Waano Yaan̂e N̂enîrî On, Kore Mumuru Komo Wanorî

1 On wara wîîkes awya Apa, arowon pono komo tak makronomekn̂e okre. Xako yepamtho komo mekyakn̂e hara oona waapa narîthonhîrî komo.

2 Kicicme ayanan komo yehtoponho mîhcamnoyakn̂e. Kir̂wanhe exihra ehtoponhîrî komo mahruyakn̂e ahnoro.

3 Rîîwoxe ro makî ka mîxakn̂e. Oroto tak metîrwoxinkesî tak hara okre. Mîrwonakn̂e ro makî ka. Wehto roron wara xa xakn̂e oco arwon. Oroto tak yîrwomra mas hara.

4 Kakir̂waman̂e ro Amoro Apa. Ero ke amna akir̂wamak hara. Amna poko arwonîmtoponhîrî cma re mahsîpînkesî.

5 Eroromero katî wa mai rîîwoxe amna poko? Miya roro esepamkaxapu komo poko meero mai rîîwoxe?

6 Amna cma re mahwores hara ayanan kom ha apoko tak amna yahwotachome.

7 Kîpînîn yawno ro me esenpoko Apa amna ya, anakir̂wamarî me amna cirko. Ero wa cma re wîîkes awya Apa.

8 Kaanî mtapotarî ka wencesî Kporin komo mtapotarî. On wara kesî Noro tîyanan komo poko, Ahwokan me tak noro yipu n̂iir̂asî tîmtapotarî ke rma. Ero wa nasî tînakir̂wamathîrî komo poko. Ero pîntho ponarono me exihra ro mak tko men n̂ehcowpe xa hara okwe, kesî Kporin komo.

9 Pahnoke tak nasî kakir̂wamacho komo, Kaan poko tweeno komo yakir̂wamacho. Ero wa tantono komo nakir̂wamesî kir̂wanî ro me cehtopo yesenpotome tan krowon komo po.

10 Asakî nasî Kaan yehtopo, kîpînîn yawno me nasî, yaarono me marha nasî. Noro re rma ero wara nasî. Ero wa xa marha nasî Noro yehtopo hara, kir̂wan me nasî, tawake marha nasî. Cesewcokaxmu wara nasî ero wa Noro yehtopo asakî. Ero wa nasî Kaan.

11 Yaarono me Kaan yehtopo n̂epatakesî yuhnai. Kah yaw nasî kir̂wanî ro me Noro yehtopo. En̂exa kenîn̂e wara nasî.

12 Kwakrexe so wa Kaan amn̂e. Noro yanme mak tak kmararîn komo pono n̂eperwasî, numunwasî marha.

13 Kir̂wanî ro me Kaan yehtopo cesî Noro poturme. Noro yesamarî yakir̂waman̂e me cesî. Ero yawno me tak kiir̂axe so, Noro wenatho yaw xa marha kîwtotome so kîwyam hara. Ero wa kiir̂axe so.