Kesekatîmyasî tan an̂enîrî komo me. Kporin komo xe wasî omtapotarî yentarî ke yîwya. Opînîn yaw cma re masî, kacho n̂encekn̂e omtapotarî.

2 N̂epanakor̂mekn̂e owece omtapotarî yentachome. Ero ke Noro yakro kîmtapowasî miya roro owaitopo pona roro.

3 On wara ka wîxakn̂e, owaitopo oyamxikye thakwa re ruupu wara. Kerewakn̂e ro mak oko roowo yatumnawno komo wara rma. Kesemetanmekyakn̂e xa, kahwokekn̂e marha okwe.

4 Ero yimaw kîmtapowakn̂e Kporin komo yakro. Apa, ayanan mak ow ha. Ero ke cma re oropotarî mukurunpesî, wîîkekn̂e.

5 Kakronoman̂e ro mak Mîk Kporin komo, kir̂wanî ro Mîk ha. Kîpînîn yawno marha Mîkî, ponaro kehtopo kom ha.

6 Ehcamhokan komo yecehton̂e Mîk Kaan. Oyesemetanmekyataw xa okurunpekn̂e ow ha.

7 On wara wîîkes owya rma, Cerepore xa hara esko. Owakrei xa Kporin komo okre, wîîkesî owya rma.

8-9 Ow mukurunpekn̂e Apa waipîra oyehtome. Ow mîspeponkekn̂e marha, epîrkan me marha ow maar̂akn̂e. Ero wa ow miir̂akn̂e amîtwo roro oyetaritome waipîn komo chew, wîîkesî Kaan ya.

10 Noro pona xa ween̂akn̂e Kaan pona. Ero wara oyexirî ke on wara wîîkai, Emetanmexapu xa thakwa ow okwe, wîîkai.

11 On wara wîxakn̂e anarî kaamo po, Ponan̂e rma kîmtapotai tooto komo poko. On wara wîîkai, Cemarontaxmu mak mîkyam tooto komo ahnoro okwe, wîîkai.

12-13 Ahce ke re Kporin komo ya oyakronomachonho wepanîya? Noro n̂iritho wanîmyas owokru warai. Oyakronomacho mîn owokru warai. On wara marha wîîkesî yîwya, Ayanan xa ow ha. Ero ke ow yukurunpeko, wîîkesî. Ero wa oyakronomachonho wepanîyasî.

14 Yîwya tîmsom marha wîmyasî omtapotachonho yaw roro rma, Ero men wîmyas amn̂e awya, kachonho yaw roro ha. Ero yipou wîmyasî yîwya oroto iyanan komo n̂enîrî me rma.

15 Okwe, kesî Kporin komo tînakir̂wamathîrî pen komo waihyataw.

16 Apa, awanton xa ow ha, awantonî mrerî marha ow, yememe mrerî. On wara tko ka wîxakn̂e, cimiso thakwa ka wîxakn̂e kuripara ke. Omicitho tko mîmhokekn̂e okre.

17 Ero ke, Kir̂wan̂he xa mai ham, kachome owya oyokutho pun wakn̂iyasî awya tîmsom me. Ayanan ow ha, ero ke owî cma re makronomesî, wîîkesî marha.

18 Ero yipu men wîmyas awya amn̂e, wîîkekn̂e Kporin komo ya. Ero ke ero wa kachonho yaw roro tak wîmyasî rma yîwya Noro yanan komo wero ro rma.

19 Ero yipu wîmyasî yîwya Kporin komo mîn roron po. Xerusaren amoro, aapo rma ero yipu wîmyasî. On wara wîîkesî xa hara, Kir̂wan̂he xa may ham okre, kacoko Kporin komo ya, wîîkesî. Ero wa mak wîîkesî.