86
Tapi Mtapotachonho On Kaan Yakro. Apoko Cehsamaxmu Komo Pînîn Yawno Ro Mak Amoro Apa
1 Apa kah yawno, omtapotarî cma re mencesî. Ow eyuhko. Kar̂pen mak ow ha. Kesemetanmekyasî thakwa okwe.
2 Waipîra cma re ow miir̂asî. Aponarono xa ow. Kaan xa Amoro ponaro oyehtopo ha. Awanton ow, apona enîn̂e. Ero ke ow yukurunpeko.
3 Opînîn yaw esko Apa. Awakro cma re kîmtapowasî kokmamso ro oyakronomacho poko.
4 Awanton ow Apa. On wara wîîkes awya cerewre, Ow ahworeko, wîîkesî.
5 Kwakren̂e xa Amoro Apa, kehtoponhîrî komo yîhcamnon̂e ro marha. Apoko cehsamaxmu komo pînîn yawno ro mak Amoro.
6 Omtapotarî entak Apa. Kehsames apoko. Ero ke cma re ow mencesî.
7 Oyesemetanmekyataw kîmtapowasî tak awakro. Omtapotarî rma meyukyasî.
8 Ponaro anarî yana komo yehtopo rma re naxe merpora. Awarai xa tko exihra ro mak nas Apa. Kir̂wan̂he ro mak ciino miir̂as Amoro, ponaro n̂examro yehtopo komo warahra.
9 Anakîtothîrî komo rma mîkyam mîk hak rowon pono komo. N̂examro tak mokyaxe amn̂e ahnoro ahyaka. Amna porin Amoro, kexe awya. Kir̂wan̂he Kaan nai ham okre, kexe marha apoko.
10 Kyopono ro mak Amoro, cirihnî ciin̂e ha. Kaan Amoro, Amoro mak cewn̂e.
11 Ero ke ow akîhreko Apa, awehtopo poko. Ero wa ow akîhreko amtapotarî yaw roro tak oyehtome, yaarono yaw roro ha. Cewn̂e yatî ponarono me mak oropotarî cirko Apa, twerî awetacin̂e me oyehtopo ponaro.
12 Kir̂wan̂he xa mai ham Apa, wîîkes awya tahwore ro mak. Miya roro kîmtapowasî kir̂wanî ro me awehtopo poko, yîtîhkan me ro mak.
13 Opînîn yawno ro xa Amoro. Roowo yatumnaka tîtosom me xakn̂e oyekatî. Amoro cma mîporokai.
14 Owaparî komo mokyaxe okwe Apa, kyopono me cesehtînosom kom ha. Kîpînîn yawno pînî ro mak mîkyam owaika xatî komo. Aponarono pîn komo mîkyam kica.
15 Kir̂wanî ro tko Amoro, kîpînîn yawno xa, kwakren̂e ro marha. Ero warai Amoro Apa. Yamoro cetîrwonmesom marha Amoro, kîpînîn yawno ro, yaaro tîmtapotaxmu ro marha. Ero warai Amoro Apa.
16 Owece cewru tak esko, opînîn yaw esko. Awanton mak ow. Ero ke ow karihtoko awehtopo ke rma. Awanton me marha nas onocwan hara. Ero ke ow yukurunpeko yîmrerî ha.
17 Kir̂wantaw tak ow wakreko ooxatî pîn komo n̂enîrî me rma. Ero yipu yenîche tak cehn̂axmu me n̂esenpexe. Ero wara n̂esenpexe oyakronomarî ke awya, oyahworerî ke marha awya okre. Ero wa naxe.