Waano Yaan̂e N̂enîrî On, Asape Wanorî. Epemrutun Wara Nasî Kaan Ya Kwakrecho Komo, Kacho Me Taasom On,

1 Apa kah yawno, amna mtapotarî cma re ka mencesî. Oper̂a yosom warai Amoro, Ixaw Yana komo yaan̂e. Oper̂a naar̂asî osom ero wara rma Xose yepamtho komo maar̂asî. Kerubin yotaw nas awapon. En̂exa tak amna katpareko.

2 Ekaritoko tak Apa. Amoko amna yakronomaxi. Eprain yepamtho komo wero ro ekaritoko, Benxamin yepamtho komo wero ro, Manase yepamtho komo wero ro marha.

3 Amna akir̂wamakî xa hara Apa. Cewtawake tak esko amna wece amna yukurunpetome tak awya.

4 Kaan xa Amoro, kantoman̂e ro. Ayanan amna ha. Awakro cma re amna nîmtapowasî. Amna poko mîrwona ham okwe amna mtapotarî yenta xatî pîn wara. Atî wîcakî pahkî na ero wa mîrwona?

5 Amna yewyokutho mîmyakn̂e amna yuru wara. Cewyokuthîrî ke marha amna mîwokpekn̂e mer̂pono pîn ke ro mak.

6 Amna mîtwono n̂eirî me mak amna miire okwe. Amna poko mak n̂ewrexe okwe amna xatî pîn komo.

7 Amna akir̂wamakî xa hara Apa. Kantoman̂e ro Amoro. Cewtawake tak esko amna wece amna yukurunpetome tak awya.

8 On wara mîxakn̂e Apa, anatîrî warai amna, naatî yatî warai. Ero yipu mekyakn̂e Exitu poi. Mîk hak maywen komo tak men̂epekn̂e ekenhîrî komo poi. Ekenhîrî komo pona tak miir̂akn̂e an̂ekîthîrî anatîrî me hara.

9 Ewtî ka maiwekn̂e cokorî ciitome tak awya. Ciixapu tak natîkwakn̂e, n̂imicinwakn̂e, por̂mamyakn̂e marha. Roowo tak nawronohketîkekn̂e.

10 Îîpî yawarpamacho me meero tak xakn̂e. Weewe komo marha nahruyakn̂e setru yepu porin komo rma.

11 Miya ro mak tak n̂eseknacekn̂e tuuna imo yecihtaka roro. Xiya tak petawakn̂e hara tuuna yepu yecihtaka hara. Ero wa natîkwakn̂e.

12 Ero ke ahce wa exirî ke anatîrî wacantho mixkekn̂e hara Apa? Wacamra exirî ke tak ero yari tîtosom komo pohcaxe uupa yeperîrî ha.

13 Yimicinthîrî tak namikexe pon̂ko komo okwe. Ero ke naawaiyasî thakwa okwe. Yathîrî nahyaxe tanhamya cetarisom kom hara okwe.

14 Amna yaka cma re mîmokyas hara Apa, kantoman̂e ro Amoro, kah yawno ha. En̂exa amna enko, tîwîrîmaxi thakwa amna nasî, enko xe. Anatîrî yenîn̂e me tak esko hara.

15 An̂atîrî rma mîn. Awamorî ke rma miir̂akn̂e kaari n̂ixan ke. Uupa peremru warai rma mîn, anatîkrerî ha.

16 Tamaxi tak nas okwe anatîrî, cecahso nas okwe. Ayanan komo waihyaxe okwe. Awepatarî nasî n̂examro pen yein̂e wara. Ero ke rma waihyaxe okwe.

17 Apanaw tak n̂expe Noro awakrono ro kaari panaw. Tooto mumuru rma Mîk anatîkrethîrî naatî. Ero ke Noro tak akronomakî.

18 Ero wa amna yakronomache awya etowîn me ro mak tak nas amna. Amna karihtoko awosotî ponan me tak amna mtapotachome awakro.

19 Amna akir̂wamakî xa hara Apa. Kantoman̂e ro Amoro. Cewtawake tak esko amna wece amna yukurunpetome tak. Ero wa esko amna poko.