Moises Mtapotarî On Kaan Yakro, Kaan Yakrono Ro Mtapotarî Ha

1 Apa kah yawno, on wara wîîkes awya, amna yeken me masî Amoro meexaro rma. Amna porin pen komo n̂ixa rono komo yeken me rma mîxakn̂e.

2 Pahxanînhîrî ro mak Amoro Apa. Mîxakn̂e ro mak îîpî mko exihra ka exitaw. Roowo yakîhtora ka awexitaw mîxakn̂e rma, roowo pono komo yakîhtora marha ka awexitaw. Awehtopo yihcitopo exihra ro mak xakn̂e. Aawehtopo yenatîtopo exihra marha nasî miya roro. Kaanî ro xa Amoro eroromerono ha.

3 Roowonhîrî makî reha amna tooto. Amna waipuche amna miir̂asî roowo me xa hara. On wara mîîkesî amna ya, Roowo me tak ehcoko xa hara amyamro tooto me ewruxapunhîrî komo, mîîkesi amna ya.

4 Yohnono me mak nas awya 1.000 cimn̂ipu rma. Cewn̂e kaamo wara mak nas okyo, kokon̂orononho wara rma. 4 oora so mak sowtatu komo n̂etaraxe kosope waapa yenîrî poko ero wicakî pahkînon kyam mak nas awya 1.000 cimn̂ipu rma okyo.

5-6 Tooto komo maar̂asî roowo poi yukmarî ke aaxapu wara. Kîwîntopo wara marha naxe yohnono me mak. Pahxaxa ro so amna pakache cuupu amna n̂een̂asî atîhtaxapu. Yohno ro mak n̂eperwasî. Kokon̂i tko tîhkotosom me nas hara. Naawaiyasî thakwa tak okwe. Ero wa xa marha amna miir̂as hara Apa, yohno twaihsom me hara.

7 Amna mîwaiketîkes okwe arwon ke. Amna n̂eraswasî ro mak arwon pona.

8 Kicicme amna yehtopo miir̂akn̂e an̂enîrî me. Kicicme amna yehtopo xa mîweipesî awewru ke rma. Ekatîmnînhîrî rma mîweipes amna yehtoponho.

9 Poko arwonîmtopo mak amna Apa okwe. Ero wa amna n̂enmayasî roro. Yohno n̂he thakwa amna n̂enatkesî tan roowo po cehtopo, tpoko arwonîmtopo. Yohno so cimn̂ipu n̂enahcasî amna yewrutoponho, îh kacho wara mak okwe.

10 70 cimn̂ipu mak nasî waipîra amna yehtopo. Kar̂pe amna exitaw tko 80 cimn̂ipu n̂he cik na nai amna waipîra. Ero wicak exitaw tko amna yewrutoponho, pokaxapu wara mak nas amna, ahwokaxapu wara mak okwe. Ero yinhîrî roowo poi tarin̂em wara rma amna cesî.

11 Kar̂pe ro mak nasî arwon Apa. Onoke ma re nukuknome ero wa arwon yehtopo? Yaaro rma amna n̂eraswasî apona kar̂pe xa exirî ke arwon ha.

12 Ero wicakî yakenon mak na nai waipîra ka oyehtopo, kan̂e me amna cirko takîhso cehtopo ponaro xa amna yehtome.

13 Amok hara Apa. Ahcemaw xa mîmokya hara oona? Awanton xa amna. Ero ke amna pînîn yaw cma re masî.

14 Yohno cma re amna merepotanmekyasî tîpînîn yaw awehtopo ke rma. Ero wa cerepotanmekyataw tak awya, amna n̂ewanomesî. Tahwore tak nas amna twaihtopo pona roro.

15 Pahkî amna memetanmekyakn̂e mer̂pora kaamo. Yaake cimn̂ipu meero amna miir̂akn̂e cesemetanmesom me okwe. Ero ke ero wicakî pahkî xa marha amna ahworeko hara.

16 Kir̂wan̂he awya ciino ritopo enpoko amna ya, awanton komo ya ha. Kayaritomo me xa awehtopo enpoko amna xîkrî komo ya hara.

17 Cenporem xa Amoro Apa. Ero ke amna marha enpor̂ko cenpore xa awehtopo ke rma. Ehcamnopîn me marha cirko ahce na poko amna yehtoponho. Yaaro tan wîîkesî, ehcamnopîn me xa cirko ahce na poko amna yehtoponho. Ero wa mak wîîkes awya Apa.