108
Tapi Wanorî On. Anarî Yana Komo Yantoman̂e Me Rma Nasî Kporin Komo
1 Apa kah yawno, on wara wîîkes awya, aponaro mak wasî etowîn me ro mak. Ero ke kewanomesî tak. Tahwore ro mak waano waar̂asî.
2 Apakakî amoro ahpa, sawter̂u marha, tîyorkaxmu kom ha. Kewanomesî tak enmarî yakro ro.
3 Anarî yana komo chew oyexitaw kir̂wan̂he awehtopo poko kîmtapowas Apa. Apoko kewanomesî marha mîk hak rowon pono komo n̂entarî me.
4 Porin me ro mak nas amna xe xa awehtopo. Kaapu komo yopono me ro mak nasî. Amtapotachonhîrî yaw roro ciino rin̂e marha Amoro. Porin me marha nasî ero wa awehtopo, kaapu smun yaka rorono wara.
5 Kyopono ro me xa tak esenpoko Apa, kah yawno komo yopono me. Kir̂wanî ro me awehtopo marha enpoko roowo pono komo yopono me.
6 Ero wa esenpoko yiixe awehtopo komo yukurunpetome. Ow akronomakî awamorî ke kaari ke. Omtapotarî marha entakî.
7 Tooto komo poko nîmtapowakn̂e Kaan kir̂wanî ro me cexirî ke. On wara kekn̂e, Kahwowasî oroto. Siken wokpamesî, wokpamaxapu tak wekamyasî. Sukoci yîpîn yamrinawno wukuknomesî.
8 Oyanton komo rma mîkyam Xireace pono komo, oyanton marha mîkyam hara Manases yepamtho komo. Oxapikan warai mîkyam hara Eprain komo, kuripara warai. Oyamoyin warai mîkyam hara Xuta komo, kayaritomo yamoyin warai ha.
9 Obasian warai mîkyam hara Moabe komo, poono korokacho warai. Ohtarî war̂mesî Eton pono komo cheka. Yahya wîîkesî tak Piristew komo waihkache owya.
10 Onoke xa oyar̂a ewto imo pona twacayem pona? Onoke oyar̂a Eton pona?
11 Amoro rma na amna maar̂a iina Apa. Amna tko mahsîpînkekn̂e okwe. Amna sowtatun yakro tohra mîxakn̂e okwe etar̂maxi cetaw so.
12 Wara rma oroto cma re amna makronomes hara cesemetanmekyataw. Kakronomara rma nasî tooto komo ya kakronomacho reha.
13 Taa, on wara wîîkes awya so hara oyakno komo, kakro so exirî ke Kaan kîîxatî pîn komo yopono me taxe. Noro xa n̂examro pen waihkesî knapikrî komo me. Ero wa taxe Noro yanme mak.