On wara taxe Kyopono ro mîn yaw kenmayataw so enîhnî yaw, yîwya kawarpamacho yaw cepokarexe okre, Karitî ro ya kawarapamacho yaw ha.

2 On wara wîîkesî Kporin komo poko, Okurunpen̂e xa Mîk ha, owacan warai me cehsom marha. Kaan xa Mîk ha ponaro oyehtopo, wîîkesî. Ero ke Noro pona xa ween̂asî.

3 Anarimaw torowo yemcinotopo yawno wara na mai. Awowyasî tko Noro. Noro marha awir̂asî eper̂a nahsîtorî me, kwaihkacho nahsîtorî me.

4 Kapikara yon yaporî warai ke awahruyasî akurunpetome ha. Ero yipu makataka mîîcesî etkurunpeso. Noro mtapotarî nasî awecen̂an me. Yaarono mîn ha yîmtapotarî.

5-6 Anarî komo reha n̂eraswaxe ro mak kosope ahce na pona. Amoro reha erasîra masî ero pona. Erasîra marha masî waiwî pona, katpanaw tar̂maxmu pona. Erasîra marha masî eper̂a pona hara, awarpanaw kahsîn̂e pona. Erasîra marha masî kamarakataw tmohsom pona hara, kîwîrîmacho pona.

7 Amîtkoso rma na waihyatu 1.000 tooto pen komo okwe. 10.000 na waihyatu anarimaw apanaw rma kaari panaw. Amamrikyasî makî tko awaitopo.

8 Awewru ke makî tko meen̂asî kicicme cehsom komo yepemacho.

9 Ero wa mas amoro reha okre awesekenmarî ke Kporin komo yaka rma. Owacan warai Mîk Kyopono ro ha. Noro yaka rma mesekenmesî. Ero ke ero wa akurunpesî.

10 Aweporîra ro mak tak nasî awîrîmacho. Amîn yaka marha tohra nasî eper̂a.

11 Tancun komo nantomesî awenîrî poko. Ahce poko so na awexitaw n̂examro akurunpexe.

12 Cemyaw so rma awanîmyaxe ehtakatapara awehtome toh pona.

13 Reaw mapikyasî kar̂pamxan me cehsomu rma. Okoi marha mapikyasî, mapikyasî ro mak.

14 On wara kesî Kporin komo apoko, Ooxatî me cecisom mîk okre. Ero ke wukurunpesî. Îh pona wiir̂asî yiixatî pîn komo yai ro mak. Ero wa noro wiir̂asî oyosotî ponarono me exirî ke.

15 Oyakro nîmtapowasî noro takronomacho poko. Ero ke weyukyasî. Esemetanmekyataw noro yakro wasî. Wakronomesî, takîhsom me wenpesî.

16 Noro werepotanmekyasî pahkî waipîn me ehtopo ke. Kukurunpen̂e me oyehtopo wenpesî yîwya. Ero warai ke noro yipu werepotanmekyasî, kesî Kporin komo apoko. Ero wa kesî.