126
Waano On, Xerusaren Pona Tîtosom Komo Narîrî Tawake Ro Mak Xatken̂e Ixaw Yana Komo Siaw Pona Cetîrametaw So Hara
1 On wara kwakretken̂e so Kporin komo, Siaw pona kekyatken̂e so hara okre waapa narîthonhîrî. Oona kekîche so kwosowatawno wara ro mak tîxatken̂e okre.
2 Cewretken̂e ro mak tak okre. Waano marha taar̂atken̂e kahwotacho komo. Ero yimaw on wara takî tî ketken̂e mîk hak rowon pono komo kpoko so, Kir̂wan̂he ro mak n̂examro nakronomai ham okre Kporin komo, ketken̂e tî.
3 Yaaro, kir̂wan̂he ro mak kakronomace so ham okre Kporin komo. Ero ke tahwore ro mak taxe okre.
4 Ero wa xa marha amna ek hara Apa aaxapunhîrî hara. Ero wa cekîche hara tuuna yepu wara mak nas amna N̂ekebe pono wara.
5 Taa, on wara marha wîîkes awya so, tîwrataro kîwcetaw so knatîrî komo ciiso ero yeperîrî tak cenmekyaxe amn̂e tahwore okre.
6 Ero wara taxe knatîrî ciiso kîwcetaw roro so, tîwrataro kîwcetaw roro so tîtmokyaxe hara amn̂e ero yeperîrî ke cemyarke tak okre. Tahwotaro tîtmokyaxe. Yaaro, ero wa tîtmokyaxe hara.