On wara wîîkes awya so, Kir̂wan̂he mai ham okre, kacoko Kporin komo ya. Yiixe awehtopo poko amtapotacoko Noro yanan me awexirî komo ke. Anarî yana komo n̂entarî me ekatîmcoko yin̂irithîrî mer̂pono pîn.

2 Yîn̂entarî me marha ewanomacoko. Noro wanorî rma aacoko. Cirihnî n̂iire emapona roro. Ero poko marha amtapotacoko.

3 Kir̂wanî ro xa mîn Noro yosotî. Ero ke ero poko ahwotacoko. Tahwore xa n̂ehcowpe Kporin komo yenî xatî komo ropotarî ha.

4 Kporin komo yenî xe ehcoko, kar̂pe Noro yehtopo yenî xe ha. Noro yewru yenî xe ehcoko miya roro.

5 Yin̂irithîrî ponaro rma ehcoko, keserepokacho me yin̂irithîrî ha. Kar̂pe xa cesenpotopo rma n̂iir̂akn̂e, ero ke ero ponaro ehcoko. Yîmtapotarî ponaro marha ehcoko, kpanaretopo pokono ponaro ha.

6 Ero wa ehcoko amyamro Abraaw pen yepamtho komo, Kporin komo yanton pen yepamtho kom ha. Ero wa ehcoko amyamro Xako pen yepamtho komo, yînmen̂ekathîrî komo amyamro ha.

7 Kporin komo Mîk Kaan, ponaro kehtopo kom ha. Miya ro mak naxe yînpanarethîrî komo. Roowo poko hak naxe.

8 Tîmtapotachonhîrî ponaro rma nasî Noro miya roro yîhcamnopîra ro mak. 1.000 me roro n̂ehretawnomexe Ixaw Yana komo. Ero wicakno komo n̂entarî me rma nîmtapowakn̂e, Ow men ewetîcoko, kacho poko.

9 Abraaw yakro tî nîmtapowakn̂e Kporin komo pahxa, Awepamthîrî wakresî, kacho poko. Ero wa xa marha tî kekn̂e Iisake ya hara. Yaaro tîmtapotacho kuknon n̂etahcakn̂e yîwya ketaw.

10 Ero wa xa marha tî kekn̂e Xako ya hara. Panatanmetopo komo me tî kekn̂e yîwya. Eroromero kwakrexe so, kekn̂e marha tî Ixaw Yana komo ya.

11 On wara tî kekn̂e yîwya so, Kanan tak wîmyas awya so roowo. Ero tak mahsîyaxe amn̂e aweken komo me, kekn̂e tî.

12 Ero wa tî kekn̂e yîwya so asak makî ka exitaw so, asakî xa mak okwe. Anarî yana komo chew makî tî xatken̂e iito Kanan po.

13 Waimamyatken̂e makî tî mîk hak rowon komo cheka so. Anarî kayaritomo maywen komo chei cetken̂e anarî yana komo cheka hara. Ero wa so tî cetken̂e.

14 Ixaw Yana komo yemetanmekpora tî xakn̂e yîchew ehtopo komo ya. Kayaritomo komo tî n̂eeyakn̂e kicicme exirî ke so Ixaw Yana komo poko.

15 On wara tî kekn̂e Kporin komo kayaritomo komo ya, Onîhkapetho mîkyam Ixaw Yana komo, ero ke pokohra ro mak ehcoko. Opoko weronomano rin̂e komo marha mîkyam. Ero ke emetanmekîra so ehcoko, kekn̂e tî yîwya so.

16 Ero yinhîrî rooma poko takî tî xatken̂e iitono komo Kporin komo yanme rma. Iyurkano ro makî tî n̂iitîkekn̂e ro mak okwe.

17 Tooto rma tko tî n̂en̂epekn̂e yîywapu so. Xose mîk n̂en̂epekn̂e anarî rowon pona. Tanton me makî tî noro pen nahsîyakn̂e iitono komo epethîrî pona.

18 Noro tarî takî tî n̂erepetken̂e kuripara ke oko, ahsîtopo ke ha. Kuripara ke tî n̂imiyatken̂e oko.

19 Ero wara tî noro pen n̂iir̂atken̂e oko Kporin komo mtapotachonho yaw roro ehtîkacho pona roro tak. Kporin komo mtapotachonho tî xakn̂e Xose yehtopo kukman̂e me.

20 Ero yinhîrî tak tî tmaywen tak n̂en̂epekn̂e kayaritomo noro yahrunkachome. Iitono komo kayaritomon noro nahrunkekn̂e.

21 Ero yinhîrî tîmîn yenîn̂e me takî tî Xose n̂iir̂akn̂e hara, ahnoro cemyawno yenîn̂e me ha.

22 Ero ke kayaritomo maywen komo yahrun̂e me takî tî xakn̂e Xose kahrutopo yaka. Antomano rin̂e komo yahrun̂e me rma n̂iir̂akn̂e. Tanme ro mak nîhtînoyakn̂e tahrusom komo. Poritomo komo yakîhren̂e me marha tî xakn̂e, kayaritomo maywen komo yakîhren̂e me ha.

23 Ero yinhîrî Exitu pona takî tî cekn̂e Ixaw hara. Kao yepamtho komo cheka n̂esekenmekn̂e noro hara, anarî yana komo cheka ha.

24 Iito takî tî Xako yepamtho komo n̂epamnoyakn̂e ro mak Kporin komo mer̂pora cehso ro. Yiixatî pîn komo yopono me takî tî n̂iir̂akn̂e.

25 Ero yinhîrî Exitu pono komo ropotarî takî tî naknamekn̂e Kporin komo. Tîyanan komo xatî pîn me tî n̂iir̂akn̂e hara. Tanton komo poko cesentaxmu me tî n̂iir̂akn̂e, emetanmetopo komo poko cesentaxmu me okwe.

26 Ero yimaw takî tî tanton n̂en̂epekn̂e Kporin komo yîhyaka so, Moises ha. Araw marha tî n̂en̂epekn̂e tînmen̂ekathîrî.

27 Ero ke kar̂pe Kaan yehtopo yenpotopo takî tî n̂iir̂atken̂e n̂examro iitono komo wero ro. Cirihnî rma n̂iir̂atken̂e yaake ro Kao yepamtho komo chew.

28 Awarpan tî n̂en̂epekn̂e Exitu rowon pona. Awarpape ro makî tî n̂iir̂akn̂e. Kporin komo mtapotarî yanwekîra tî xatken̂e Moises komo, Araw yakro.

29 Kamxuk me tî n̂iir̂akn̂e kica yutunarî komo. Ero yanme takî tî ootî pen waihyakn̂e okwe.

30 Ero yinhîrî pororî warai pen makîrha takî tî mokyakn̂e ewton komo pona hara. Mer̂pora ro makî tî mokyakn̂e kica. Kayaritomo komo yamtakpon yaka meero n̂ewomyatken̂e pororî warai pen kica.

31 Ero yinhîrî Kporin komo takî tî nîmtapowakn̂e xa hara werewere pen mohtome hara kica. Ero yinhîrî oyomo makîrha takî tî mokyakn̂e hara okwe. Yîrowon komo poko hakî tî xakn̂e.

32 Ero yinhîrî saraipa makîrha takî tî n̂ekmexpekn̂e hara, tuunanhîrî ha. Pepe kacho marha tî n̂ekpekn̂e yîrowon komo pona wehto me mak oco.

33 Yînatîthîrî komo tî peremkekn̂e saraiva. Uupa yepu pen tî peremkekn̂e, piiku yepu pen marha okwe. Weewe pen naxikwekn̂e ro mak yîrowon komo pono pen.

34 Ero yinhîrî takî tî Kporin komo nîmtapowakn̂e xa hara. Ero ke mokyakn̂e takî tî makaka warai pen hara. Yukuknomarî yopo ro makî tî mokyakn̂e okwe.

35 Yînatîrî komo tî naaketîkekn̂e ahnoro, peen pen marha tî naakekn̂e. Mararîn komo pono marha tî nahtîkekn̂e yînatîrî komo yeperîrî.

36 Ero yinhîrî Exitu pono mumuru komo takî tî waihketîkekn̂e hara poturme ewruxapunhîrî pen komo okwe. Ahnoro ro makî tî waihkekn̂e okwe. Yihcirî me kar̂pe ehtoponhîrî pen komo mîkyam waihkekn̂e.

37 Ero yinhîrî Ixaw Yana komo takî tî naar̂akn̂e Exitu poi. Prata tî naar̂atken̂e tîcetaw so, ooru marha. Kar̂pen exihra ro makî tî xakn̂e n̂examro tribun komo.

38 Tawake takî tî xatken̂e Exitu pono komo n̂examro toche. Ixaw Yana komo pona tî n̂eraswatken̂e ro mak.

39 Cetaw so tak kaapu smun tî n̂iir̂akn̂e Kporin komo takwekem. Awarpamacho komo me tî n̂iir̂akn̂e. Wehto marha tî n̂iir̂akn̂e kosope weyuru komo me.

40 Ero yinhîrî tootî xe cehtopo komo poko takî tî nîmtapowatken̂e Ixaw Yana komo Kporin komo yakro. Ero ke turukwarî warai takî tî n̂ekmexpekn̂e iyotî komo me. Iyurmano marha tî n̂iir̂akn̂e kah yawno komo yuru ke. Ero warai ke n̂examro n̂ereporekn̂e Kporin komo.

41 Toopu marha tî nîmtakekn̂e tuuna yepatakachome tak atumnai. Mer̂pora ro makî tî n̂epatakekn̂e eepu wara ro mak. Turpem pore tî nîhcekn̂e.

42 Ero wa tî wakreno n̂iir̂akn̂e Kporin komo. Tîmtapotachonhîrî ponaro rma tî xakn̂e ham, towîhnî ro ponaro. Tanton ponaro marha tî xakn̂e Abraaw ponaro ha.

43 Tahwore xa tî xatken̂e Kporin komo yanan komo Exitu poi ekyataw so. Tawake xa tî xatken̂e n̂examro, yînmen̂ekathîrî kom ha.

44 Ero yinhîrî mîk hak rowontho takî tî nîmyakn̂e yîwya so. Iitononhîrî komo yekaritotoponho tî nahsîyatken̂e mîîmo komo, mararî komo, ahce na komo. Ero yipu tî nahsîyatken̂e tîwyan me so.

45 Ero warai tî nîmyakn̂e Kporin komo yîwya so tîmtapotarî yewetîn̂e me tak ehtome so, panatanmetopo komo yewetîtome, yîtwermacho komo marha. Ero yewetî xe xakn̂e yîwya so. Ero ke, Kir̂wan̂he xa mai ham okre, kacoko Kporin komo ya. Ero wa kacoko.