Etan Yesehtînotopo On, Esuraita Mîk Noro Etan

1 On wara wasî, kewanomesî kîpînîn yaw Kporin komo yehtopo poko. Miya roro yîtîhkan me ro mak kewanomesî ero poko. Kemîknon̂e pîn me ro mak awehtopo marha wekatîmyas Apa. Miya roro ehretawnomaxapu komo ya meero wekatîmyasî.

2 On wara wîîkesî, kîpînîn yaw xa masî, kîpînînkan̂e pîn me ro mak. Kemîknon̂e pîn me awehtopo miir̂akn̂e kah yaka towîhnî me ro mak.

3 On wara mîîkekn̂e Apa, Awepamthîrî wakronomesî amn̂e, kacho poko kîmtapowakn̂e onmen̂ekatho yakro, Tapi yakro. Yaaro xa wîîkekn̂e yîwya towhnî me ro mak.

4 On wara wîîkekn̂e yîwya, Awepamthîrî wiir̂as amn̂e kayaritomo me towîhnî me ro mak. Miya roro ehretawnoxapu komo kayaritomon me rma Noro wiir̂asî, wîîkekn̂e yîwya, mîîkekn̂e Apa.

5 On wara kexe amn̂e kah yawno komo, Cirihnî ro ciin̂e ro Mîk Kporin komo okre. Kemîknon̂e pîn marha Mîk okre, kexe. Anakir̂wamathîrî komo ya ero wa kexe, esenmexapu komo ya.

6 Onoke ma re nai kah yawno Kporin komo warai? Onoke xa ma re nai karitî mumuru komo Kporin komo warai? Pîra ro mak.

7 On wara kapore nasî Kaan nakir̂wamatho ro komo yesenmekyataw, twerî xa men cexpore nasî Kaan poko. Ponaro xa men ehcoko amyamro Noro mîtwono komo.

8 Kaan Amoro Apa, kantoman̂e ro. Onoke ma re nai awarai karitî? Amamhoko nasî kemîknon̂e pînî ro me awehtopo.

9 Tuuna imo yîtwerman̂e Amoro cokohcoko kan̂e yîtwerman̂e. Porin me so exitaw yamarataka imo mîtîtîres hara.

10 Haabe pen makuhr̂apekn̂e ro mak waihkaxapu wara. Aaxatî pîn komo makpayakn̂e awaporî ke karitî ke.

11 Awyan mîn kaapu. Awyan marha on roowo hara. Pahxa roowo mapatan miir̂akn̂e. Roowo pono komo marha makîhcekn̂e ahnoro. Ero ke awyan me naxe.

12 Nohce yaw rorono makîhcekn̂e, suu yaw rorono marha. Awosotî poko tahwotaxmu wara nasî Tabo Yîpîn, Ehmon Yîpîn marha.

13 Karitî xa mîn awaporî, kar̂pe marha nas awamorî. Mapockanwasî xa kaar̂i ke.

14 Kayaritomo me masî kir̂wan̂he xa ciino rin̂e me awexirî ke, yaaro en̂ekano rin̂e me awexirî ke marha. Kîpînîn yaw awehtopo cesî apoturme, ero wara marha cesî kemîknon̂e pîn me awehtopo hara.

15 Tawake xa naxe apoko ahwotacho yentan̂e komo. Awewru rma nasî noro yipu komo weipon̂e me ahna so na cetaw so.

16 Awosotî poko nahwowaxe noro yipu komo kokmamso ro. Tahwore xa natu kir̂wanî ro me awehtopo poko.

17 Noro yipu komo yakir̂waman̂e xa Amoro Apa, karihton̂e marha. Amna mîkaricesî amna xe awexirî ke.

18 Kporin komo n̂iritho mîn kecen̂an komo, Kir̂wanî ro yanton marha mîk kîkayaritomon komo, ponaro Ixaw Yana komo yehtopo yanton ha.

19 Taa, on wara wîîkes hara, pahxa mîmtapowakn̂e aponarono pen komo yakro. Enîhnî menpekn̂e yîwya so. On wara mîîkekn̂e yîwya so, Karitî xa wakronomai, apoyino komo men̂ekekn̂e Ow kayaritomo me ciisom.

20 Tapi mîk noro ween̂akn̂e oyanton mexan xa. Noro wîhkapekn̂e tak owyanî ro ke katî ke.

21 Noro wecehcesî oyamorî ke, karihcesî marha oyaporî ke.

22 Opurantan men tîmko roro, kahra naxe anarî komo yîwya, kayaritomo komo. Kicicme cehsom komo n̂emetanmekrî me exihra ro mak nasî noro.

23 Yiixatî pîn komo war̂mesî noro wero ro. Yiixatî pîn komo Ow paraxkesî.

24 Onwakrerî me roro nasî noro. Yîpînîn yaw marha was Ow. Kaan yanan mîkro, kacho me exirî ke yukurumîkno me nasî.

25 Tuuna imo kwawno komo nahsîyasî noro tamorî ke. Tuuna yepu kwawno komo marha nahsîyasî tamorî ke kaari ke. Ero wa nasî oyanme.

26 On wara kesî noro owya, Oporin Amoro. Kaan marha Amoro ponaro oyehtopo ha. Toopu warai marha Amoro oyececetotopo warai, epîrkan me orin̂e ha, kesî owya.

27 Omumuru me tak noro wiir̂asî, poturme ewruxapu me. Noro wiir̂asî kayaritomo me xa tak, roowo poko hakno kayaritomon komo yopono me.

28 Yîpînîn yaw wasî miya roro yîpînînkan me ro mak. Omtapotachonho towîhra ro mak wasî, Kakronomesî amn̂e, kachonho yîwya.

29 Noro yepamtho marha wiir̂asî kayaritomo me eroromero. Pahkî xa nasî kah yawno komo ehcamnopîra ro mak, ero wicakî pahkînon xa marha Noro wiir̂asî kayaritomo me hara.

30-31 Anarimaw yumumuthîrî komo na natu oponarora. Omtapotachonho yewetîra tak na natu tpanatanmetopo komo. Owya apanaretopo komo yaw rorohra na nat okwe.

32 Ero wa exitaw so n̂examro panaresî Ow oyamoyin ke. Kicicme ehtoponhîrî komo yanme, yîhyokn̂e komo wara marha wasî.

33 Wara rma noro yakronoman̂e me rma wasî yîtîhkara. Emîknono rin̂e pînî ro mak Ow. Ero ke noro yemîknopîra ro mak wasî.

34 Kwakresî men amn̂e, wîîkekn̂e yîwya ero wa kachonho ponaro wasî miya roro. Omtapotachonho towîhra ro mak wasî.

35 Yaaro xa ero wa wîîkekn̂e Tapi ya. Kicicme exihnî me ro mak oyehtopo wetahcakn̂e yaaro xa omtapotacho kuknon me. Ero wa nasî omtapotacho Tapi yakro, cemarontara ro mak kîmtapowasî noro yakro.

36 Noro yepamtho nasî waipîn me ro mak. Pahkî nasî kaamo eseikara, ero wicakî pahkînon xa marha noro yepamtho nasî kayaritomo me oyanme rma.

37 Pahkî marha nasî nuun̂i. Kah yawno ro mîn, kemîknon̂e pîn me oyehtopo yenpon̂e me roro nasî. Ero wicakî pahkînon marha nasî Noro kayaritomo me, kekn̂e. Ero wa wîîkekn̂e Tapi yepamtho poko, kekn̂e Kporin komo.

38 On wara tko wîîkes awya Apa, amna rma mahsîpînkekn̂e okwe. Amna ponarono pîn wara mîxakn̂e. Anîhkapethîrî poko mîrwonakn̂e xa okwe.

39 Amtapotachonhîrî rma tko mowye okwe, awanton ya mîîkekn̂e ero wa kachonho ha. Yîxapikanthîrî mar̂mekn̂e roowo pona ero pîntho wara ro mak okwe.

40 Yîmîn wacantho mawkekn̂e ahnoro. Sowtatu wacan marha mixketîkekn̂e yahcononhîrî.

41 Noro yemyawnonho tak naar̂axe okwe yîhyari tîtosom komo rma. Yîmîtwono komo reha n̂etaporexe tak noro poko.

42 Yiixatî pîn komo xa matko mîkaricekn̂e noro yopo okwe. N̂examro mahworekn̂e ahnoro okwe.

43 Kaman̂e pîn me marha tak miire noro kaciparantho, tahtara kan̂e me mak okwe. Waapa komo yakro etar̂metaw waapa yopono me noro cirihra mîxakn̂e okwe.

44 Pahxa kayaritomo menpekn̂e kayaritomo me xa. Ewetîn me tak menpes oroto okwe. Noro yaponho marha tak mar̂mai kr̂a roowo pona kayaritomo me esenpotoponhîrî ha.

45 Kar̂pamxan me noro yehtoponho yohno n̂enahce awanme rma okwe. Cehn̂axmu me ro mak tak miir̂akn̂e noro pen okwe.

46 Atî wicakî pahkînon ero wara mai noro poko Apa? Eroromero katî meseyamya okwe? Atî wicakî pahkî xa mîrwona wehto wara ro mak?

47 Yohnono me mak tan roowo po oyehtopo ponaro cma re masî. Tohnawno me makî katî amna makîhcekn̂e tooto komo?

48 Nai ha ma re tooto waipînî ro? Nai ha ma re tanme ro mak cekaritosom, ewtarî yaka tohnî ro?

49 Apa, ahto tak nai amna xe awehtoponhîrî oroto? Aaxe ro mak wasî miya roro, mîîkekn̂e cma re Tapi ya. Yaaro xa mîîkekn̂e yîwya. Tohnaw yîmtapotanî ro mak Amoro.

50 Awanton mak ow Apa. Opoko tko n̂etaporexe mer̂pono pîn komo kica. N̂erewasî thakwa oropotarî ero yipu yencetaw owya. Anarî yana komo n̂etaporexe opoko kica mer̂pono pîn komo. Ero wa etaporetopo komo ponaro cma re masî oroto.

51 Aaxatî pîn komo mîkyam n̂etaporexe opoko Apa. Oyetar̂ataw roro opoko n̂etaporexe okwe. Anîhkapethîrî rma cma re ow, wara rma opoko n̂etaporexe. Ero wa naxe okwe.

52 Kir̂wan̂he xa mai ham okre, kapore roro nasî Kporin komo ya miya roro eroromero, wîîkesî rma tko. Yaaro xa ero wa wîîkesî. Ero wa mak wîîkesî.