On wara wîîkes awya so, Kporin komo poko ahwotacoko. Kir̂wan̂he xa mai ham Apa, kacoko yîwya kir̂wan̂he xa exirî ke. Kwakren̂e me nasî Noro miya roro yîtîhkan me ro mak.

2 Onoke ma re n̂ekatîmtîke Kporin komo yekaritotoponho? Onoke ma re n̂ekatîmtîke kir̂wan̂he ehtopo?

3 Tawake xa naxe etîme re ciino rin̂e komo, kir̂wan̂he roro ciino rin̂e kom ha.

4 On wara wîîkesî Kaan ya, Apa, ayanan komo yakronoman̂e ro Amoro. Ero ke ero wa xa marha cma re ow makronomes hara. Yukurunpeno rin̂e ro Amoro. Ero ke ow meero marha cma re mukurunpesî.

5 Ero wa cma re ow miir̂asî, Tînmen̂ekathîrî yakronoman̂e Mîk ham, kachome owya apoko. Ero wa oyakronometaw awya kahwowasî amaywen komo yakro. Apoko ahwowataw so amxîkrî komo ow marha kahwowasî akro so.

6 On wara tko xakn̂e amna Apa, Kicicme amna xakn̂e amna porin pen wara rma kica. An̂enîrî mexan me exihra amna xakn̂e kica. Kir̂wan̂he exihra ro mak amna xakn̂e kica.

7 Pahxa amna porin pen komo exitaw Exitu po cirihnî cma tî re miir̂akn̂e wero ro so. Ero ponarora tko tî xatken̂e kica. Emapona roro tî n̂examro pen makronomekn̂e. Takronomachonhîrî komo ponarora tko tî xatken̂e kica. Tuuna imo yecihtaw tî awanwekyatken̂e kica, Cucurem Yewku yecihtaw ha. Ero wara xatken̂e kica, wîîkesî Kaan ya.

8 Wara rma n̂examro tî nukurunpekn̂e rma, Kaan yanan komo mîkyam, kacho me exirî ke so. Kar̂pe cehtopo yenpotome marha tî nukurunpekn̂e.

9 Tuuna pen tî n̂eeyakn̂e Cucurem Yewku pen. Ero ke tî nuturpamyakn̂e. Weyun yotari rma tî n̂examro n̂aar̂akn̂e axawa imo pore tîtosom wara rma.

10 Xatken̂e rma yiixatî pîn komo okwe. Nukurunpekn̂e rma tko Kaan. Ahsî xatînhîrî komo ya tî ahsîpora xakn̂e.

11 Tuuna kwaka takî tî n̂enor̂atken̂e yiixatî pînînhîrî pen komo. Cewn̂e n̂hema esakan me ro mak xakn̂e.

12 Ero wa waihkano riche Kporin komo mtapotachonho ponaro takî tî xatken̂e kîîm pen komo. Noro poko takî tî nahwowatken̂e waano yaatopo ke okre.

13 Yohno tko tî n̂eponarononketken̂e hara kica Exipsiu pen komo yenorinokachonho poko. Ahri ka Kporin komo mtapotarî ka centacerî kakîhretopo komo, kahra marha tî xatken̂e kica.

14 Axawa imo po cexitaw so twakon komo xe tî xatken̂e tînahrî komo xe. Iixe ro makî tî xatken̂e. Ero wa tî xatken̂e pohnîntaw. Kaan tî nukukmetken̂e anwecho ke.

15 Ero ke iixe ehtopo komo rma tî nîmyakn̂e Kaan yîwya so. Kar̂pera tko tî n̂iir̂akn̂e yîropotarî kom okwe.

16 Ero yinhîrî tak Moises xera takî tî xatken̂e kica tîyopono me exirî ke. Cetarî komo yaw rma ero wara ti xatken̂e. Araw xera marha tî xatken̂e Kporin komo yaka cewomsom me exirî ke.

17 Ero ke n̂etîmtakekn̂e takî tî roowo. Tatan pen takî tî n̂ermomyakn̂e okwe. Abiraw pen komo marha tî nahruyakn̂e.

18 Ero yinhîr̂î wehto takî tî n̂etahsîyakn̂e n̂examro pen yakrononho komo poko oco. Kicicme cehsom komo takî tî n̂ecakyatken̂e wehto ke ro mak oco.

19 Taa, Orebe po cexitaw so rma paaka xîkrî warai takî tî n̂iir̂atken̂e kica. Ciixaputho yakro makî tî nîmtapowatken̂e kica. Oporinî ro amoro, ketken̂e erotho ya kica.

20 Takir̂waman̂e ro komo tî nahsîpînketken̂e okwe. Paaka warai ponaro mak takî tî xatken̂e, cuupu yahn̂etho warai ponaro mak kica.

21-22 Kaan ponarora takî tî xatken̂e kica tukurunpen̂enhîrî komo rma. Kar̂pe cehtopo cma re n̂enpekn̂e Noro Exitu po yaake ro. Cirihnî tî n̂iir̂akn̂e emapona roro Kao yepamtho komo rowon po. Erepokano marha tî n̂iir̂akn̂e Cucurem Yewku yecihtaw. Ero wa tukurunpetoponhîrî ponarora ro mak tî xatken̂e kica.

23 Ero ke on wara takî tî kekn̂e Kporin komo, Ixaw Yana pen komo kr̂a waihketîkesî, kekn̂e tî. Mosese tko tî n̂ecececekn̂e Noro yeepataw rma yîrwoxinkan̂e me. Noro yanme makî tî n̂examro pen waihkatîkara xakn̂e Kporin komo.

24 Ero yinhîrî takî tî roowo nîwîrîyaketken̂e hara kica kir̂wanî ro rma. Kporin komo mtapotachonho tî nanwekyatken̂e kica,

25 Kporin komo yîwîrîyakan̂e me tî nîmtapowatken̂e kica tîmîn komo yaw so. Yîmtapotarî tî ewetîra xatken̂e okwe.

26-27 Ero ke on wara tî kekn̂e Kporin komo yîwya so, Kwaihkexe so tak men amyamro pen axawa imo po rma. Awepamthîrî komo marha wakpayasî amn̂e mîk hak maywen komo cheka. Iito so tak n̂examro pen meero waihkesî, kekn̂e tî. Yaaro xa tî kekn̂e towîhnî me ro mak. Napockanwakn̂e tî yaarono me xa tîmtapotarî yentamexpotome.

28 Ero yinhîrî takî tî Baaw-Peo poko tî xatken̂e hara kica. Waihxapu pen nahrî me tîmxapunhîrî marha tî nahyatken̂e kica.

29 Kporin komo nîrwonmekyatken̂e kicicme ro mak cexirî ke so. Ero ke n̂examro pen takî tî nahsîyakn̂e eper̂a hara okwe.

30 Pin̂easî tko tî nawomyakn̂e piiri Kaan yepanîn̂e me. Noro yanme takî tî n̂etowyakn̂e hara eper̂anthîrî komo.

31 Ero ke ero wa cepantoponhîrî takî tî Kaan mewrekn̂e tîkaritan yaka. Kir̂wan̂he xakn̂e Pin̂easî, kacho tî mewrekn̂e. Iitono rma mîn mewrexapu noro pen yehtoponho, miya roro esepamkaxapu komo n̂enîrî rma.

32 Taa, Meriba yewku yecihtaw marha tî Kporin komo nîrwonmekyatken̂e xa hara kica. Ero yimaw takî tî Moises n̂esemetanmekyakn̂e okwe n̂examro yehtopo yanme.

33 Kaan Yekatî tî nanwekyatken̂e. Ero wa Ixaw Yana komo poyero anarme takî tî nîmtapowakn̂e Moises kica. Ero wa tî xakn̂e Moises okwe.

34 On wara marha tî xatken̂e Ixaw Yana pen komo, anarî yana komo tî waihkatîkara xatken̂e. Kporin komo mtapotachonho tî ewetîra xatken̂e okwe, Iitono pen komo men waihkatîkacoko, kachonho ha.

35 Mîk hak maywen komo chewno me mak takî tî xatken̂e okwe. N̂examro yehtopo poko tî n̂ehcamhoketken̂e kica.

36 Ciixaputho pokono me makî tî xatken̂e kica, ponaro iitono komo yehtopo komo pokono me. Mîîye yaka emcixapu wara makî tî xatken̂e ero yipu poko.

37 Worokyam ya tîmsom me tî tumumuthîrî pen komo waihketken̂e okwe, cemsîthîrî pen komo marha okwe.

38 Ero wa tî kamxuku n̂en̂epetken̂e, kicicme exihnî komo kamxukutho okwe. Tumumuthîrî komo kamxukutho rma mîn n̂en̂epetken̂e okwe, cemsîthîrî komo kamxukutho marha. Ponaro Kanan pono komo yehtopo ya tîmsom me tî waihketken̂e okwe. Ero ke kicicme takî tî xakn̂e yîrowon komo kamxukutho ken̂e kica.

39 Ero wa tî xatken̂e n̂examro pen, tîn̂irithîrî komo ke rma tî xatken̂e kicicme so kica. Cihcinhîrî komo yai etowxapu wara tî xatken̂e anarî pokono wara hara kica.

40 Ero ke takî tî nîrwonakn̂e Kporin komo tîyanan komo poko. Poxumra takî tî n̂een̂akn̂e tînahsîthîrî komo rma.

41 Ero ke mîk hak maywen komo ya takî tî n̂examro pen nar̂mapekn̂e. Yiixatî pîn komo takî tî xatken̂e kayaritomon komo me okwe.

42 Ixaw Yana pen komo tî n̂emetanmekyatken̂e okwe. Tîîxatî pîn komo yanton me takî tî xatken̂e okwe.

43 Emapona roro cma re tîyanan komo nowyakn̂e Kporin komo. Wara rma Kporin komo yanwetopo poko rma tî n̂esencetken̂e kica. Ero ke tîmîtwono komo nîwîrîyakarî me takî tî n̂ehtîketken̂e okwe kicicme cehtopo komo yanme rma. Ero wa tî xatken̂e okwe.

44 On wara tko tî xakn̂e Kporin komo, yîmtapotarî komo tî n̂encekn̂e, Okwe okwe, kacho. Ero ke emetanmetopo komo takî tî n̂een̂akn̂e.

45 Tîmtapotachonhîrî ponaro takî tî xakn̂e hara yîpînîn yaw so cexirî ke. N̂etîrwoxinkekn̂e takî tî poko so kîpînîn yawno ro kaxi.

46 On wara tî Noro n̂iir̂akn̂e Ixaw Yana yaan̂enho komo ropotarî, naknamekn̂e hara yîpînîn yaw so tak ehtome so hara. Ero wa tî xakn̂e Kporin komo tîyanan komo poko.

47 Ero ke on wara wîîkes awya Apa, amna cma re makronomesî. Kaan xa Amoro ponaro amna yehtopo. Mîk hak rowon pono komo chei tak amna enmeko hara. Ero wa cenmetîkache amna tak nîmtapowasî awosotî poko, kir̂wanî ro me awehtopo poko ha. Amna nahwowasî kir̂wan̂he awehtopo yekatîmrî me.

48 Taa, on wara wîîkes awya so, Kporin komo poko ahwotacoko, ponaro Ixaw Yana komo yehtopo poko ha. Yihcitopo ken̂ehra tahwotaxmunhîrî komo miya roro ahwotacoko rma yîtîhkan me ro mak. Yaaro xa mahwowaxe ha, kacowpe tak awentan̂e komo ahnoro. Kporin komo poko ahwotacoko, wîîkesî. Ero wa mak wîîkes awya so.