Asape Wanorî On.

1 Apa kah yawno, on wara wîîkes awya, aweken pona mohce mîk hak maywen komo. Waapa me mohce okwe. Amînî ro pen n̂ikiciciretken̂e kica. Xerusaren tak nasî yukpurukpuruntho yewtî me okwe, ewtotho pen ha.

2 Amaywenînhîrî komo puntho nîmyatken̂e kwacinama komo yotî me okwe. Anakir̂wamathîrî komo puntho nîmyatken̂e kamara warai komo yotî me hara.

3 Xerusaren pono pen komo kamxukutho n̂en̂epetken̂e mer̂pora ro mak Xerusaren mamhoko. Tuuna wara ro mak n̂en̂epetken̂e kamxukuthîrî komo. Okoputhîrî komo yahrun̂e exihra ro mak xakn̂e okwe.

4 Tîmîtwono komo nîwîrîyakarî me ro mak tak amna xakn̂e. N̂ewretken̂e mak kica amna poko.

5 Atî wicakî pahkî ero wa mai Apa amna poko? Eroromero katî mîrwona amna poko? Miya xe xa tak awosotî yewyomacho ke mîrwona wehto wara ro mak oco. Atî wicakî pahkî ero wara mai?

6 Mîk hak maywen komo poko xa matko arwonîmko Apa. N̂examro xa naxe aponarora okwe. Awosotî ponan me awakro yîmtapotanî ro mak mîkyam. Ero ke n̂examro poko xa arwonîmko.

7 Xako yepamtho komo yermomn̂e wara ro mak xatken̂e n̂examro okwe. N̂examro yewtontho pen nîwîrîmetken̂e ro mak okwe.

8 Kicicme rma re xatken̂e amna porin pen komo kica. N̂examro pen yehtoponho cirihra cma re mas amna pona hara. Amna pînîn yaw cma re masî oroto rma, yohno Apa. N̂esemetanmekyasî ro mak amna okwe.

9 Amna yakir̂waman̂e Amoro Apa. Ero ke amna akir̂wamakî. Kir̂wan̂he xa nai Kaan ham okre, kachome tak amna ya. Ero wa amna akir̂wamakî. Kicicme amna yehtoponho ahruko. Ero wa cma re amna miir̂asî awosotî yîwîrîyakara ehtome so mîk hak maywen komo amna poyero.

10 On wara men kexe n̂examro, Ahto ma re nai ponaro Ixaw Yana komo yehtopo? kexe kica. Amaywen pen komo waihkachonho epanîko Apa amna wero ro. Ero warai me awehtopo yîhtînomexpoko mîk hak rowon pono komo ya hara.

11 Okwe okwe, kexe kahrutopo yawno komo. Ero wa kacho yentan̂e me tak esko. Anarî komo naxe, Twaihkaxmu kr̂a moxam, kacho me okwe. Noro yipu komo yukurunpeko Apa, kar̂pe ro mak awehtopo ke.

12 Awîrîyaketken̂e kica Apa, amna mîtwono komo. Ero ke n̂examro tak cirko tîwîrîyakaxmu me hara. Cewn̂e ro awîrîyakachonhîrî epanko 7 ro n̂examro yîwîrîyakacho ke hara. Enaka so ar̂man̂e wara esko yîwîrîyakacho komo. Ero wa esepanko.

13 Ero wa awesepanpuche tak kir̂wan̂he awehtopo poko amna nîmtapowasî. Miya roro amna nîmtapowasî ero poko yîtîtmamnî me ro mak. Ayanan amna Apa, awoku warai, oper̂a warai. Cepamthîrî komo yakro marha amna nîmtapowasî kir̂wan̂he awehtopo poko, n̂examro yepamtho komo marha nîmtapowaxe miya roro ehretawnomaxapu kom ha. Ero wa amna nîmtapowasî.