Asape Wanorî

1 On wara wîîkes awya Apa, tîtken̂e mak exihra esko. Yîmtapotan me exihra esko Apa, tîî kahra ro mak esko.

2 Wara hak kexe okwe aaxatî pîn komo. N̂esewankaricexe tak okwe.

3 Ayanan komo yar̂macho poko n̂esencexe. Emku me mak ar̂ma xe naxe. Ankurunperî komo yar̂macho poko n̂esencexe.

4 On wara kexe kica, Amohcoko, Kaan yanan komo kr̂a tar̂macerî. Kayaritomonhîrî pen komo kr̂a tîtwaikacerî. Ero wa ciicerî Ixaw Yana komo yosotîtho yehcamnotome kr̂a tak eroromero, kexe.

5 Etîme re n̂esehtînoyaxe awar̂macho poko Apa okwe. On wara kexe, Cetakronomacerî Kaan yîwîrîmacho poko, kexe okwe.

6 Ero wa kexe Eton mîn yawno komo, Ismaerita komo, Moabe yepamtho komo, Akarenu komo,

7 Xebaw pono komo, Amon komo, Amareke komo, Piristew komo, Ciru pono komo,

8 Asiriu komo meero n̂examro nakronomexe. Ero wicakî naxe Roo yepamtho yakronoman̂e komo.

9 Apa, n̂examro ar̂makî Micianita pen komo mar̂mekn̂e ero wa xa marha. Sisera pen mar̂mekn̂e Kison yewkuru yecihtaw. Xabin pen marha mar̂mekn̂e iito.

10 Entoro po n̂examro pen waihyatken̂e. Weetî wara ro mak xatken̂e. N̂examro pen wara rma tak aaxatî pîn komo cirko oroto.

11 N̂examro kayaritomon komo waihkakî. Orebe pen mîwaikekn̂e, Seebe komo, Seba komo, Sawmuna komo.

12 On wara tî ketken̂e n̂examro pen pahxa, Kaan rowontho tahsîcerî cuupu yewtî, koh komo nahrî yewtî me ha, ketken̂e tî.

13 Roowo pupuntho wara ro mak n̂examro cirko Apa, tosu kan̂e wara. Puruma pîpîtho wara marha cirko, ocowo narîrî wara.

14-15 Mararî n̂ecakyasî amaxapu. Peen poko n̂etahsîyasî wehto îh pono poko. Ero wa n̂examro pen weken̂emeko awocowon ke. Awocowon ke n̂examro eraspeko karitî ke.

16 Tîhyapamsom me xa tak n̂examro cirko. Ero wa n̂examro cirko awosotî ponaro tak ehtome so.

17 Ahce okwe, kan̂e me roro n̂examro cirko. Ahce wa ma yo tatu kopi? kan̂e me marha cirko eroromero. Cehn̂axmu me ro mak tak waihcowpe.

18 Ero wa awehtopo enpoko on wara kachome tak tooto komo awya, Kporin komo, kacho me mak masî Amoro mak. Kyopono ro xa Amoro, roowo poko hakno komo yopono ro xa, kachome awya. Ero wa awehtopo enpoko yîwya so. Ero wa esko Apa.