On warai xa Amoro Apa, Kaan xa Amoro, Oporinî ro. Kepanîn̂e xa Amoro Apa. Ero ke tweikem me tak esenpoko.

2 Roowo pono komo yen̂ekan̂e marha Amoro. Ero ke piiri tak awomko. Anarî komo yopono me cesehtînosom komo tak en̂ekakî kicicme ehtopo komo yepemachome tak awya.

3 Nahwowaxe mak okwe kicicme cehsom komo Apa. Atî wicakî pahkî ero wa nat okwe?

4 Kîmtayanwekn̂e me ro mak nîmtapowaxe ro mak kica. N̂ehcoyoponkexe marha kica. Ero wa naxe kicicme ciino rin̂e komo ahnoro okwe.

5 Apa, ayanan pen komo yakuhr̂apon̂e wara mak naxe okwe. Amxîkrî komo n̂emetanmekyaxe okwe.

6 Wooxam pen waihkexe okwe ecin̂onkaxapu pen komo. Tîchewno pen komo marha waihkexe okwe, yîmîhnî pen komo marha, rikomo pen komo. Ero warai pen komo waihkexe okwe.

7 On wara tko kexe kica, Kenîhra ro mak wa nasî Kporin komo. Ponaro Xako yehtopo nasî kponarora so, kexe mak kica. Ero wa kexe kica.

8 On wara men wîîkes awya so panahnî komo, Akpîra cehsom komo amyamro, ahcemaw n̂he tak takîhso mesehtînoyatu ha?

9 Kîmtapotarî yentara ma re nai awya so kpanarî yakîhton̂enho? Kenîhra ma re nai awya so kewru yakîhton̂enho hara?

10 Kpanarera ma re nai awya so mîk hak maywen komo panaren̂e, yîhcamhokano rin̂e ro ha?

11 On warai xa Mîk porin komo, tooto komo yesehtînotopo yenîn̂e ro Mîk ha. Tohnaw mak n̂esehtînoyaxe okwe, kesî poko so.

12 On wara tko naxe anpanarethîrî komo Apa, tawake naxe okre. Tawake marha naxe amtapotachonhîrî poko anpanatanmekîthîrî kom hara.

13 Ero wa aponarono komo mîpanatanmekyasî cerepore ehtome so esemetanmexapunhîrî. Ero wa n̂examro merepotanmekyasî kicicme cehsom pen komo yahrutopo yahtotopo momokyataw.

14 Tîyanan komo yahsîpînkara ro mak nasî Kporin komo. Tîmxîkrî komo tînomra ro mak nasî.

15 Amn̂e tak takîhso naxe en̂ekano rin̂e komo pahxan pen komo wara rma hara. Ero yimaw ken̂ekan̂e komo tak n̂ewehcaxe kir̂wan̂he cexi xatî komo.

16 Onoke xa oyepanîya kicicitho komo poko? Onoke xa kicicitho pokono komo n̂en̂epe oyemetanmekn̂e kom ha?

17 Kporin komo oyakronomara exitaw ketaw ha re yohno takî re tîtken̂e wexirî, twaihso tak okwe.

18 On wara wîîkekn̂e awya Apa, sehrere kes okwe ohtarî, kepîrkesî ha re okwe, wîîkekn̂e. Ero yimaw tak opînîn yaw mîxakn̂e. Ero ke ow mecehcekn̂e.

19 Anarimaw so ahce na poko keserepokesî, miyan poko rma okwe. Ahce wa wai hara kopi? wîîkesî. Ero yimaw rma ow mereporesî. Tahwore was hara.

20 Amaywen me ma re nai kicicme cehsom komo kayaritomo kom ha? On wara naxe anarî komo, kayaritomo komo, kicicme kehtopo poko rma panatanmekno n̂iir̂axe kica. Amaywen me ma re natu noro yipu komo?

21 On wara naxe kayaritomo komo anarimaw, anarî komo yakro n̂esencexe kir̂wan komo yahsîtopo poko kr̂a. Kicicitho ro mak amoro kica, twaihkapore kr̂a masî, kexe kicicime exihnî komo ya rma okwe.

22 Kporin komo tko nas okurunpen̂e me. Toopu wara marha nasî Noro, yaaka oyetkurunpetopo wara. Ero wa xa nasî Kaan, ponaro oyehtopo ha.

23 Noro rma kicicme cehsom komo n̂emetanmekyakn̂e kicicme ehtoponhîrî komo ke rma. Kicicme ehtoponhîrî komo yanme rma noro yipu komo nîhcamnoyasî. Kporin komo mak noro yipu komo nîhcamnoyasî, ponaro kehtopo kom ha. Ero wa waihkes ha.