On wara wîîkes awya so, tawake taxe esmurera kexitaw so esama yaw, Kporin komo ya kapanatanmetopo komo yaw roro kexitaw so ha.

2 Tawake marha taxe yîmtapotarî ponaro xa kexitaw so. Tawake marha taxe Noro yenî xatî me kexitaw so marha, enî xatî me xa kexitaw so ha.

3 Kicicme exihra ro mak naxe noro yipu komo. Kaan yehtopo yaw roro mak naxe.

4 On wara mîîkekn̂e amna ya Apa, Owya apanatanmetopo komo men ewetîcoko. Ero ponaro xa men ehcoko, mîîkekn̂e amna ya.

5 On wara wasî, Oyehtopo kor̂ma xe ro mak wasî awya kpanatanmetopo yewetîn̂e me roro oyehtome ha.

6 Ero wa oyexitaw yîhyapamra ro mak tak was awya kpanatanmetopo yentîkarî ke owya.

7 Kir̂wan̂he xa mîn wencesî awya kpanatametopo. Ero yencetîketaw tak owya kir̂wan̂he tak kahwowasî apoko.

8 Amtapotarî wewehcasî, kpanatanmetopo ha. Ero ke owî cma re ahsîpînkatîkara masî.

9 Ahce wa xa cehtopo komo nakir̂wametu kar̂pamxan komo? Amtapotarî ponaro mak cexitaw so, ero yaw roro cexitaw so marha kir̂wan̂he tak naxe.

10 Cerewre ro mak awehtopo yenî xe cehsom ow Apa. Ero ke awya kpanatanmetopo ponaro xa oyexi xe wasî etowîn me ro mak.

11 Amtapotarî weyamye roro oropotaka kicicme exihra ro mak oyehtome apoko.

12 Kir̂wanî ro mîkro, kacho Amoro ham Apa. Ero ke owî cma re mîhcamhokesî amtapotarî poko, kpanatanmetopo poko ha.

13 Omtarî ke rma wekatîmye ahnoro amtapotarî, kpanatanmetopo ha.

14 Tahwore ro mak wasî amtapotarî poko. Tawake rma re wasî puranta poko mer̂pono pîn poko, ero wa xa marha wasî tahwore amtapotarî poko hara.

15 Awya kpanatanmetopo poko kesehtînoyasî. Awehtopo poko kesehtînotîkesî.

16 Tahwore ro mak wasî kpanatanmetopo poko. Amtapotachonhîrî yîhcamnopîra ro mak wasî.

17 Awanton mak ow Apa. Ero ke ow akronomakî waipîra oyehtome, amtapotarî yewetîtome marha owya.

18 Cewke tak ow cirko oyepokachome xa tak amtapotarî poko, amna panatanmetopo poko ha.

19 Anarî yana warai me mak wasî tan roowo pono komo chew. Ero ke awya kpanatanmetopo eyamra esko on̂entorî na.

20 Enmar̂atîxera amtapotarî yenta xe wasî kpanatanmetopo. Oyopo ro mak enta xe wasî, cerewre ro mak.

21 On wara mas Apa anarî komo yopono me cesehtînosom komo poko, noro yipu komo yein̂e Amoro. Anîwîrîmathîrî komo mîkyam. Amtapotarî yai cetowsom komo mîkyam okwe, kpanatanmetopo yai ha.

22 Amtapotarî ponaro xa wasî. Ero ke ohyai en̂epeko owîrîyakan̂e komo, opoko cetaporesom komo marha.

23 Anarimaw antomano rin̂e komo rma n̂eremexe iina re. Iito cexitaw so kicicme nîmtapowaxe opoko. Wara rma amtapotarî poko kesehtînoyasî kpanatanmetopo poko ha. Awanton mak ow Apa.

24 Tpoxwe ro mak nas owya amtapotarî. Oyakîren̂e mîn ha.

25 Roowo pona epîrkaxapu wara nasî oropotarî okwe. Amtapotarî yaw roro rma tko ow karihtoko hara.

26 Oyehtopo wekatîmye awya. Omtapotarî meyukyakn̂e. Amtapotarî poko ow yîhcamhokakî, kpanatanmetopo poko ha.

27 Kpanatanmetopo poko ow yîhcamhokakî yuhnari yîhtînotome tak owya. Ero wa oyexiche tak an̂irithîrî poko keserepokesî.

28 Kpokesî ro mak okwe oyahwokarî ke. Ero ke ow karihtoko hara amtapotachonhîrî yaw roro rma.

29 Cemarontan me ro mak tak ow cirko Apa. Ow wakreko kpanatanmetopo yentacho ke.

30 Yaaro ekatîmn̂e me kehtopo wahsîy oyehtopo ro me. Kpanatanmetopo ponaro xa wasî.

31 Amtapotarî wahsîyas Apa, ahsîpînkan me ro mak. Ero ke ehn̂ara cma re ow miir̂asî ahce na poko oyexitaw.

32 Oropotarî rma tak mîpor̂mamnoyas amn̂e. Ero yinhîrî kpanatanmetopo yaw roro tak wasî kar̂pe tîtosom wara.

33 Ow yîhcamhokakî Apa awehtopo poko, kpanatanmetopo poko ha, ero yaw roro xa tak oyehtome. Ero yinhîrî tak ero wewehcasî owaitopo pona roro.

34 Yuhnari yîhtînon̂e me ow cirko Apa. Ero yinhîrî awya kpanatanmetopo wewehcasî tahwore xa tak.

35 Esama wara nasî amtapotarî, kpanatanmetopo ha. Ero yaw mak ow arko. Tawake xa wasî ero poko.

36 Oropotarî aknamakî amtapotarî wece. Oyemyawno yepamnotopo wece reha oropotarî aknamara esko.

37 Ero pîntho yai ow ewkor̂makî. Awehtopo yaw roro mak xa ow karihtoko.

38 Awanton mak ow Apa, apoko tweeno ha. Ero ke amtapotachonhîrî yaw roro rma kasko xa hara owya, Yaaro nîîke ham, kachome owya ero poko.

39 Owîrîyakacho pona keraswasî. Ero ke yîwîrîyakan me mak ow cirko. Kir̂wanî ro mak mîn awya kpanatanmetopo.

40 Awya kpanatanmetopo yenta xe ro mak wasî. Ow tak karihtoko hara kir̂wan̂he awehtopo ke ha.

41 Mîk hak pînîn yaw masî. Ero ke opînîn yaw marha esko. Oyakronoman̂e me tak esko amtapotachonhîrî yaw roro rma.

42 Ero wa oyakronometaw awya opoko owîrîyakan̂e yeyuhtopo tak wîhtînoyasî. Amtapotarî pona xa tak ween̂asî.

43 Yaarono xa mîn amtapotarî, awya kpanatanmetopo ha. Ero pona mak ween̂asî roro. Ero ke amtapotarî cma re towîhra masî omtai.

44 Ero towîhra awexitaw amtapotarî wewehcasî miya roro kpanatanmetopo ha. Etowîn me ro mak wewehcasî.

45 Kicicme cehsom yanton pîn me marha tak ketar̂asî oyemyawno poko oyehtome. Ero wa wasî awya kpanatanmetopo yenta xe xa oyexirî ke.

46 Kayaritomo komo ya meero wekatîmyasî amtapotarî. Yîhyapamra ro mak wekatîmyasî yîwya so.

47 Tpoxwe ro mak wencesî awya kpanatanmetopo. Yiixe ro mak oyehtopo mîn ero.

48 Kapockanwasî awya kpanatanmetopo wece, yiixe xa oyehtopo wece. Awya kpanatanmetopo poko kesehtînoyasî. Ero wara wasî.

49 Pahxa mîmtapowakn̂e oyakronomacho poko Apa, awanton yakronomacho poko ha. Kakronomes amn̂e, mîîkekn̂e owya. Ero ke ero wa kachonho ponaro rma cma re masî.

50 Ero ke oyesemetanmekyataw amtapotachonhîrî xa oyereporesî. Ero rma nasî okariton̂e me, amtapotachonhîrî ha.

51 Opoko rma re n̂etaporexe kica cehcoyoponkaxmu komo, miya xe ro mak kexe. Wara rma awya kpanatanmetopo yahsîpînkara wasî.

52 Pahxa panareno mîîr̂akn̂e Apa. Ero wa awya ciino ritoponho ponaro rma wasî. Ero poko tak keserepotanmekyasî.

53 Kîrwonasî ro mak kicicme cehsom komo poko awya kpanatanmetopo yahsîpînkarî ke yîwya so kica.

54 Awya kpanatanmetopo nasî owanorî me ahna so na owcetaw.

55 Kosope meero awosotî ponaro was Apa. Awya kpanatanmetopo ponaro marha wasî.

56 Ero wara roro wasî amtapotachonhîrî yewetîrî ke owya, kpanatanmetopo ha.

57 Oyeken Amoro Apa. Amtapotachonhîrî men wewehcasî, wîîkekn̂e awya.

58 Ow akronomakî, wîîkekn̂e awya, yaaro xa wîîkekn̂e. Ero ke opînîn yaw xa tak esko amtapotachonhîrî yaw roro rma.

59 Oyehtopo poko rma kesehtînoi. Ero ke ketaknamekn̂e tak amtapotarî yentachome ha.

60 Yohno wewehce awya kpanatanmetopo Apa. Amn̂e mak wewehcasî, kahra ro mak wîxakn̂e.

61 Apomixapu wara wîxakn̂e, kicicme cehsom komo napomitho wara. Wara rma awya kpanatanmetopo yîhcamnopîra wasî.

62 Rakataw ro rma kîhcesî kuywa poi awakro omtapotachome, Amna makronomekn̂e ham okre, kachome awya. Ero wara wîîkesî kir̂wanî ro me exirî ke amtapotachonhîrî, kpanatanmetopo ha.

63 Apoko tweeno komo yakrono me wasî miyan komo yakrono me rma. Awya kpanatanmetopo yewetîn̂e komo yakrono me marha wasî.

64 Mer̂pora ro mak nasî tan roowo po amna wakrecho awya. Tawronohkatîkaxi nasî roowo pen ero yipu ke. Awya kpanatanmetopo poko ow yîhcamhokakî Apa.

65 Ow makronomekn̂e Apa awantonî rma. Amtapotachonhîrî yaw roro rma ow makronomekn̂e.

66 Ow akîhreko mîn hak poko. Mîn hak poko marha ow yîhcamhokakî n̂he. Ero wa ow cirko awya kpanatanmetopo ponaro oyexirî ke.

67 On wara ka wîxakn̂e esemetanmekîra ka oyexitaw, esama yai cetowsom wara wîxakn̂e kica. Oroto tak amtapotarî wewehcas okre.

68 Kir̂wan xa Amoro Apa, akronomano rin̂e ro xa. Ero ke amtapotachonhîrî poko ow yîhcamhokakî, kpanatanmetopo poko ha.

69 On wara xatken̂e tpoyino komo yopono me cesehtînosom komo, tapota mak nakîhcetken̂e opoko tohnaw kica. Wara rma awya kpanatanmetopo wewehcasî tahwore rma.

70 Twepakyem wara xa nasî cehcoyoponkaxmu komo ropotarî, kasom wara ro mak. Owya reha tpoxwe xa nasî awya kpanatanmetopo.

71 Oyakir̂wamacho me rma xakn̂e oyesemetanmetoponho Apa. Oyesemetanmekrî ke tak awya kpanatanametopo poko tak kehcamhokesî.

72 Tpoxwe ro mak wencesî amtapotachonhîrî, kpanatanmetopo ha. Ero pîntho me makî reha ween̂asî exepeyu mer̂pono pînî rma, 100.000 yakenonî rma. Ooru rma na mîn exepeyu, prata ha na anarimaw. Ero pîntho me rma tko ween̂as ero reha.

73 Awamorî ke rma ow makîhcekn̂e Apa. Ero ke tak yuhnari yîhtînon̂e me ow cirko hara awya kpanatanmetopo poko oyehcamhokachome.

74 On wara naxe apoko tweeno komo amn̂e opoko, tawake naxe okre oyen̂ataw. Ero wara naxe opoko amtapotarî ponaro oyexirî ke, Kakronomexe so, kacho ponaro.

75 Kir̂wan xa mîn awya kpanaretopo Apa, wîîkesî yaaro xa. Yaaro rma oyemetanmecho mekmexpekn̂e, oponaro rma mai ham okre, wîîkesî.

76 Awya oyakronomacho cirko oyereporen̂e me. Amtapotachonhîrî yaw roro rma ero wa ow cirko. Awanton mak ow ha.

77 Tpoxwe xa wencesî kpanatanmetopo awya. Ero ke opînîn yaw awehtopo mokope ohyaka waipîra oyehtome.

78 On wara xatken̂e anarî komo yopono me cesehtînosom komo opoko, oyemetanmekyatken̂e tohnaw ro mak kica. Ero ke n̂examro pen cirko cehn̂axmu me. On wara tko was owî reha, awya kpanatanmetopo poko kesehtînoyasî.

79 Oyakrono me tak exi xe wasî apoko tweeno komo, an̂ekatîmrî poko ehcamhokaxapu kom ha.

80 Awya kpanatanmetopo ponaro oyexi xe wasî, Ero wa kacho ewetîra ro mak nasî noro, kacho mera ro mak oyehtome. Ero wa oyexiche tak yîhyapamra wasî.

81 Amoku xe ro mak was Apa okurunpen̂e me. Kahwokesî okwe pahkî amomokrî poko owya. Wara rma amtapotarî ponaro rma wasî.

82 Kewxîrîyasî mak okwe pahkî amtapotachonhîrî yenî xe. Ahcemaw xa tak ow mahwore? wîîkesî.

83 Wooku yenho wa mak wasî yîsîn chewno wa. Wara rma awya kpanatanmetopo poko yîtwen̂ekarîntara wasî.

84 On wara marha wîîkes awya Apa, awanton mak ow ha. Atî wicakî kaamo rma ka nai waipîra oyehtopo? Ahcemaw xa na ow mepanîya oyemetanmekn̂e komo poko? wîîkes awya.

85 Ewtarî komo nahcetken̂e cehcoyoponkaxmu komo ero yaka oyepîrkacho okwe. Ero wa nahcetken̂e awya kpanatanmetopo yaw rorohra ro mak okwe.

86 Yaarono xa mîn awya kpanatanmetopo, ahnorono rma. Tohnaw ro mak oyemetanmekyaxe ooxatî pîn komo. Ero ke ow yukurunpeko.

87 Roowo poi re oyen̂epetken̂e okwe. Wara rma awya kpanatanmetopo yîhcamnopîra ro makî wîxakn̂e.

88 Akronomano rin̂e ro Amoro Apa. Ero ke ow karihtoko hara. Ero wa ow karihtoko amtapotarî ponaro oyehtome.

89 Tmewreso nasî amtapotarî Apa, kah yaw. Towîhnî me ro mak nasî iito.

90 Kemîknon̂e pînî ro mak Amoro Apa. Miya roro ehretawnomaxapu komo meero emîknopîra mas amn̂e. Roowo mecehcekn̂e pahxa. Ero ke ehcamnopîra ro mak nasî.

91 Amtapotachonhîrî yanme rma nasî roowo, kah yawno mko marha. Ahce wa na naxe awanme mak.

92 Awya kpanatanmetopo poko tahwore exihra oyexitaw ketaw ha re kwaihîrî ha na re okwe oyesemetanmetopo yanme rma.

93 Awya kpanatanmetopo yîhcamnopîra ro mak wasî. Ero ke rma ow mîkaricekn̂e.

94 Awya kpanatanmetopo wepor̂akn̂e entachome tak owya. Ero ke ow yukurunpeko Apa, awyanî ro me oyexirî ke xa.

95 Owapancexe kicicme cehsom komo owaikachome okwe. Wara rma amtapotarî poko kesehtînoyasî rma.

96 Ahnoro kir̂wan̂he kehtopo yîhtînon̂e me rma re wasî. Miya xen pokono rma tko mîn kpanatanmetopo awya.

97 Tpoxwe ro mak nasî awya kpanatanmetopo owya. Ero poko kesehtînoyasî kokmamso ro.

98 Ow makîhres Apa awya kpanatanmetopo ke. Ero ke ooxatî pîn komo yopo ow miir̂asî takîhso xa. Eroromero nasî amtapotachonhîrî oropotaw.

99 Naxe rma re opanatanmekn̂e komo. N̂examro yopo tko wasî yuhnari yîhtînon̂e me. Ero wa wasî amtapotarî poko oyesehtînorî ke.

100 Yuhnari yîhtînon̂e me wasî pahxan pen komo yopo awya kpanatanmetopo yewetîrî ke xa owya.

101 Kicicme kehtopo nai esama wara kicicitho wara. Ero yipu yaka tîtosom me ohtarî kor̂mara ro mak wîxakn̂e.

102 Awya kpanaretopo ponaro rma wasî etowra ro mak. Amoro rma ow mîtwermekn̂e. Ero ke etowra wîxakn̂e.

103 Tîkporem wara ro mak nasî amtapotarî owya. Tîkpore rma re nasî weenu, tîkpore xa tak nasî amtapotarî ween yopo ro mak.

104 Yuhnari tak wîhtînoyasî awya kpanatanmetopo yentarî ke mak owya. Ero ke tooto yehtopo xera ro mak wasî, tohnawno me ehtopo komo.

105 Oyesamarî weyuru me mak nasî amtapotarî, ahna na owtotopo weipon̂e me ha.

106 On wara wîîkekn̂e, Kir̂wan mîn amtapotarî, kpanaretopo pokono. Ero ke wewehcasî, wîîkekn̂e. Yaaro xa wîîkekn̂e towîhnî me ro mak.

107 Kesemetanmekyasî ro mak Apa. Ero ke ow karihtoko amtapotachonhîrî yaw roro rma.

108 Kir̂wan̂he xa mai ham Apa okre, wîîkes awya. Awya tîmsom mîn ero wa kacho. Ero ke tpoxwe cma re mencesî. Awya kpanaretopo poko marha ow yîhcamhokakî.

109 Emapona owairî yaro wasî. Wara rma awya kpanatanmetopo yîhcamnopîra wasî.

110 Mîîye warai n̂iir̂atken̂e kicicme cehsom komo oyemcinotopo okwe. Wara rma awya kpanatanmetopo ponaro rma wasî etowra.

111 Amtapotarî wahsîyakn̂e oyemyawno wara. Eroromero wahsîyakn̂e oyahworen̂e ro me exirî ke.

112 Awya kpanatanmetopo yewetî xatî me roro kesehtînoyasî. Eroromero ero wara oyexi xe wasî miya roro, owaitopo pona roro.

113 Anarî komo naxe yarpa yîhtînon̂e me kica. Noro yipu komo xera ro mak wasî. Awya kpanatanmetopo xe xa tko wasî.

114 Oyeseyamtopo xa Amoro Apa, oyecen̂an marha Amoro. Amtapotacho ponaro mak wasî.

115 Ohyai etocoko amyamro, kicicme ciino rin̂e komo. Kaanî mtapotarî makî reha wewehcas ow, ponaro oyehtopo ya kpanatanmetopo kom ha.

116 Ow ecehtoko waipîra oyehtome. Amtapotarî yaw roro rma ow ecehtoko. Yîhyapamra ro mak ow cirko, Kaanî rma tî okurunpe, kacho pona.

117 Ow ecehtoko waipîra oyehtome. Ero ke awya kpanatanmetopo ponaro wasî miya roro mak.

118 Amtapotacho poko ceponarononkaxmu komo ahsîra ro mak masî ayanan me okwe. Cemaro me mak nîmtapowaxe kica noro yipu komo, tohnaw ro makî.

119 Kicicme cehsom komo yar̂man̂e me masî yukpurukpuruntho wara. Ero ke amtapotarî yenta xe ro mak wasî.

120 Kîtatanasî ro mak apona oyeratîmrî ke. Awya kpanaretopo pona keraswasî.

121 Kir̂wan̂he wiir̂akn̂e tooto komo. Kir̂wan̂he wîxakn̂e poko so. Ero ke oyemetanmekn̂e komo chew ow tînomra esko.

122 On wara kasko Apa cehcoyoponkaxmu komo n̂entarî me, Noro kurunpen̂e ro Ow ha, kasko opoko. Ero wa kasko oyemetanmekîra tak ehtome so.

123 Kukurunpesî, mîîkekn̂e cma re owya. Yaaro xa wa mîîkekn̂e. Ero ke okurunpetopo ponaro xa wasî. Pahkî momokn̂e wara was okwe. Momokrî poko kekar̂kesî ro mak cewxîrîso ro okwe.

124 Amna pînîn yawno xa Amoro Apa. Ero ke owî cma re mîwakresî. Awya kpanatanmetopo poko ohcamhokacho ke xa ow wakreko.

125 Awanton mak ow ha. Ero ke yuhnari yîhtînon̂e me n̂he tak ow cirko. Ero wa ow yîhcamhokakî amtapotarî yentachome n̂he owya.

126 Awya panareno ritopo me tak nasî oroto Apa. On wara naxe mer̂pono pîn komo, ero pîntho wara n̂een̂axe okwe awya kpanatanmetopo.

127 Ero wa wîîkes awya kpanatanmetopo xatî me oyexirî ke. Ooru xe rma re wasî, esmanî ro xe. Awya kpanatanmetopo xe xa tko wasî ero yopo xa.

128 Kir̂wan̂he xa wencesî awya kpanatanmetopo. Ero ke ero pîntho pokono me kehtopo xatî pîn me ro mak wasî.

129 Opohkacho me rma tko nasî ahnoro amtapotarî. Ero ke ero yewetîn̂e me wasî oropotaw.

130 Amtapotacho yewomuche kropotaka kweipon̂e me nas okre. Camkîno komo yakîhretopo me nasî.

131 Kpanatanmetopo yenta xe ro mak wasî. Keserepokesî ro mak enta xe.

132 Ow tak enko Apa. Opînîn yaw tak esko. Awosotî xatî komo pînîn yawno Amoro. Ero ke ero wara xa marha esko opoko hara.

133 Owtotopo yîhtînomexpoko owya amtapotarî ke rma. Oyantoman̂e mera ro mak cirko kicicme oyehtopo kica.

134 Oyemetanmekyaxe ooxatî pîn komo. Ero ke ow yukurunpeko. Ero wa ow yukurunpeko awya kpanatanmetopo yewetîtome owya.

135 Cewtawake cma re masî owece Apa, awanton wece. Awya kpanatanmetopo poko ow yîhcamhokakî.

136 Mer̂pora ro mak kewyokwasî ow tuuna yepu wicakî ro mak. Ero wa kîwracesî awya kpanatanmetopo yewetîra exirî ke so tooto komo.

137 Kir̂wanî ro Amoro Apa. Kir̂wan marha mîn awya amna panaretopo.

138 Kir̂wan marha mîn amtapotarî. Ero wa men ehcoko, kachonho ha. Yaarono xa mîn ha, kemîknotopo pînî ro mak.

139 Amtapotarî ponarora naxe okwe ooxatî pîn komo. Ero ke keserepokesî oyopo ro mak.

140 Kicicitho ken̂arî pînî ro mak mîn amtapotacho, Ero wa exirî ke enta xe ro mak wasî.

141 Wahraitho mak ow, yîwîrîyakaxaputho kyam mak. Awya kpanatanmetopo poko yîtwen̂ekarîntara rma tko wasî.

142 Eroromerono mîn kir̂wanî ro me awehtopo. Yaarono marha mîn amtapotarî, kpanatanmetopo ha.

143 Oyesemetanmetopo tak oyepor̂asî, oyahwokacho xa. Tpoxwe rma tko wencesî awya kpanatanmetopo.

144 Kir̂wanî ro mîn amtapotarî. Miya roro kir̂wan̂he nasî. Yuhnari yîhtînon̂e me marha ow cirko waipîra tak oyehtome.

145 Cerewre ro mak kehsamesî apoko Apa. Omtapotarî cma re mencesî. Ero yinhîrî amtapotarî tak wewehcasî, awya kpanatanmetopo.

146 Cewrewre xa kîmtapowasî awakro Apa. Owî cma re makir̂wamesî amtapotarî ponaro n̂he tak oyehtome.

147 Enmaporo kîhcesî kuywa poi awakro omtapotachome. Ero yimaw cerewre kîmtapowasî awakro oyakronomacho poko. Amtapotarî ponaro xa wasî, Kakronomexe so amn̂e, kacho ponaro.

148 Cewke rma wasî kosope pahkî, cenmakaxi ro. Ero wa wasî amtapotarî poko oyesehtînotome.

149 Omtapotarî cma re mences Apa kakronoman̂e me awexirî ke mak. Ow karihtoko hara Apa, amtapotachonhîrî yaw roro rma, awya akîhreno ritopo yaw roro ha.

150 Meyehra mokyaxe kicicitho ponarono komo. Mooxeno wara rma tko naxe awya kpanatanmetopo yai.

151 Meyehra rma mas Amoro reha Apa. Yaarono mîn amtapotarî ahnoro amna panatanmetopo.

152 On wara wencekn̂e pahxa rma, Eroromerono mîn amtapotarî Apa. Towîhnî me ro mak nasî, kacho wencekn̂e.

153 Oyesemetanmekrî rma cma re meen̂asî okurunpetome tak awya. Awya kpanatanmetopo poko yîtwen̂ekarîntara ro mak wasî.

154 Kir̂wan̂he oyehtopo ekatîmko ooxatî pîn komo ya. Ero wa tak ow yukurunpeko. Ow marha karihtoko amtapotachonhîrî yaw roro.

155 Yukurunpen̂e komo nasî mooxe kicicme cehsom komo yai. Ero wa nasî awya kpanatanmetopo yentaxi tohra ro mak exirî ke so okwe.

156 Amna pînîn yaw xa mai ham Apa. Ero ke ow karihtoko hara awya kpanatanmetopo yaw roro rma.

157 Mer̂pora ro mak naxe ooxatî pîn komo, oyemetanmekn̂e kom ha. Wara rma etowra ro mak wasî amtapotarî yai.

158 Kica, wîîkes kemîknon̂e komo yeen̂ataw owya. Ero wa wîîkesî poko so amtapotachonhîrî yewetîra exirî ke so.

159 Amtapotarî xe xa was ow, kpanatanmetopo xe ha. Enko xe ero wa oyehtopo. Owî rma karihtoko Apa, kakronoman̂e ro me awexirî ke.

160 Yaarono mîn amtapotarî ahnoro mak. Kir̂wan mîn amtapotarî, kpanatanmetopo awya. Towhnî ro mak mîn ha.

161 Antomano rin̂e komo meero oyemetanmekyaxe tohnaw. Amtapotarî poko rma tko keserepokesî ro mak.

162 Kahwowasî ro mak amtapotarî poko. Pahxan pen komo purantantho yenîn̂e nahwowasî xa, mer̂pono pîn yenîn̂e. Ero wa xa marha kahwowas ow amtapotarî poko.

163 Poxumra ro mak nasî cemaro owya, yiixera ro mak wasî kica. Awya kpanatanmetopo xatî me xa tko wasî.

164 On wara wîîkes awya Apa, Kir̂wan̂he xa mai ham okre. Kir̂wan xa mîn okre kpanatanmetopo awya, wîîkesî. Emapona roro ero wa wîîkesî. 7 ro ero wa wîîkesî ahnoro kaamo po roro.

165 Ahwokan me ro mak naxe awya kpanatanmetopo xatî komo. Ahce na yanme emacakan me ro mak naxe, kicicitho yanme.

166 Awya okurunpetopo momokyas ow Apa. Awya kpanatanmetopo marha wewehcasî.

167 Awya kpanatanmetopo ponaro xa wasî. Tpoxwe ro mak wences okre.

168 Awya kpanatanmetopo ponaro wasî, an̂ekatîmthîrî ponaro marha. Ahnoro oyehtopo meen̂asî kir̂wantawno wara.

169 Cerewre kîmtapowasî awakro Apa. Ero ke omtapotarî cma re mencesî. On wara wîîkes awya, yuhnarino poko cma re ow mîhcamhokesî amtapotachonhîrî yaw roro rma, wîîkes awya.

170 Omtapotarî cma re mencesî, Ow yukurunpeko, kacho. Amtapotachonhîrî yaw roro rma ow yukurunpeko.

171 Kir̂wan̂he ro mak awehtopo poko kîmtapowasî. Awya kpanatanmetopo poko ohcamhokan̂e Amoro. Ero ke xa kahwowas apoko.

172 Amtapotachonhîrî wekatîmyasî. Kir̂wan xa mîn awya kpanatanmetopo ahnoro.

173 Oyakronoman̂e me tak esko awamorî ke. Ero wa esko opoko awya kpanatanmetopo yahsîrî ke owya, ponaro oyehtopo me.

174 Awya oyakir̂wamacho yenî xe ro mak was Apa. Tpoxwe ro mak wencesî kpanatanmetopo awya.

175 Waipîra cma re ow miir̂as Apa apoko oyahwotachome. Oyakronoman̂e me exi xe wasî awya kpanatanmetopo.

176 Ahyai kîwcekn̂e okwe oper̂a wara, tacixapu wara. Ero ke cma re ow mepor̂as hara, awanton ha. Awya kpanatanmetopo poko twen̂ekarî exihra ro mak wasî. Ero wa wasî.