On wara nasî Kporin komo, kayaritomo me xa nasî. Ero ke nahwotacowope roowo pono komo. Ciwya pono komo meero n̂ehcowpe tahwore, mer̂pono pîn pono komo rma.

2 Tuuna yewru nasî Kporin komo mamhoko, awarpape marha nas iito. Kir̂wanî ro me exirî ke kayaritomo me nasî, yaaro ciino rin̂e me exirî ke marha.

3 Noro cetaw wehto cesî poturme. Ero rma tak yiixatî pîn pen komo nakn̂iyasî miyan komo, xiyan komo marha.

4 Pepe kamexpesî Noro roowo katparen̂e me. Tatanaxe tak roowo poko hakno komo pepe kacho yenîrî ke.

5 On wara nasî îîpî Kporin komo mokyataw, nuxukrapamyasî ro mak weeyu wara. Ero wa nuxukrapamyasî ahnoro roowo pono komo kayaritomon me exirî ke Noro.

6 Kaapu komo rma n̂ekatîmyasî kir̂wanî ro me Noro yehtopo. Iito Noro yehtopo n̂een̂axe anarî yana komo ahnoro.

7 Anarî komo reha nahwowaxe mîk hak warai me ciixapu poko kica. Kir̂wanî ro moso ponaro oyehtopo ha, kexe ero yipu poko kica. On wara wîîkes awya so ponaro n̂examro yehtopo komo ya, On wara ehcoko amyamro, Kporin komo yakro mak xa amtapotacoko. Oporinî ro Amoro, kacoko yîwya mak. Ero wa ehcoko.

8 Apa, yaarono me awya ciino ritoponho n̂encexe Siaw pono kom ha. Ero ke tahwore naxe okre. Tahwore marha naxe Xuta yepamtho yemsîrî komo awya panareno ritopo yentarî ke.

9 Kyopono ro xa Amoro Apa. Roowo pono komo kayaritomon Amoro. Naxe rma re ponaro tooto komo yehtopo ro. Amoro xa tko masî kar̂pe noro yipu komo yopo ro mak.

10 Kporin komo xatî komo, on wara wîîkes awya so, kicicme kehtopo komo xera ro mak ehcoko. On wara nasî Kporin komo tînakir̂wamathîrî komo poko, nukurunpesî roro, kicicme cehsom komo n̂emetanmekîtho komo nowyasî.

11 Katpan n̂iir̂asî Kporin komo naatî ciitopo wara rma. Kir̂wan komo ya tîmsom me n̂iir̂asî. Kahwotacho marha n̂iir̂asî kir̂wan̂he cexi xatî komo ya tîmsom me hara.

12 Kporin komo poko ahwotacoko amyamro kir̂wan komo. Kir̂wan̂he Kporin komo nai ham okre, kacoko. Kir̂wanî ro Noro yosotî. Ero ke ero poko ahwotacoko. Ero wa ahwotacoko.