103
Tapi Wanorî On. Tponarono Komo Pînîn Yaw Nasî Kporin Komo
1 On wara kepanatanmekyasî owî rma, kir̂wan̂he Kporin komo yehtopo poko amtapotak okre. Kir̂wan̂he Noro yehtopo poko esehtînoko okre, wîîkesî oyekatî ya rma anarme kahra ro makî.
2 On wara marha wîîkesî oyekatî ya, Kporin komo poko ahwotakî. Yîwya owakrechonho yîhcamnopîra men esko, wîîkesî.
3 On wara nasî Kporin komo, kicicme awehtoponhîrî nîhcamnoyasî ahnoro. Kar̂pera awexitaw akaricesî roro hara.
4 Roowo yatumnaka tîtosom me awexitaw aporokesî iina tohra tak oyehtome. Tarokoyem warai me marha awirasî awakrecho ke, apînîn yaw cehtopo ke marha.
5 Kir̂wan ke anahmesî okre iime aweseresmachome roro. Ero wara akaricesî kar̂pamxan wara awehtome xa hara yaimo wara.
6 Emetanmexapu komo yepanîn̂e Mîk Kporin komo. Takîhso noro yipu komo n̂epanîyasî yaarono me mak ha.
7 Pahxa tî cehtopo nîhtînomexpekn̂e Moises ya. Ahce wa na ciino rin̂e me cehtopo tî n̂enpekn̂e Ixaw Yana komo ya.
8 Kîpînîn yawno Mîk Kporin komo, yiixe kehtopo ponarono marha. Yamoro cetîrwonmesom marha Mîk. Kwakren̂e me marha nasî miya xe xa kwakren̂e me okre.
9 Ken̂ekan̂e rma re Mîk Kporin komo. Miya roro tko ken̂ekatîkara nasî. Miya roro yîrwomra marha nasî kpoko so.
10 Kpanaretken̂e so rma re Noro, kicicme kehtoponhîrî komo yecenarîra ha tko. Miya xe xa tpanaresom me taxe. Ero xawyaka makî tko kpanarexe so.
11 Kîpînîn yawno xa Mîk Kporin komo. Kaw xa nasî kaapu roowo yepoi ero wicakî xa marha nasî kîpînîn yaw so Noro yehtopo, tpoko tweeno komo pînîn yaw ehtopo ha.
12 Tanwetoponhîrî komo naar̂akn̂e Noro mooxe. Etmoxe xa nasî kaamo yepatakacho emicitopo yai. Ero wicakî moxenon xa marha kîhyai so naar̂akn̂e tanwetoponhîrî komo.
13 Rikomo yîîm nasî tîmxîkrî komo pînîn yaw ero wa xa marha nasî Kporin komo kîpînîn yaw so, tpoko tweeno komo pînîn yaw ha.
14 On wara kesî Kporin komo kpoko so, Ero pînthonhîrî mîkyam tooto komo, kesî. Roowonhîrî me kehtopo komo ponaro ro nasî.
15-16 On wara mak tasî, cuupu wara mak. Epemrutun wara marha tasî woskara pono wara. Kir̂wan̂he ka n̂esenpesî epemrutun. Ero yinhîrî ocowo mak napeperes hara. Poku, n̂ehcamnoyas hara epemrutun okwe. Ero yekenho tan ha, kahra tak naxe tooto komo ekenhîrî poko. Ero wara xa marha tasî kîîw hara.
17 Miya roro makî tko Kporin komo nasî kîpînîn yaw so kîpînînkan me ro mak okre. Pahxa ro mak kîpînîn yaw so xakn̂e, ero wa Noro yehtopo yihcitopo exihra ro mak xakn̂e. Ero wa Noro yehtopo yenatîtopo exihra marha nasî. Ero wa nasî Noro tponaro xa cehsom komo poko. Kir̂wan̂he kiin̂e marha Mîkî, Ero wara rma nasî kîmxîkrî komo poko hara, kparî komo poko marha.
18 Ero wa nasî Kporin komo tîmtapotachonhîrî ponarono komo poko, Oyewehcataw so, kakronomexe so, kacho ponarono komo poko. Ero wa marha nasî tîwya kpanatanmetopo ponarono komo poko hara.
19 Tapon n̂iir̂akn̂e Kporin komo kah yaka, kayaritomo me cesenpotopo ha. Miyan komo kayaritomon Mîk etpoyino pîn komo kayaritomon ha.
20 Taa, ancu komo awya so wîîkes hara, Kir̂wan̂he xa nai ham Kporin komo, kacoko amyamro. Kaan yancun komo amyamro, karitî komo, kyopono ro mak. Yîmtapotarî yewetîn̂e amyamro, yîwya awantomacho komo yewetîn̂e kom ha. Ero wa kacoko amyamro Kporin komo poko.
21 Ero wa kacoko amyamro Kporin komo nantomarî komo ahnoro. Kir̂wan̂he Noro yehtopo poko amtapotacoko. Noro yanton komo amyamro, Noro yanme ciino rin̂e kom ha. Ero wa xa marha kacoko amyamro.
22 Ero wa amtapotacoko ahnoro Kporin komo n̂iritho komo. Kir̂wan̂he Kporin komo yehtopo yenpon̂e me ehcoko. Ahto so na awexitaw so Noro rowon po ero wa kacoko. Oyekatî ya rma wîîkesî, Kir̂wan̂he Kporin komo yehtopo poko amtapotakî, wîîkesî. Ero wa wîîkesî.