Waano On, Xerusaren Pona Tîtosom Komo Narîrî

1 On wara ketken̂e opoyino komo owya, Kaikatko Kporin komo mîn yaka, ketken̂e. Tawake ro mak wîxakn̂e ero wa kacho yentache.

2 Ai, Xerusaren amoro ewto ha, on wara wîîkes awya, amna n̂ecececesî awacan yaw okre.

3 Etmîtwo re ciiso nasî mîîmo mko, Xerusaren pono mko ha.

4 Iina cexe tribu komo, Kporin komo yanan kom ha. Iina men etocoko yicimn̂ipuntaxera, kachonho yaw roro rma cexe iina. Kporin komo yosotî poko ahwotaxi cexe.

5 Iito nasî kayaritomo yaponî mko. Ero pona so n̂eremexe kayaritomo komo, Tapi yanan komo. En̂ekano n̂iir̂axe iito.

6 Ero ke on wara wîîkes awya so, Xerusaren pono komo poko amtapotacoko Kaan yakro esemetanmekîra ehtopo komo poko. Ahce na poko ehn̂an me exi xe so ro mak wasî aaxatî komo, Xerusaren pono xatî kom ha.

7 Ahwokan me exi xe so was awacan yawno komo. Ehnan me exi xe so wasî amîn yawno komo marha, kayaritomo mîn yawno kom ha.

8 Oyakno komo ponaro wasî, oyakrono komo ponaro marha. Ero ke on wara wîîkes awya Xerusaren ya, Esemetanmekîn me mak exi xe so wasî aapono kom ha, wîîkesî.

9 Etwîrîman me exi xe wasî Kporin komo mîn, ponaro kehtopo komo mîn. Ero ke amoro marha etwîrîman me awexi xe wasî. Ero wa wîîkesî Xerusaren ya, ewto ya ha.