On wara wîîkes awya so, Kir̂wan Mîk Kporin komo, miya roro kakronoman̂e kom okre. Ero ke on wara kapore nasî yîwya, Kir̂wan̂he xa mai ham okre, kapore nasî yîwya.

2 Kporin komo nowtho komo amyamro, awya so wîîkesî, aaxatî pîn komo n̂emetanmekîtho komo amyamro awowyatken̂e so. Ero ke awowtoponhîrî komo yekatîmn̂e me roro ehcoko.

3 Mehxarpa awekyatken̂e so mîn hak roowo poi. Resce n̂ixa awekyatken̂e so, oesce n̂ixa marha, nohce n̂ixa marha, suu n̂ixa marha. Ero wa so awekyatken̂e so.

4 On wara xatken̂e anarî komo, n̂examro pen waimamyatken̂e mak axawa imo pore pohnîntari ro mak okwe. Ewto yenîhra ro mak xatken̂e okwe cesekenmacho komo.

5 Nîromanatken̂e thakwa okwe, twokru komo xe marha xatken̂e. Ero ke nahwoketîketken̂e ro mak okwe.

6 Ero ke Kporin komo yakro tak nîmtapowatken̂e cesemetanmekyataw so. Ero ke Noro tak n̂examro nakronomekn̂e esemetanmekîra tak ehtome so.

7 Esama yaw tak n̂examro naar̂akn̂e patawno yaw tak okre. Ewto pona roro naar̂akn̂e iina tak esekenmachome so.

8 Ero ke, Kir̂wan̂he xa mai ham okre, ka xe ro mak wasî noro yipu komo Kporin komo ya. Kakronoman̂e ro mak Amoro ham okre Apa, ka xe so marha wasî yîwya so.

9 Twokru xatî warai komo yerepotanmekn̂e Mîkî Kaan. Kir̂wan̂he cehtopo poko tîroman̂em komo n̂erepotanmekyasî Noro kir̂wan̂he ehtopo ke rma. Noro yipu Mîk Kporin komo.

10 Taa, anarî komo reha xatken̂e ceremaxi awarpanaw. Twaparî komo pona tî n̂eraswatken̂e okwe. Kahrutopo yawno thakwa mîkyam xatken̂e okwe. Kuripara ke tîhraknumiso thakwa xatken̂e okwe.

11 Ero wa xatken̂e Kaanî mtapotarî yanwekrî ke. Kyopono ro ya takîhretopo komo rma tî re n̂encetken̂e. Ero pîntho wara ro makî tko tî n̂encetken̂e okwe.

12 Ero ke n̂examro tak nahsîpekn̂e Kporin komo apickan̂e komo ya, iyopo so apickan̂e komo ya okwe. Ero wa etapickarî ke so n̂epîrketken̂e mak tak okwe. Akronoman̂e komo exihra ro mak xakn̂e okwe.

13 Ero ke Kporin komo yakro tak nîmtapowatken̂e cesemetanmekyataw so. Ero ke n̂examro tak nowyakn̂e Noro esemetanmexapunhîrî komo.

14 Awarpanai tak naar̂akn̂e. Twaihtopo yaro xatken̂e awarpan warai yaw. Ero yawnonho tak n̂examro nukurunpekn̂e. Kuripara pen tak cor̂or̂omekn̂e yimicithîrî komo.

15 Ero ke, Kir̂wan̂he xa mai ham okre, ka xe ro mak wasî noro yipu komo Kporin komo ya. Kakronoman̂e ro Amoro ham okre Apa, ka xe marha wasî yîwya so.

16 Kahrutopo metatan macakan̂e Mîk Kporin komo bronse ciixapu macakan̂e rma. Kuripara ciixapu yîhkoton̂e marha Mîkî metata yecehton̂enho rma. Noro yipu Mîkî Kporin komo.

17 Taa, anarî komo xatken̂e akpîra ro mak okwe. Kporin komo nanwekyatken̂e kica. Ero ke thakwa n̂esemetanmekyatken̂e kicicme cexirî ke so mak okwe.

18 Poxumra tak tînahrî komo n̂een̂atken̂e okwe. Miya xe ro mak n̂ehtîketken̂e twaihîrî komo yaro okwe.

19 Ero yimaw tak Kporin komo yakro nîmtapowatken̂e cesemetanmekyataw so. Ero ke nowyakn̂e tak Noro esemetanmexapunhîrî.

20 Tîmtapotarî ke tak n̂examro karihcekn̂e. Kar̂pe tak n̂examro n̂iir̂akn̂e okre waiporononhîrî.

21 Ero ke, Kir̂wan̂he xa mai ham okre, ka xe ro mak wasî noro yipu komo Kporin komo ya. Kakronoman̂e ro Amoro ham okre Apa, ka xe marha wasî yîwya so.

22 Kaan ya tîmsom tak nîmcowpe, Kir̂wan̂he xa mai ham okre, kacho ha. Twakretoponhîrî komo marha n̂ekatîmcowpe waano ke. Tahwore n̂ewanomacowpe. Ero wa n̂ehcowpe.

23 Taa, anarî komo reha cexe tuuna imo kwaw, kanawa imo yaw. Twarawantaxmu mîkyam tuuna imo yecihtawno komo yakro.

24 Tîcetaw so tak Kporin komo n̂iritho n̂een̂axe. Ceserepokacho xa n̂een̂axe yin̂irithîrî komo, weyun kwawno kom ha.

25 Anarimaw so ocowo imo tak mokyasî Kporin komo mtapotarî yanme. Yamarataka imo nanîmyasî kopi.

26 Kah yaka rorono wara n̂etanîmyasî kanawa pen. Yuhnaka tak nîhces hara okwe yamarataka yotaw so. Twaihîrî komo yaro ro mak naxe kanawa yawno komo okwe. Ero ke nahwokexe ro mak okwe.

27 Epîrkaporo mak n̂etar̂axe wenîmxapu wara kica. Ahce wa tak tatu kopi? kexe mak okwe.

28 Ero yimaw tak Kporin komo yakro nîmtapowaxe cesemetanmekyataw so mak. Ero ke tak n̂examro nakronomesî Noro enor̂porononhîrî komo.

29 Ocowo imo tak n̂îtîtîresî. Yamarataka exihra tak nasî.

30 Ero ke tawake tak naxe kanawa yawno komo tîtpe exirî ke. N̂examro tak naar̂asî Kporin komo to xe ehtopo komo pona roro.

31 Ero ke, Kir̂wan̂he xa mai ham okre, ka xe ro mak wasî noro yipu komo Kporin komo ya. Kakronoman̂e ro Amoro ham okre Apa, ka xe so marha wasî yîwya so.

32 Takîhsom me xa Noro yehtopo n̂ekatîmcowpe tpoyino komo ya esenmekîche so. Kir̂wan̂he ehtopo marha n̂ekatîmcowpe poritomo komo ya n̂examro yesenmekyataw hara.

33 Anarimaw on wara n̂iir̂asî Kporin komo, tuuna yepunhîrî tak napainokesî axawa me cehso ro okwe. Tuuna pîthonhîrî n̂iir̂asî turpem me hara okwe.

34 Naatî yewtî mexanînhîrî n̂iir̂asî yîmîtî ken̂arî me hara okwe. Ero wa roowo n̂iir̂asî kicicme iitono komo yehtopo yanme.

35 Anarimaw hara axawanhîrî tak n̂iir̂asî n̂ikitho ken̂arî me hara. Turpem marha n̂iir̂asî tuuna pîtho ken̂arî me hara.

36 Iina tak tîroman̂emînhîrî komo naar̂asî ekenmachome so. Ewto imo tak n̂iir̂axe ceken komo me.

37 Tmararîn komo n̂iir̂axe. Uupa yepu marha n̂iir̂axe tînatîrî komo. Ceperke xa tak nasî yînatîrî komo okre.

38 Mîn hak ke n̂examro wakres okre Kporin komo. Ero ke n̂examro n̂epamyaxe mer̂pora cehso ro tak. Iyoh komo marha n̂iir̂asî waipîra so.

39 Ero yinhîrî asak mak tak n̂ehtîkexe hara okwe iitono komo. Eper̂a yaw tak n̂ehtîkexe kica. Waparî komo mokyaxe emetanmeso. Tahwokacho komo chew mak naxe okwe.

40 Akpîntho me kenpon̂e Mîk Kporin komo. Antomano rin̂e komo rma ero wa n̂enpesî anarimaw. N̂examro pen n̂iir̂asî twaimamsom me tak okwe, pohnîntari ro mak tîtosom me naxe esamanari so mak okwe.

41 Anarimaw hara cesemetanmesom komo nakronomes hara. Îh pono wara n̂iir̂asî, mooxe esemetanmetopo chewra ro mak. N̂examro tak n̂epamnoyas hara oper̂a wara.

42 Ero wa noro yipu komo yakronomacho n̂een̂axe kir̂wan komo. Nahwowaxe ero yipu poko. Nîtîtmamyaxe makî reha kicicitho komo reha.

43 Takîhsom komo reha ero wa kakronomacho komo n̂een̂axe. Kîîxatî ro me Kporin komo ponaro naxe. Ero wa naxe.