1-2 On wara wîîkes awya so, pahxa Ixaw Yana komo mokyatken̂e Exitu poi. Xako yepamtho komo mîkyam mokyatken̂e anarî yaro tîmtapotaxmu komo chewnonho. Mokuche so tak Xuta komo rowon tak xakn̂e Kaan yeken me. Ixaw Yana komo xatken̂e Noro maywen me hara.

3 N̂examro yenîche takî tî n̂emahciyakn̂e tuuna imo. Xotaw Yepu marha tî n̂ehcoyotacekn̂e.

4 Ero yimaw îîpî mko nahronakn̂e kahn̂eru wara. Matîwînî mko nahronakn̂e oper̂a xîkrî wara.

5-6 Tuuna imo, awya wîîkesî, ahce wa mîxakn̂e hara? Ahce yanme memahciyakn̂e hara? Xotaw Yepu, awya wîîkes hara, ahce yanme mehcoyotacekn̂e? Îîpî mko awya so wîîkes hara, ahce kacho mahronakn̂e kahn̂eru wara? Matîwînî mko, awya so wîîkes hara, ahce kacho mahronakn̂e oper̂a xîkrî wara?

7 Roowo, awya wîîkes hara, esewsîko tak iito exirî ke Kporin komo, ponaro Xako yehtopo ha.

8 On wara n̂iir̂akn̂e Kporin komo ero yimaw, toopunhîrî n̂iir̂akn̂e n̂ikitho me. Saama n̂iir̂akn̂e tuuna pîtho me. Ero wa ciin̂enhîrî exirî ke iito esewsîko. Ero wa esko amoro roowo.