On wara wîîkes awya so oyakno komo, amohcoko tak ewanomaxi. Tahwore xa cewanomacerî Kporin komo poko. Kar̂pe tîtkacerî yîn̂entarî me. Toopu warai Mîkî, kececetotopo warai, enorira kehtopo warai ha.

2 Noro yaka kaikatko. Kir̂wan̂he xa mai ham okre, tkaro kaikatko yîhyaka. Kir̂wan̂he ehtopo poko cewanomacerî kar̂pe.

3 Kaan xa Mîk Kporin komo, anarî komo yopono xa. Kayaritomo xa Mîkî, ponaro anarî komo yehtopo yopono.

4 Noro yemyaw nasî weyun komo, yuhnawno komo marha. Îîpî marha nasî yîwyan me hara.

5 Noro yîwyan me marha nasî tuuna imo yînakîtothîrî kaxi. Noro n̂iritho marha mîn roowo hara. Tamorî ke rma n̂iir̂akn̂e.

6 Ero ke amohcoko amna yakro, Oporinî ro Amoro, kaxi. Tutupentacerî marha kosokmuru komo po, Kporin komo mamakan me, kakîhton̂enhîrî komo mamakan me ha.

7 Noro mak Mîkî Kaan, ponaro kehtopo komo. Iyanan komo kîwyam, Noro woskaran pono komo marha kîwyam iyoku warai komo oper̂a warai. Kenîn̂e komo Mîk oper̂a yosom warai.

8-9 Ero ke oroto yîmtapotarî yenta xe ro mak was awya so. On wara kesî Noro awya so, Oyanwekn̂e me exihra ro mak ehcoko. Aporin pen komo warahra tak ehcoko. Meriba po cexitaw so oyanwekyatken̂e n̂examro pen okwe, Ero wa xatken̂e okwe n̂examro pen yukukmetaw owya. Cirihnî cma re wiir̂akn̂e roro wero ro so. Ero yipu yenîn̂enho rma okukmetken̂e oyanwecho ke kica.

10 40 cimn̂ipu ahwora wîxakn̂e okwe n̂examro pen poko. On wara wîîkekn̂e poko so, Anarme cesehtînosom ro mak mîkyam kica, oponarono pînî ro mak okwe. Oyehtopo poko ehcamhokanî ro mak mîkyam okwe, wîîkekn̂e.

11 Ero ke on wara tak wîîkekn̂e n̂examro pen poko, Oyepokaretopo pona mokuhra ro mak wa naxe okwe, wîîkekn̂e. Yaaro xa ero wa wîîkekn̂e towîhnî me ro mak. Orwon me marha wîîkekn̂e. Ero wa wîîkekn̂e n̂examro pen poko.