On wara wîîkes awya so, Kporin komo poko ahwotacoko. Tawake xa taxe Noro poko twerî xa kexitaw. Tawake marha taxe tpoxwe xa yîmtapotarî yentan̂e me kexitaw so, kpanatanmetopo komo yentan̂e me ha. Ero wa kexitaw so tawake xa taxe okre.

2 Kar̂pe naxe noro yipu mumuru komo. Roowo pono komo ya cekaiporesom me naxe. Kaan nakronomarî me naxe kir̂wan yepamtho komo.

3 Puranta nasî yîhyaw so mer̂pora, emyawno komo pen marha. Kir̂wan̂he ehtoponhîrî komo nasî ehcamnopîn me ro mak.

4 Anarimaw so awarpanawno wara na natu kir̂wan komo. Ero yinhîrî tko enmayatawno wara naxe hara. Kir̂wan̂he naxe noro yipu komo, kîpînîn yaw so ha. Takîhso marha naxe.

5 Kir̂wan komo naxe wakreno rin̂e me. Tupurantan poi tîmn̂e me naxe yiixe cehsom komo yemyaka, amemra tîmn̂e me ha. Takîhso cemyawno komo ciin̂e me marha naxe.

6 Noro yipu komo naxe ahwokan me ro mak. Kir̂wan komo yehtoponho nasî ehcamnopîn me ro mak.

7 Erasîn me ro mak naxe noro yipu komo tahwokacho yentatopo pona. Ahwokatîkan me ro mak nasî Kporin komo pona enîrî ke.

8 Cecehtoso nasî noro yipu komo ropotarî. Erasîn me ro mak naxe. Ero wa naxe tîîxatî pîn komo yar̂matîkacho mîtwo.

9 Cemyawno yîraconkan̂e me naxe mîk hak ya tîmsom me. Emyawnomnî komo wakren̂e me naxe. Ero ke kir̂wan me naxe eroromero. Takîhsom me naxe anarî komo yopo.

10 Kica, kexe mak kicicme cehsom komo noro yipu komo yeen̂ataw, tîyopono me ciitopo komo yeen̂ataw. On wara naxe kicicitho komo, nîyokrececenaxe, nakporoyaxe marha. Ahce wa na ciino ciri xe cexitaw so cehn̂axmu me naxe ero poko. Ero wa naxe kicicitho kom okwe.