On wara wîîkesî oyekatî ya rma, Kir̂wan̂he Kporin komo yehtopo poko amtapotakî, wîîkesî. Apa, on wara wîîkes awya hara, Kyopono ro mak Amoro. Cekaiporesom me xa awehtopo nasî aponon wara. Ero wa xa marha nasî kayaritomo me awehtopo hara, wîîkes awya.

2 On wara marha masî Apa, katpan mamruyasî poono wara. Kaapu mko mehyatkesî ro mak roona wara rma.

3 Amîn ciir̂ataw awya amtakpo miir̂asî kaikokoro. Ero yipu makwanan miir̂asî tuuna rataka rma. Tuuna yewru miir̂asî atararan me hara. Ocowo miir̂asî tapokem wara. Yîmkawno wara tak metar̂as Amoro.

4 Ekatî me mak miir̂as awanton komo ancu kom ha. Wehto n̂uru warai me marha miir̂asî awanton komo.

5 Roowo mapatan miir̂akn̂e. Ero ke ceipu nasî roowo, emacakan me ro mak.

6 Roowo yakîhtoche tuuna ke tak mîwomcekn̂e poono ke womton̂e wara. Îîpî yopo tî ka xakn̂e tuuna.

7 Ero yinhîrî tuuna tak meeyakn̂e. Ero ke cemahcisom wara tak xakn̂e. Tarai me ro mak mîmtapowakn̂e kopi. Ero yentache miya ro mak tak n̂etakpayakn̂e tuuna kar̂pe.

8 Îîpî yepore cekn̂e tuuna, îîpî yamrinaka marha nîhcekn̂e. Cekenî ro yaka tak cekn̂e tuuna an̂irithîrî yaka.

9 Tuuna tak mîwokpamekn̂e wahkototopo ke. Ero watohra ro mak tak nasî. Ero ke roowo ahnoro yukmanîrera ro mak tak nasî xa hara amn̂e.

10 Tuuna pîtho marha n̂iir̂asî Kporin komo îîpî yamrinawno yaka yîhtotome. Matîwîn yotari tak cesî.

11 Tuuna yepu komo nasî woskara pono wokru me, kooso, kamara, onoke warai na wokru me ha. Ero kwaka cesî buhu warai, okno pîn, twokru xe cexitaw so.

12 Tuuna yecihtaka torowo komo n̂iir̂asî takowerî. Weewe yarihtaw piopio kesî tahwore cexirî ke.

13 Kaikokoro nasî tuuna yen Kporin komo n̂iritho. Ero yaino ke îîpî nîhyasî. Cerepore nasî roowo pono komo ahnoro yînakîtothîrî yeperîrî ke.

14 Cuupu marha natîkresî Kporin komo, paaka nahrî me. Tooto natîrî marha natîkresî. Yînahrî komo me tak n̂eperwasî roowo po atîhtaxapu komo.

15 Ero yeperîrî ke twokru komo n̂iir̂axe tooto komo tahworen̂e komo me. Ero ke marha katî n̂iir̂axe cewyenporin̂e me so. Tuuru komo marha n̂iir̂axe ero yeperîrî ke tîropotarî komo yecehton̂e me ha.

16 Cehkuke xa nasî Kporin komo natîrî weewe komo. Ero wa nasî setru, Ribanu pono, yin̂irithîrî kom ha.

17 Iitono pona takowerî n̂iir̂asî torowo. R̂awr̂a warai marha n̂iir̂asî tîwîntopo iitono pona, siprexte yepu pona.

18 On wara nasî îîpî kawno, kabra yeken me nasî, okno pîn yeken me. Wiir̂a warai yeken me marha nasî toopu kawno.

19 Kir̂wan̂he marha nasî nuun̂i. Ahce na ciitopo kuknon me n̂iir̂akn̂e Kporin komo. Cemicitopo ro marha nîhtînoyasî kaamo hara.

20 Awarpan marha miir̂as Apa, kosope tak ehtome. Ero yimaw comota pono komo tak n̂etar̂asî.

21 Reaw marha mayanasî por̂mamxan. Tootî n̂epor̂asî Kaan nîmîtho.

22 Ero yinhîrî kaamo tak n̂epatakes hara. Ero yimaw n̂esenmekyaxe hara comota pono komo. Cewtarî komo yaka cexe etîrareso.

23 Ero yimaw tak tooto komo cexe cemyawno komo ciiso xa hara. N̂etapickexe kokon̂i cehso ro.

24 Anarmerpa so xa nas an̂irithîrî Apa. Takîhso xa makîhcekn̂e ham ahnoro. Tawronohkatîkaxi nasî roowo awemyawno ke.

25 Tan marha nasî tuuna imo hara. Mer̂pora ro mak nasî ero kwawno kom hara anakîtothîrî komo. Yukuknomarî yopo ro mak nas okyo, karitî komo, porin komo, wahrai komo marha.

26 Tuuna imo kwaw n̂etar̂asî kanawa komo. Ero kwaw marha nasî repiatan. Noro makîhcekn̂e ero kwaw eseman̂itome.

27 Noro yipu komo ahnoro n̂een̂axe apona tînahmacho komo. Yînahmacho me exitaw roro mînahmesî.

28 Yînahrî komo mîmyasî yîwya so. Ero tak n̂enmekyaxe. Awetamoyanketaw mer̂pora nahsîyaxe tînahrî komo kir̂wan komo. Cerepore tak naxe ahnoro.

29 Anarimaw so mesewyahruyas hara. Ero yimaw so n̂esemetanmekyaxe hara anakîtothîrî komo. Apepenthîrî komo tak mowyasî. Ero ke thakwa waihyaxe okwe. Roowo me tak n̂ehtîkexe hara okwe.

30 Anarimaw xa hara awekatî mantomesî noro yipu komo yakîhtorî poko xa hara. Ero ke n̂etakîcexe xa hara. Ero wa roowo pore tîtosom komo mepamnoyasî xa hara Apa, iina xa marha.

31 Ero ke on wara wîîkesî, kir̂wanî ro me Kporin komo yehtopo yesenpo xe wasî miya roro eroromero. Tahwore exi xe wasî Noro tîn̂irithîrî poko.

32 Anarimaw so roowo wece n̂een̂asî Kporin komo. Ero yanme tatanasî tak roowo. Îîpî napeyasî anarimaw so. Ero yanme nîsînasî tak.

33 Ero ke Kporin komo n̂entarî me kewanomesî miya roro owaitopo pona roro. Kaan n̂entarî me rma kewanomesî kir̂wan̂he Noro yehtopo poko. Ponaro oyehtopo n̂entarî me kewanomesî waipîra oyehtopo yecenarî.

34 Tawake exi xe wasî Noro poko oyesehtînoyataw. Tahwore wasî Noro poko.

35 Kicicme cehsom komo waipu xe reha wasî roowo pononho komo. N̂ehcamnocowpe mak noro yipu komo. Kir̂wan̂he Kporin komo yehtopo poko tahwotapore nasî, wîîkesî oyekatî ya rma. Noro poko ahwotakî. Ero wara esko, wîîkesî. Ero wa wîîkesî.