Kore Mumuru Komo Wanorî On, Waano Yaan̂e N̂enîrî. Cerewre Xa Kesemetanmekyasî, Kacho On, Maskiw Me Taasom. Eman Wanorî On, Esuraita Mîk Noro Wanorî Ha.

1 Apa kah yawno, okurunpen̂e ro xa Amoro. On wara cma re wîîkes awya, Emapona roro kîmtapowasî awakro. Katpanaw kîmtapowasî, kosope marha. Cerewre ro mak kîmtapowasî awakro.

2 Ero ke omtapotarî cma re mencesî. Owece esewkor̂makî omtapotarî yentachome, owratarî me kîmtapowasî ero yentachome esewkor̂makî.

3 Kesemetanmekyasî ro mak okwe. Roowo yatumnaka owtorî yaro xa wai ham okwe.

4 Roowo yatumnaka tîhtosomu kr̂a mîkro, kexe ooxatî pîn komo. Kar̂pen wara ro mak was okwe.

5 Ahsîpînkaxapu wara wasî waihxapu pen komo wara ro mak okwe. Ar̂maxapu pen komo wara marha wasî, okoputhîrî komo nasî roowo chew ero wa. Noro yipu pen komo ponarora mas okwe, wakren̂e komo me exihra marha mas okwe. Noro yipu pen komo wara rma wai ow ham okwe.

6 Ewtarî yakan wara ow mahruyakn̂e yuhnakan yaka. Yuhnawno wara ow miir̂akn̂e awarpanawno wara xa.

7 Oyerewnukn̂e wara nasî arwon oko. Oyopo ro mak cesî yamarataka imo koomo an̂irithîrî ha.

8 Oyakrononho komo men̂epekn̂e mooxe okwe. Poxumnî me ro mak ow menpekn̂e yîwya so. Ahruxapu me mak wasî epatakan me ro mak okwe.

9 Cewxîrpe tak wasî oyesemetanmekrî ke. Enmar̂atîxera kîmtapowasî awakro oyakronomacho poko Apa. Kapockanwas awece, Ow akronomakî, wîîkes awya.

10 Cirihnî ma re miir̂a waixapu pen komo n̂enîrî? Waixapunhîrî komo ma re paket hara kir̂wan̂he awehtopo poko tîmtapotachome so xa hara?

11 Roowo yatumnawno komo ya ma re wekatîmya wakreno rin̂e me awehtopo? Kemîknon̂e pînî ro me awehtopo ma re wekatîmya kehcamnotopo po oyexitaw?

12 Awarpanawno komo ma re n̂een̂atu cirihnî ciitopo awya? Kir̂wanî ro me awehtopo ma re n̂een̂atu twen̂ekarî kehtopo tono komo?

13 Kehsamesî rma tko apoko Apa. Pahxaxa ro rma omtapotarî mencesî.

14 Ahce poyero ow mahsîpînke Apa? Ahce poyero mesewyahruya awenîra oyehtome okwe?

15 Omrenai ro rma kesemetanmekyakn̂e. Emapona roro waihporo wîxakn̂e okwe. Keraswakn̂e ro mak ahce wa na oritopo pona awya. Ero yanme keserepokesî ro mak okwe.

16 Arwon xakn̂e yamarataka imo wara oyenorinokan̂e wara. Awya oyeraspetopo oporokai okwe.

17 Kokmamso ro mak ween̂asî oyeraspetopo awya. Yukmarî chewno wara ro mak wasî enoriporono wara kopi.

18 Oyakrononho komo maar̂akn̂e mooxe okwe, oyananî ro komo marha. Awarpan mak tak nasî oyakrono ro me. Ero wa ow miir̂akn̂e Apa.