Kayaritomo me nasî Kporin komo. Ero ke n̂erahtîmcowpe tak anarî yana komo tatanîmso ro. Kerubin yotawno ro Mîkî. Ero ke n̂esewsîpe tak roowo.

2 Kyopono xa Mîk Kporin komo, Siaw pono ha. Anarî yana komo kayaritomon me nasî, miyan komo kayaritomon me rma.

3 Awosotî poko nahwotacowpe n̂examro, anarî yana komo. Cekaiporesom me xa nasî awosotî, twerî cetacisom me rma tko nasî. Kir̂wanî ro xa Mîk Kporin komo.

4 Karitî ro mak Mîkî kayaritomo. Yaaro xa epanîno ciri xatî Mîk ha. Kehtoponhîrî yecenarî xa kepeman̂e Amoro Apa. Ero wa mîxakn̂e Xako yepamtho komo poko. Yaaro xa mepemekn̂e, ehtoponhîrî komo yaw roro xa.

5 Karitî xa Mîkî Kporin komo Kaan, kacoko. Noro poko ahwotacoko yîhtarî yapon mîtwo rma. Kir̂wanî ro xa Mîk Noro.

6 Moises tî xakn̂e Kporin komo yaka cewomsom ro me. Araw marha tî xakn̂e yîhyaka cewomsom me. Samuew marha tî xakn̂e Kporin komo poko cehsamaxmu me. Apa, ayanan komo amna. Ero ke amna akronomakî, kan̂e me xakn̂e noro. Ero wa tî ketken̂e n̂examro Kaan ya. Ero ke yîmtapotarî komo tî n̂eyukyakn̂e.

7 N̂examro yakro tî nîmtapowakn̂e Kporin komo kaweresî chew patawno chew. Yîmtapotarî tî n̂ewehcatken̂e tpanatanmetopo komo, tantomacho komo marha.

8 Apa, ponaro amna yehtopo Amoro, amna porin penî mtapotarî meyukyakn̂e. Kicicme ehtoponhîrî komo yîhcamnon̂e me mîxakn̂e. Kicicme ehtoponhîrî komo yanme rma tko n̂examro pen mîpanarekn̂e.

9 Kyopono ro Mîkî Kporin komo Kaan, kacoko ha. Oporinî ro Amoro, kacoko yîwya Noro yekenî ro po, îh po. Kir̂wanî ro xa Mîk Kporin komo Kaan. Ero warai Mîk ha.