Waano Yaan̂e N̂enîrî On, Asape Wanorî. Kace Pono Komo Ratîn Yakro Taasom On

1 Oyakno komo, on wara wîîkes awya so, ewanomacoko Kaan n̂entarî me, kîkariton̂e komo n̂entarî me ha. Tahwore ro mak ewanomacoko. On wara marha kacoko Kaan ya, ponaro Xako yehtopo ya, Apoko amna nahwowas Apa okre, kacoko. Kar̂pe ro mak kacoko yîwya.

2 Raatî yakro waano aacoko. Chachacha kacho etapacoko, ahpa marha iyorkacoko centaporem ha, sawter̂u marha iyorkacoko.

3 On wara marha ehcoko, nuun̂i yepatakache roro tuu kacoko. Nuun̂i yepunwache hara tuu kacoko xa hara kahwotacho komo po.

4-5 Ero poko rma Ixaw Yana komo nantomekn̂e Kaan, ponaro Xako pen yehtopo ha. Xose yepamtho komo marha nantomekn̂e ero poko. Ero wa panatanmekno n̂iir̂akn̂e Kporin komo Exitu pono komo rowon pore tîcetaw. Camkî wencekn̂e iitono komo mtapotarî okwe.

6 On wara kesî Kaan awya so ero poko, pahxa Exitu po exitaw so aporin pen komo xatken̂e tmotawnoi so tawsîn̂em ke. Ero yaan̂e mera n̂examro wiir̂akn̂e Ow. Awci warai mera marha tak n̂examro wîîr̂akn̂e, kesî Kaan awya so.

7 Awesemetanmekyataw so Ow tak man̂ikyatken̂e. Ero ke kakronometken̂e so tak. Eyamxapu me mak nasî tarai yeken. Iito marha wîxakn̂e Ow. En̂exa rma keyukyatken̂e so. On wara marha kiir̂atken̂e so, Meriba yecihtaw awexitaw so kukukmetken̂e so. Oponaro nat ham, kachome tak owya apoko so.

8 On wara wîîkekn̂e awya so, Ai, oyanan komo amyamro, kweronomexe so. Ixaw Yana komo amyamro, omtapotarî yenta xe ro mak tak was awya so.

9 On wara wîîkekn̂e awya so, Achew so exihra ro mak n̂expe ponaro anarî yana komo yehtopo. Oporin amoro, kahra ro mak ehcoko ero yipu komo ya.

10 Ow xa Ow ha Aporin komo, ponaro awehtopo kom ha. Exitu poi awekn̂enhîrî komo rma Ow. Emtayankacoko tak. Yiixe awehtopo komo tak wîîr̂asî amtaka so copoyi cehso ro, wîîkekn̂e awya so.

11 On wara tko wîîkes apoko so, omtapotarî yenta xera xatken̂e oyanan komo okwe. Poxumra ro mak ohtînoyatken̂e Ixaw Yana kom okwe.

12 Kanwekn̂e me ro mak xakn̂e kica yîropotarî komo. Ero ke ero wara rma n̂ehcowpe yîropotarî komo yanme rma. Awanme ro so kyam mak ehcoko, wîîkekn̂e yîwya so.

13 Omtapotarî yentan̂e me exi xe so ro mak wasî oyanan komo. Oyehtopo yaw rorono me exi xe so ro mak wasî Ixaw Yana komo okwe.

14 Ero wa exitaw so yiixatî pîn komo kr̂a wen̂epesî yohno rma. Yiixatî pîn komo yemetanmekn̂e me tak was Owî ero yimaw.

15 Ero wa exitaw so Kporin komo xatî pîn komo tak nutupenwaxe tanmenkera Noro mamakan me. N̂etwîrîmexe ro mak okwe eroromero, kicicme cehtoponhîrî komo yepetho me.

16 Ero wara awexitaw so amyamro reha kurmexe so tak puruma ke, kir̂wanî ro ke. Ween marha wîmyas ha re awya so an̂emerî komo awerepotacho komo. Toopu yetîmtakaxapu yawnonho wîmyas awya so okre. Ero wa kiir̂axe so omtapotarî ponaro awexitaw so tak.