92
Waano Tan Sabatu Po Taasom. Anakronomathîrî Ow Ha Apa, Kesî On Mewren̂e
1 Kir̂wan̂he nasî Kporin komo poko kahwotacho. Kaan xa Amoro Apa, Kyopono ro xa. Tpoxwe ro mak nas amna yewanomacho awosotî poko.
2 Tpoxwe nasî kwakren̂e me awehtopo yekatîmtopo hara pahxaxa roro ekatîmyataw ha. Ero wa xa marha nasî kemîknon̂e pîn me awehtopo yekatîmtopo hara kosope roro ekatîmyataw.
3 Waano amna naar̂asî ero wa awehtopo pokono. Raatî yakro amna naar̂asî, 10 awyoci ken̂arî yakro. Ahpa yakro marha amna naar̂asî waano awehtopo pokono, tîyorîrem yakro.
4 An̂irithîrî menpekn̂e owya Apa. Ero ke rma ow mahworekn̂e. Kewanomesî tahwore oyexirî ke an̂irithîrî poko.
5 Amna n̂eserepokesî ro mak Apa cirihnî ciitopo poko awya. Yuhnari ro mak nasî awesehtînotopo hara.
6 Ero yenîhra ro makî tko naxe akpîra cehsom komo. Kaan ya ciino ritopo poko naxe camkî tohnawno poko cesehtînosom komo okwe.
7 Kicicme cehsom komo yehtopo poko naxe camkî. On wara naxe kicicme cehsom komo, n̂epamyaxe rma re ka cuupu wara. Ahnoro rma n̂ehtîkexe cemyawnoi anarimaw. Amn̂e tko noro yipu komo nîhcamnoyasî Kaan eroromero okwe. Ero wa kicicme cehsom komo yehtopo poko yîhtînopîra ro mak naxe akpîra cesehtîn̂osom komo.
8 Kah yaw xa tko mas Amoro Apa eroromero.
9 Waihyaxe rma wa Apa aaxatî pîn pen komo, waihyaxe wara ha. Ahnoro kicicitho pen komo tak makpayas amn̂e. Ero wa mas Apa noro yipu komo poko.
10 Omeretîrî warai tko mîpor̂mamnoyakn̂e paaka meretîrî warai ha, comota chewno meretîrî warai rma. Ow mîhkapekn̂e marha yaxan ke katî ke okre.
11 Ooxatî pîn pen komo reha mar̂mekn̂e owero ro rma. Kicicme cehsom komo mîkyam xatken̂e. Oyar̂ma xe xatken̂e. N̂examro pen yar̂machonho tak wencekn̂e.
12 On wara naxe kir̂wan komo, yow yepu wara por̂mamyaxe. Setru yepu wara marha por̂mamyaxe Ribanu pono wara porin me cehso ro ha.
13 Naatî wara naxe, Kporin komo mîn yaka ciixapu wara. Kaan roron po rma taxe tahwore tatîhtaxmu wara.
14 Cepetaxmu wara rma naxe tporitomontache so meero. Taakem wara rma naxe, cepetaxmu wara.
15 On wara kexe poritomo me cexiche so tak, Kir̂wanî ro me ciino rin̂e Mîk Kporin komo. Toopu warai Mîk oyececetotopo warai. Kicicme exihra ro mak nasî Noro, kexe. Ero wa kexe kir̂wan komo tporitomontache so.