On wara wîîkes awya so, roowo poko hakno komo ya, ewanomacoko tak Kporin komo n̂entarî me. Yaxan tak aacoko waano.

2 Ewanomacoko Kporin komo n̂entarî me. Kir̂wanî ro mak Noro yosotî, kacoko. Kukurunpen̂e ro Mîk okre, kacoko marha Noro poko. Enmar̂atîxera kacoko.

3 Kir̂wan̂he xa Noro yehtopo ekatîmcoko mîk hak maywen komo ya. Cirihnî ciitoponîrî yîwya ekatîmcoko anarî yana komo ya ahnoro.

4 Anarî komo yopono ro mak Mîk Kporin komo. Kyopono xa ham Amoro, kapore ro mak nasî yîwya. Yaake naxe ponaro tooto komo yehtopo. Kporin komo poko xa tko twerî cexpore nasî noro yipu komo yopo.

5 Ciixaputho mak mîn ponaro anarî yana komo yehtopo mko. Kaapu yakîhton̂enho reha Mîk Kporin komo.

6 Kir̂wan me Kporin komo yehtopo n̂esenpesî Noro yeepataw kexitaw so. Kayaritomo me ehtopo marha n̂esenpesî iito. Kar̂pe ehtopo n̂esenpesî yîmîn yaw, cenpore ehtopo marha. Iito xa Kporin komo yehtopo n̂esenpesî.

7 Ai, anarî yana komo amyamro, tribu komo xa, on wara wîîkes awya so, Kporin komo yehtopo poko amtapotacoko. Kir̂wan̂he ehtopo poko amtapotacoko, kar̂pe ehtopo poko marha.

8 Yaaro rma n̂ekaiwasî Kporin komo yehtopo miyan komo ya rma kir̂wan̂he ro mak exirî ke. Ero ke Noro yehtopo poko amtapotacoko. Yîhroron pona amohcoko. Yîwya tîmsom ehcoko amokyataw so.

9 Kicicitho ken̂ehra ro mak nasî Kporin komo. Cenporem Mîk okre. Cenpore Noro yehtopo ponaro ehcoko awahwotaw so Noro poko. Noro poko tweeno me marha ehcoko tatan̂e cehso ro. Ero wa ehcoko Noro poko amyamro ahnoro roowo poko hakno komo.

10 On wara kacoko mîk hak maywen komo n̂entarî me, Kayaritomo me nasî Kporin komo, kacoko. Mapata pona ciixapu wara nasî roowo, Ero yanme miya so etarira nasî. Anarî yana komo n̂en̂ekesî Kporin komo amn̂e. Yaaro xa n̂en̂ekesî.

11 Nahwotacowpe kah yawno komo. Tahwore marha n̂ehcowpe roowo pono kom hara. Tuuna imo marha n̂ewtunîmhe kar̂pe. Tîmtapotaxmu wara marha n̂ehcowpe ero kwawno komo.

12 Tahwotaxmu wara n̂expe mararî kom hara, ero pono marha ahnoro. Ero yimaw weewe komo marha nasî tahwotaxmu wara comota pono. Kporin komo pokono me rma nahwotacowpe.

13 Ero wa n̂ehcowpe tahwotaxmu wara Kporin komo mohtopo ponaro cexirî ke. Noro rma mokyasî roowo pono komo yen̂ekaxi ahnoro. Yaaro xa n̂en̂ekesî. Anarî yana komo n̂en̂ekesî tîmtapotachonhîrî yaw roro rma. Yaarono mîn yîmtapotachonhîrî. Ero wa en̂ekano n̂iir̂asî Kporin komo amn̂e.