Waano Yaan̂e N̂enîrî On, Tapi Wanorî.

1 Apa kah yawno, on wara wîîkes awya, apoko tahwotaxmu ow. Ero ke tîtken̂e exihra cma re masî.

2 Kicicme cehsom komo nîmtapowaxe opoko. Tohnaw tîmtapotaxmu komo mîkyam kica. Cemaronwaxe mak opoko kica.

3 Ooxatî pîn me ro mak nîmtapowaxe. Omamcexe mak okwe. Opoko n̂etar̂mexe tohnaw ro mak.

4 Yiixatî komo me rma re was owî reha. Ero wa oyehtopo tko n̂epanîyaxe kicicitho me oyekantopo ke hara kica. Awakro tîmtapotaxmu ro tko ow Apa.

5 N̂examro wakren̂e cma re ow. Ero wa oyehtoponho n̂epanîyaxe oyemetanmecho ke hara okwe. N̂examro xe was owî reha. Ero wa oyehtopo n̂epan̂iyaxe ooxera ro mak cehtopo ke okwe.

6 Ero ke noro yen̂ekan̂e tak enpoko kicicitho xa marha. Satanas marha n̂ececetope panaka rma kaari n̂ixa.

7 Noro yen̂eketaw, Kicicme cehsom amoro ham, kape tak en̂ekano rin̂e noro poko. Kicicme ehtopo me rma n̂expe awakro yîmtapotacho meero.

8 Asakî mak cirko cimn̂ipu noro yenmacho tan roowo po. Ero yinhîrî anarî tak n̂expe enîno rin̂e me hara noro pen yekenho yaka.

9 Yîmîhnî me tak n̂ehcowpe yîmxîkîthîrî komo. Iin̂omnî me marha tak n̂expe yihcinhîrî.

10 Onahrî n̂he, kan̂e me marha n̂ehcowpe yîmxîkîthîrî komo tooto komo ya. Mooxe twaimamsom me mak n̂ehcowpe ero poko, Onahrî n̂he, kacho poko. Anarimaw so ewtotho po rma ero wa kacowpe.

11 Yîn̂epethîkathîrî tak mokope emyawnonhîrî yahsîso hara ahnoro. Yin̂irithîrî tak naacowpe anarî yana komo, ahce na yin̂irithîrî ha.

12 Noro wakren̂e exihra ro mak n̂expe. Yîmxîkîthîrî komo pînîn yawno exihra marha n̂expe.

13 Epamthîrî komo tak n̂ehcamnocowpe. N̂examro yosotî yentan̂e pîn me cirko ponan me esepamkaxapu komo.

14 Kicicme noro porin pen komo yehtoponho ponaro ro esko Amoro Apa miya roro. Kicicme yînocwanînhîrî pen yehtoponho marha n̂expe yîhcamnopîn me.

15 Kicicme n̂examro yehtoponho n̂expe Kporin komo wero ro miya roro, yîhcamnopîn me ro mak. Ero wa exirî ke so n̂examro yosotî poko twen̂ekarî mak cirko roowo poko hakno komo.

16 Ero wa noro pen cirko Apa akronomano ritopo ponarora ro mak exirî ke kica. On wara xakn̂e noro kica, yupurantamnî komo n̂emetanmekyakn̂e ro mak kica. Cesemetanmesom komo rma n̂emetanmekyakn̂e. Ahwokaxapu komo marha waihka xe mak xakn̂e okwe.

17 Tpoxwe xakn̂e eremkano ritopo yîwya. Ero ke erem yanme rma tak n̂etwîrîmape noro hara. Awakronoma xe wasî Kaan ya, kacho poxumra xakn̂e yîwya. Ero ke anakronomarî mera ro mak n̂expe noro hara.

18 Erem yamrun̂e wara xakn̂e tponon wara. Ero ke ero tak tompe yupun chere tuuna wara, iyochîrî yaka roro tompe katî wara.

19 Ero ke noro ponon wara rma kr̂a tak n̂expe erem, yupun pore amruxapu wara. Aan̂apotun wara marha n̂expe yupun poreno wara.

20 Ero warai ke oponanîmton̂e komo n̂epemape Kporin komo. Kicicme tîmtapotaxmu komo opoko ero warai ke n̂epemape.

21 On wara tko opoko esko Amoro Apa, ow akronomakî ayanan me oyexirî ke. Tpoxwem mîn kîpînîn yaw awehtopo. Ero ke rma ow yukurunpeko.

22 Cesemetanmesom ow, cesemer̂wesom ha. Oropotarî n̂erewasî paraxkaxapu wara.

23 Cehcamnosom mak ow. On wara nasî ahce na yekatî kaamo n̂enporî, n̂esehyatkawnonkes tak kokon̂i xa ehtîkache, n̂ehcamnoyasî marha. Ero wa xa marha kehcamnoyas ow hara. Makaka yahsîche tar̂mexe roowo pona, ero wa oyar̂mexe ooxatî pîn komo.

24 Oyecetora nasî oyosokmuru eseresmara oyexirî ke thakwa. Takporoso xa was okwe. Ero ke kar̂pera wasî.

25 Ero wa oyexirî ke owîrîyakexe ooxatî pîn kom okwe. Oyen̂ataw n̂epanamexe mak owîrîyakacho me.

26 Apa, ponaro oyehtopo Amoro. Ow akronomakî. Ow yukurunpeko kîpînîn yawno me awexirî ke.

27 Ooxatî pîn komo wero ro rma ow akronomakî kar̂pe awehtopo yentome ero wa oritopo ke. Ero wa esenpoko yîwya so, Noro nakronome ham Kporin komo, kachome tak yîwya so.

28 Oyeremkacowpe rma re n̂examro. Amoro xa tko ow akronomakî. Piiri awomuche so owece tmohtome so n̂ehn̂acowpe mak. Owî reha cirko tahwotaxmu me.

29 Tîwîrîyakaxmu me mak tak n̂ehcowpe oyen̂ekan̂enho komo. Cehn̂acho komo yaw tak n̂ehcowpe poono yawno wara rma.

30 Ero wa ciino riche awya, owî reha kîmtapowasî kir̂wan̂he xa Kporin komo yehtopo poko. Miya xe xa kîmtapowasî ero poko. Kahwowasî marha Noro poko mer̂pono pîn komo n̂entarî me, esenmexapu komo n̂entarî me ha.

31 Ero wa xa nasî Kporin komo amn̂e, n̂ecececesî tak cesemetanmesom panaw kaari n̂ixa akronomachome so. Iito nasî yukurunpen̂e me, en̂ekan̂e komo yehn̂anmekn̂e me ha. Ero wa nasî Kporin komo cesemetanmesom komo poko.