Waano Yaan̂e N̂enîrî On, Kace Pono Komo Ratîn Yakro Taasom. Kore Mumuru Komo Wanorî On.

1 On wara was Apa, cenpore xa ween̂asî amîn okre. Kantoman̂e ro Amoro.

2 Kporin komo roron po oyexi xe ro mak wasî. Expora ro mak wasî ero po oyexi xe. Kaan yaw oyexi xe ro mak wasî waipînî ro yaw, wîîkesî cerewre ro mak. Oropotarî kesî ero wara, opun marha.

3 Torowo meero n̂iir̂asî takowerî awya tîmsom yakn̂itopo mîtkoso Apa. Cor̂or̂wa marha iina n̂iir̂asî cewtarî, tuhme yahkamexpocho. Kantoman̂e ro Amoro Apa, okayaritomon ha. Kaan xa Amoro, ponaro oyehtopo.

4 Tawake xa naxe ahyawno komo. Miya roro nîmtapowaxe kir̂wan̂he awehtopo poko.

5 Tawake xa naxe karpe awehtopo ke mak cekaritosom komo. Awenso tîtotopo komo ponaro marha naxe. Ero ke tawake naxe.

6 Anarimaw so tarenakem yari rma cexe noro yipu komo, Baka kacho yari. Tuuna pîtho ken̂arî me rma tko n̂iir̂axe roowo iitono. Tuuna marha mokyasî iito exitaw so, akawanî komo yaka n̂esenmekyasî.

7 Kar̂pe ehxapunhîrî komo rma tak kar̂pe xa tak naxe hara. Ero wara naxe miya roro, Kaan yaka tîtotopo komo pona roro, Siaw pona tîtotopo komo pona roro ha.

8 Kantoman̂e ro Amoro Apa. Omtapotarî cma re mencesî. Ponaro Xako yehtopo Amoro Apa. Owî cma re ka mencesî.

9 On wara wîîkes awya Apa, Kaan xa Amoro. Amna yecen̂an enko. Anîhkapethîrî wece enko owece ha.

10 Tawake xa wasî cewn̂e kaamo mak oyexitaw ahroron po. Ahroron pîn po oyenmayataw reha 1.000-îro meero tahwore exihra rma was okwe. Kaan mîn metatan yenîn̂e me mak na wai anarimaw, ponaro oyehtopo mîn metatan ha. Tawake was ero yenîn̂e me kyam mak oyexitaw. Ahwora ro mak wasî kicicme cehsom komo mîn yawno ro me oyexitaw reha.

11 Kaamo warai me nasî Kporin komo Kaan. Kecen̂an warai me marha nasî. Kwakren̂e me nasî Noro, takîhsom me kenpon̂e me marha. Ahce na kir̂wan yamenmekîra ro mak nasî. Ero yipu tîmn̂e me ro mak nasî kir̂wan komo ya.

12 Kantoman̂e ro Amoro Apa. Tawake ro mak naxe apona enîn̂e komo. Ero wa naxe.