Asape Wanorî On.

1 On wara nasî Kaan, karitî komo yesenmekyataw iito nasî Noro yîchew so. Ponaro anarî komo yehtopo yen̂ekan̂e me nasî.

2 Atî wicakî pahkînon yaarono mera en̂ekano miir̂at ha? Atî wicakî pahkînon kicicme cehsom komo yen̂ekara mat ha?

3 On wara xa yo ehcoko ha ke, yukurumnî komo yukurunpecoko, yîmîhnî komo marha yukurunpecoko. Yupurantamnî komo yukurunpecoko, emetanmexapu komo marha.

4 Yukurumnî komo n̂emetanmekyaxe kicicme cehsom komo. Ero ke tak yîn̂emetanmekrî komo mera tak n̂examro cirko Apa.

5 Camkî ro mak naxe tooto komo okwe. Yuhnari yîhtînon̂e mera ro mak naxe. Awarpanaw mak n̂etar̂axe okwe. Epîrkaporono me tak nas okwe roowo mapatan ahnoro.

6 On wara wîîkekn̂e oyanan komo ya, Kaan me cehsom amyamro. Kyopono mumuru komo xa amyamro ahnoro, wîîkekn̂e awya so.

7 Wara rma mîwaiyaxe thakwa tooto wara rma. Antomano rin̂e komo waihyaxe ero wa xa marha mîwaiyaxe amyamro hara.

8 Piiri tak awomko Apa, roowo pono komo tak en̂ekak Amoro. Anahsîrî me rma naxe mîk hak maywenînho komo ahnoro amaywen me. Ero ke cen̂ekapore tak nasî. Ero wa cexpore nasî.