On wara wîîkes awya so, Kporin komo poko ahwotacoko. Kporin komo yanton komo amyamro, awya so wîîkesî, ahwotacoko Noro poko. Osotî poko xa ahwotacoko.

2 Tahwotapore nasî Kporin komo yosotî poko oroto. Miya roro tahwotapore nasî ero poko yîtîhkan me ro mak.

3 Kporin komo yosotî poko xa tahwotapore nasî kaamo yepatakacho n̂ixa ro, kaamo yemicitopo pona roro.

4 Kayaritomo me nasî Kporin komo roowo pono kayaritomon komo yopo, miyan komo yopo rma. Meye xa nasî kir̂wanî ro me Noro yehtopo kaapu mkai.

5 Onoke ma re nai Kporin komo warai, ponaro kehtopo komo warai ha? Kah yawno Mîk ha.

6 Katuhwasî rma tko Noro kaapu yawno komo yentome, roowo pono komo yentome marha.

7 Yupurantamnî komo yanîmn̂e Mîkî, roowo sororono chewnonho kom ha. Cesemetanmesom komo marha nanîmyasî yukpurukpuruntho chewnonho.

8 Anmîche antomano rin̂e komo cheka tak n̂eremanmekyas hara, poyino yantoman̂e komo cheka rma. Ero wa nasî Kporin komo yupurantamnî komo poko.

9 On wara marha nasî wooxam komo poko hara, yîmxîkînînhîrî komo poko, noro yipu komo n̂ekenmesî tak yîmînî ro komo yaka. Tahwore tak n̂iir̂asî rikomo komo yon me ha. Taa, Kporin komo poko ahwotacoko. Ero wa ehcoko.