On wara wîîkes awya so, Kir̂wan̂he xa mai ham okre, kacoko Kporin komo ya. Kir̂wan Mîk okre miya roro kwakren̂e xa. Ero ke ero wa kacoko yîwya.

2 Ero wa kacowpe Ixaw Yana komo, Miya roro kakronoman̂e Mîkî yîtîhkan me ro mak, kacowpe.

3 Ero wa xa marha kacowpe Araw yepamtho kom hara, Miya roro kakronoman̂e Mîkî yîtîhkan me ro mak, kacowpe.

4 Ero wa xa marha kacowpe Kporin komo poko tweeno kom hara, Miya roro kakronoman̂e Mîkî yîtîhkan me ro mak, kacowpe.

5 On wara wîxakn̂e ow, oyesenmekyataw Kporin komo yakro kîmtapowakn̂e oyakronomacho poko. Oyeyukyakn̂e tak Noro. Kir̂wantaka oyar̂akn̂e okre.

6 Oyakrono Mîk Kporin komo. Ero ke erasîra wasî tooto pona. Ahce wa na oyemetanmekyatu tooto komo kopi, kahra wasî.

7 Kporin komo nasî oyakronoman̂e me. Oyakroman̂e komo yakro rma nasî Noro. Ero ke ooxatî pîn komo tak ween̂asî ciiso omtapotachonho yaw roro rma, Cemetanmesom mîkyam, kachonho yaw roro rma.

8 Kporin komo pona xa een̂ataw kîwya so kukurunpes okre Noro. Tooto komo pona enîn̂e me mak kexitaw reha yukurumra mak taxe okwe.

9 Kporin komo pona xa cenpore nasî. Kantoman̂e komo pona cenpore rma re nasî Kporin komo xawyaka mak.

10 Mîk hak rowon pono komo ahnoro owamcetken̂e owaparî me. Kporin komo yosotî pona enîn̂e me oyexirî ke n̂examro pen war̂mesî.

11 Mehxarpa mokyatken̂e owece, owamcetken̂e thakwa okwe. Wara rma Kporin komo yosotî pona enîn̂e me oyexirî ke war̂mesî.

12 Swaruwaru wara ro mak mokyatken̂e mer̂pono pînî ro mak okwe. Yohno tko waihyatken̂e cekyekyem n̂ecakyasî yohno ero wara. Kporin komo yosotî pona enîn̂e me oyexirî ke n̂examro pen war̂mesî.

13 Ciki ketken̂e opoko kar̂pe ro mak oyar̂machome. Oyakronomekn̂e rma tko Kporin komo.

14 Okariton̂e rma Mîk Kporin komo. Noro poko marha kewanomesî. Okurunpen̂e me tak nas okre oroto.

15 Okre okre, kacho n̂esencesî kir̂wan komo mîn yaw, kukurunpet ham okre, kacho ha. Kar̂pe xa cehtopo tak n̂enpoi Kporin komo. Tamorî ke rma ar̂mano n̂iire kaari n̂ixan ke.

16 Cekaiporesom xa mîn okre Kporin komo yamorî kaari n̂ixan. N̂ekaricesî xa Noro tamorî ke kaari ke.

17 Waipîra rma wasî, kar̂pe rma wasî. Ero wara wasî Kporin komo n̂iritho yekatîmn̂e me oyehtome.

18 Opanarekn̂e rma tko Kporin komo, cerewre ro mak oko. Waihpe mak noro, kahra tko xakn̂e opoko.

19 Waaca metatan ahrunkacoko ohyaka kir̂wan komo yewomtopo ro. Ero yaro kewomyasî, Kir̂wan̂he mai ham okre, kachome tak Kporin komo poko.

20 Kporin komo yewton metatan on. On yaro mokyaxe amn̂e kir̂wan komo Noro yewton pona roro.

21 On wara wîîkesî Kaan ya, Omtapotarî meyukyakn̂e okre Apa. Ow tak mukurunpekn̂e. Ero ke, Kir̂wan̂he mai ham okre, wîîkesî yîwya.

22 On wara xatken̂e mîîmo ciin̂e komo, toopu n̂iir̂atken̂e mîîmo wacan me. Anarî toopu tko tî poxumra n̂een̂atken̂e, waaca me ciisom mera tî. Ero yinhîrî tko ero toopu rma tak xakn̂e waaca me ciisom me, metata peyecepu me rma.

23 Kporin komo rma ero wa n̂iir̂akn̂e. Keserepokacho me xa nasî yin̂irithîrî.

24 Kporin komo n̂iritho on kaamo. Ero ke on po tahwotacerî, tahwore xa cehcerî.

25 On wara wîîkes hara Kaan ya, Apa, amna akronomakî oroto. Cemyawno poko ehn̂an me amna cirko oroto rma.

26 Kaan nakronomarî me xa nasî Kporin komo yanme tmohsom. Kporin komo mîn yaw amna nasî amna yakronomacho poko tîmtapotachome Noro yakro.

27 Kaan xa Mîk Kporin komo. Noro xa kîkatparen̂e komo me nasî. Kaan ya tîmsom yimicoko Kporin komo ya tîmsom yakn̂itopo poko, meretîrî poko xa. Ruupu ke yimicoko.

28 On wara wîîkesî xa hara Kaan ya, Kaan Amoro, ponaro oyehtopo. Kir̂wan̂he xa mai ham okre, wîîkes awya. Kaan Amoro Apa, ponaro oyehtopo. Kyopono me xa awehtopo poko kîmtapowasî.

29 Kir̂wan̂he mai ham okre, kacoko ro mak Kporin komo ya. Kir̂wan Mîk ha, miya roro kakronoman̂e ro. Noro yipu Mîk okre Kporin komo.