Kakronoman̂e Pînî Ro Mak Mîn Mîk Hak Warai Me Enporixaputho. Kporin Komo Xa Nasî Kakronoman̂e Me
115
Apa kah yawno, on wara wîîkes awya, Kir̂wanî ro xa mîkyam, kacho me cexi xera ro mak nas amna. Pîra ro mak. Amoro mak ero wa kacho me esko. Ero wa awexi xe nas amna, amna pînîn yaw awexirî ke, yaarono me amtapotarî ke marha.2 Ahce kacho on wara ketu mîk hak rowon pono komo, Ahto nai hara Kaan, ponaro n̂examro yehtopo? ketu?
3 Kah yaw tko nasî Kaan, ponaro kehtopo komo. Tanme ro mak cin̂irirî nîhtînoyasî Noro.
4 Mîk hak rowon pono komo reha naxe cixaputho ponaro mak. Prata mak n̂iir̂axe ponaro cehtopo komo me, ooru xa anarimaw. Tooto n̂iritho mak mîn kica.
5 On wara nasî yîn̂enporithîrî komo, tîmtake rma re nasî, yîmtapotan me mak ha tko kica. Cewke marha re nasî, enîn̂e pîn me thakwa okwe.
6 Tpanake marha re nasî, entan̂e pîn me ha tko okwe. Cewnake marha re nasî, esuntopo pîn ke ha tko.
7 Tamoke rma re nasî, ahce na yahsîtopo pîn me ha tko. Tîhtake marha re nasî, cetaritopo pîn me ha tko okwe. Cexeke marha re nasî, yîmtapotan me ro mak ha tko. Ero wa nasî yînporethîrî kom okwe.
8 Enporin̂enhîrî komo naxe tîn̂enporithîrî komo wara rma. Ero wa xa marha naxe ero yipu pona enîn̂e kom ahnoro.
9 Ero ke Ixaw Yana komo, on wara wîîkes awya so, Kporin komo pona mak encoko. Noro xa Mîk Ixaw Yana komo yakronoman̂e, ecen̂an komo marha.
10 Araw yepamtho komo, awya so wîîkes hara, Kporin komo pona mak encoko. Noro xa Mîk Araw yepamtho komo yakronoman̂e, ecen̂an komo marha.
11 Kporin komo poko tweeno komo, awya so wîîkes hara, Kporin komo pona mak xa encoko, wîîkesî. Noro xa Mîk noro yipu komo yakronoman̂e ro, ecen̂an komo marha.
12 Kponaro so rma nasî Kporin komo. Kakronomexe so rma amn̂e. Ixaw Yana komo nakronomesî, Araw yepamtho komo marha nakronomesî.
13 Ahnoro Kporin komo ponarono komo nakronomesî. Emyawnomnî komo nakronomesî, cemyawnoyem komo marha. Ero warai komo nakronomesî Kporin komo amn̂e.
14 Awepamnopu xe so wasî Kporin komo ya, amxîkrî komo marha epamnopu xe wasî yîwya. Miya roro awepamnopu xe so wasî.
15 Awakronoma xe so wasî Kporin komo ya. Kaapu yakîhton̂enho Mîk, roowo yakîhton̂enho marha. Noro yipu ya awakronoma xe so wasî.
16 Kaapu nasî Kporin komo yeken me. Yaake nasî kaapu komo, ahnoro rma nasî Noro yeken me. Roowo reha nîmyakn̂e Noro tooto komo ya.
17 On wara marha wîîkesî, Kporin komo poko ahwotara ro mak naxe waihxa pen komo. Yuhnaka mak cexe tîtken̂e cehso ro mak okwe.
18 Kîwyam reha tahwowaxe Kporin komo poko. Oroto tahwowaxe, pahxaro marha tahwowaxe miya roro yîtîhkan me ro mak. Kporin komo poko ahwotacoko. Ero wa ehcoko.