nîmyakn̂e, tanton komo yeken me ha. Miya roro kakronoman̂e Mîk yîtîhkan me ro mak.

23 Kir̂wan̂he xa mai ham okre, kacoko yîwya, kponarono komo me exirî ke. Tooto komo xawyakan me ro mak kexitaw so kponaro so rma xakn̂e okre. Miya roro kakronoman̂e Mîk yîtîhkan me ro mak.

24 Kîîxatî pîn komo yai kowce so okre. Miya roro kakronoman̂e Mîk yîtîhkan me ro mak.

25 Ero wa kacoko yîwya tînakîtothîrî komo nahman̂e me exirî ke. Tooto nînahmesî, tooto pîn marha. Miya roro kakronoman̂e Mîk yîtîhkan me ro mak.

26 Kir̂wan̂he xa mai ham okre, kacoko Kaan ya, kah yawno ya. Miya roro kakronoman̂e Mîk yîtîhkan me ro mak okre. Noro yipu Mîk Kporin komo.