Emetanmexapu Mtapotarî On, Ahwora Ro Mak Exitawno Mtapotarî Kporin Komo Yakro

1 Omtapotarî cma re mences Apa. Cerewre tan kîmtapowas awakro. Ero ke cma re omtapotarî mencesî.

2 Ohyai cma re esewkor̂mara masî oyesenmekyataw. Owece xa matko enko omtapotarî yentachome tak awya. Awakro omtapowataw ero po rma cma re ow meyukyasî yohno.

3 Yohno so n̂ehcamnoyasî oyenmachonho wehto yîsîn wara okwe. Oyocho nasî ecahxapu wara oco.

4 Ahwora ro mak wasî. Cuupu naawaiyasî yîhkotoche ero wara nasî oropotarî. Ero ke twen̂ekarî mak wasî oyeseresmacho poko rma okwe.

5 Kemkutunasî mak kar̂pe. Ero ke takporoso ro mak wasî. Oyocho poko tak ohcîpîtho n̂etahsîyasî okwe.

6 Yuruma warai mak ow axawa imo pono warai ha. Anarimaw pupuri nasî ewtotho po ero wa xa marha was ow hara.

7 Cewke mak wasî okuywan po. Anarimaw torowo na nai mîîmo meretwo akronomra ro mak. Ero wara xa marha was ow hara.

8 Kokmamso ro owîrîyakexe ooxatî pîn komo. Awîrîma xe kr̂a wasî Kaan ya, kexe okwe oyanwekn̂e komo.

9 Wemronho wahyasî onahrî wara rma. Oyewyokutho wesmesî owokru yakro.

10 Opoko xa mîrwonakn̂e oko Apa. Tîrwon̂e rma ow mahsîyakn̂e, yukpurukpuruntho ponan wara xa ow mar̂mekn̂e okwe.

11 Ekatî wara mak wasî kaamo n̂enpotho wara. Kokon̂i cehsom wara wasî cekawnoresom wara. Cuuputho wara marha wasî taawaisom wara.

12 Waipînî ro makî reha Amoro Apa eroromerono ha. Cekaiporesom me nas awosotî amn̂e miyan komo n̂entarî me, miya roro esepamkaxapu komo n̂entarî me rma.

13 Piiri tak mawomyas amn̂e, Siaw pono komo pînîn yaw tak masî. N̂examro wakretopo me tak nasî oroto, ankuknomathîrî me tak n̂enmai ham.

14 Siaw pono pînîn yaw naxe awanton komo toopu komo pînîn yaw. Okwe okwe, kexe roowo pupuntho pînîn yaw rma iitono pînîn yaw ha.

15 Siaw pînîn yaw awexiche tak twerî tak Kporin komo yosotî n̂etahcaxe mîk hak rowon pono komo. Ero yimaw marha n̂eserepokexe tak kayaritomo komo kir̂wanî ro me awehtopo poko. Ero wa naxe amn̂e kayaritomo komo, roowo poko hakno kom ha.

16 Amn̂e tak Siaw n̂iir̂as hara Kporin komo, ewto imo me n̂iir̂as hara. Ero yimaw tak Noro rma n̂esenpesî kyopono ro me okre.

17 Cesemetanmesom komo mtapotarî ponaro tak nasî Noro. Yîmtapotarî komo yîwîrîyakara ro mak nasî.

18 Ero mewrecoko amn̂e esepamkaxapu komo n̂enîrî. Amn̂e pahxaro tak tooto komo nakîhces hara Kporin komo n̂examro n̂enîrî me marha mewrecoko. Ero yeen̂ataw yîwya so, Kir̂wan̂he xa mai ham okre, kexe tak.

19 Kah yawno Mîk Kporin komo. Iito nasî Noro mînî ro. En̂exa tak enîno n̂iire. Roowo pono komo tî n̂een̂akn̂e.

20 Ahruxapu komo yemkutunîmtopo yenta xe xakn̂e. Twaihkaxmu komo moxam, kachonho komo yahrunka xe marha xakn̂e.

21-22 Kporin komo yehtopo yekatîm xe marha xakn̂e Noro Siaw pono komo ya. Kir̂wan̂he Noro yehtopo yekatîm xe xakn̂e Xerusaren pono komo ya. Ero wa ekatîm xe rma nasî anarî yana komo ya esenmekîche so, mîk hak maywen kom ha. Kporin komo poko ahwotachome so wa n̂esenmekyaxe.

23 On wara tko oriyakn̂e Kporin komo, poritomo mera rma ka oyexitaw okar̂kekn̂e okwe. Ero wicakî xa nasî cimn̂ipu waipîra awehtopo, kachonho nîhkocekn̂e okwe.

24 Ero ke on wara wîîkekn̂e yîwya, Apa Kaan, owî cma re arîhra masî waipîra oyehtopo rakataw mak oyexitaw. Mer̂pora ro mak nasî cimn̂ipu pahkî awehtopo reha. Miya ro mak micimn̂ipunwasî Amoro reha. Miya roro esepamkaxapu komo exitaw ero yimaw iito rma mas Amoro waipîra rma.

25 Pahxa rma roowo mapatan warai miir̂akn̂e. Kaapu komo marha makîhcekn̂e awamorî ke.

26 Kaapu pen takî tko n̂ehcamnoyas amn̂e, roowo pen marha. Iitono ro me reha mas Amoro. Poonotho wara nasî kaapu komo amn̂e, roowo marha. Pahxantho me tak nasî. Pahxantho me exiche poonotho anarî tak amna namruyas hara. Ero wa xa marha kaapu pen miir̂as anarî me hara, roowo pen marha.

27 Amoro reha masî atpînî ro me. Enatîra ro mak nasî cimn̂ipu pen waipîra awehtopo.

28 Miya roro marha naxe awanton komo xîkrî. N̂examro yepamtho komo naxe ahyawno ro me. Ero wa naxe.