On wara wîîkes awya so, Kporin komo poko ahwotacoko. Kir̂wan̂he xa mai ham okre, wîîkesî yîwya ow ha. Yaaro xa ero wa wîîkesî. Kir̂wan komo yesenmekîche ero wa wîîkesî yîn̂entarî komo me. Ahnoro kpoyino komo yesenmekîche hara ero wara xa marha wîîkesî yîn̂entarî komo me.

2 Keserepokacho xa mîn Kporin komo ya ciino ritopo. Ero poko n̂esehtînoyaxe ahnoro tpoxwe entan̂e komo.

3 Kir̂wan̂he ro mak nasî yin̂irithîrî, kir̂wan̂he xa n̂esenpes okre. Kir̂wanî ro mak Mîk ha miya roro kicicme exihnî me ro mak.

4 Tpoko keserepokacho mko n̂enpoi ero ponaro n̂he tak kehtome so. Kakronoman̂e ro Mîk Kporin komo, kîpînîn yawno ro marha.

5 Tpoko tweeno komo nahman̂e Mîk. Tîmtapotachonhîrî ponarono marha Mîk, Kwakrexe so amn̂e, kacho ponarono.

6 Kar̂pe cehtopo n̂enpekn̂e tîyanan komo ya cirihnî cirirî ke. Mîk hak maywen komo rowontho nîmyakn̂e yîwya so eken komo me.

7 Ahce wa na ciino riyataw tîwya yaaro rma wa ciino n̂iir̂asî. Etîme re xa en̂ekano rin̂e Mîk ha. Yaarono marha mîn yîmtapotarî, kpanatanmetopo komo.

8 Eroromerono marha mîn yin̂irithîrî. Yaaro xa n̂iir̂asî ahce na ciir̂ataw. Kir̂wanhe mak n̂iir̂asî.

9 Tîyanan komo nowyakn̂e kicicme cehsom komo yantonînho. Eroromerono me tîyanan komo panatanmekyakn̂e. Eroromerono me marha nîmtapowakn̂e n̂examro yakronomacho poko. Kir̂wanî ro mak Noro yosotî. Twerî makî tko cetacpore nasî.

10 Takîhso kehtopo komo yihcitopo mîn twerî kehtopo komo Kporin komo poko. Yuhnari yîhtînon̂e me naxe yîmtapotarî yewetîn̂e komo, kpanatanmetopo yewetîn̂e kom ha. Kir̂wan̂he xa mai ham okre, kacho n̂esencesî miya roro eroromerono me. Ero wa n̂esencesî.