Waano On

1 Taa, waano tak taacerî Kporin komo pokono. Yaxan taacerî. Keserepokacho me xa nasî cirihnî ciitoponho yîwya. Tîîxatî pîn komo nar̂mekn̂e tamorî ke kaari n̂ixan ke. Taporî ke marha nar̂mekn̂e kir̂wanî ro ke.

2 Kukurunpen̂e me cehtopo tak Noro n̂enpekn̂e tooto komo ya. Kir̂wan̂he ciino rin̂e me cehtopo n̂enpekn̂e marha mîk hak maywen komo ya.

3 Ixaw Yana komo pînîn yaw cehtoponhîrî ponaro rma xakn̂e Kporin komo. Akro so tîmtapotachonhîrî ponaro marha xakn̂e. N̂examro yakronomachonho tak n̂een̂atken̂e roowo poko hakno komo ahnoro, roowo yenatîtopo pono komo meero. Ponaro kehtopo komo ya akronomachonhîrî mîn n̂een̂atken̂e.

4 Okre, okre, kacoko amyamro roowo pono komo ahnoro, kar̂pe kacoko tahwore. Ewanomacoko marha kir̂wan̂he Kporin komo yehtopo poko. Tahwore xa ewanomacoko.

5 Raatî yakro ewanomacoko, tawyockem yakro. Kporin komo pokono aacoko waano.

6 Cecesom yakro marha aacoko, raatî yakro kuripara ha. Kahn̂eru meretîtho marha ececoko. Kar̂pe xa ewanomacoko tahwore exirî ke so. Ero wa n̂ewanomacowpe Kporin komo n̂entarî me. Kayaritomo xa Mîk Noro.

7 Tuuna imo marha n̂ewtunîmhe, ero kwawno marha n̂ehcowpe tîmtapotaxmu wara. Roowo marha n̂expe tîmtapotaxmu wara, iipono komo marha nîmtapotacowpe.

8 Knowknow kan̂e wara n̂expe tuuna yepu komo. Îîpî komo marha n̂expe cewanomaxmu wara, tahwotaxmu wara ha. Kporin komo n̂entarî me rma n̂ehcowpe ero wara.

9 Kporin komo rma wa mokyasî roowo pono komo yen̂ekaxi. Yaarono me xa roowo pono komo n̂en̂ekesî. Ehtoponhîrî komo yaw roro xa epemano n̂iir̂asî, anarî yana komo n̂en̂ekesî. Ero wa en̂ekano n̂iir̂asî Noro.