Asape Wanorî On, Maskiw Me Taasom

1 Oyakno komo, kîmtapowasî tan kpanatanmetopo komo poko. Ero ke omtapotarî ka entacoko.

2 Anarî pokono wara kîmtapowasî. Pahxan pen komo mtapotachonho tan wekatîmyasî camkînonhîrî.

3 Ero rma cencetken̂e, ponaro rma tîxatken̂e. Kîwya so n̂ekatîmyatken̂e kporin pen komo.

4 Yîmtapotachonhîrî komo yeyamra taxe kîmxîkrî komo n̂entatorî me. Cekatîmyasî rma yîwya so. Ero wa xa kporin pen komo n̂iir̂akn̂e Kporin komo okre, tîtkexe yîwya so. Kar̂pe ro mak cehtopo n̂enpekn̂e yîwya so. Cirihnî rma n̂iir̂akn̂e, tîtkexe yîwya so.

5 Xako yepamtho komo panatanmetopo n̂entamexpekn̂e Kporin komo Moises ya. Ixaw Yana komo yîtwermacho mîn n̂entamexpekn̂e yîwya. On men ekatîmcoko amn̂e amxîkrî komo ya, kekn̂e tî Kporin komo kporin pen komo ya.

6 Ero wa ekatîmcoko yîwya so entachome tak awepamthîrî komo ya. Ewrura ka naxe anarî komo. N̂examro ya meero ekatîmcoko amn̂e ewruche so tîmxîkrî komo ya mahrimachome so xa hara, kekn̂e tî.

7 Ero wa awexitaw so Kaan pona enîn̂e me naxe n̂examro hara. Kar̂pe Kaan yesenpotoponho yîhcamnopîra tak naxe. Yîwya tpanatanmetopo komo yewetîn̂e me roro marha naxe.

8 Ero wa ekatîmcoko amxîkrî komo ya tporin pen komo warahra tak ehtome so. Cetanwesom me ro mak xatken̂e n̂examro porin pen komo. Oyanme ro mak wehsî, kan̂e me mak xatken̂e kica. Kaan yewetîn̂e me oyexi xe ro mak wasî, kan̂e pîn me xatken̂e. Kaan ponaro exihra xatken̂e okwe. N̂examro warahra tak ehtome so epamthîrî komo amn̂e kar̂pe Kaan yesenpotoponho ekatîmcoko yîwya so, kekn̂e tî. Ero wa tî kekn̂e Kporin komo kporin pen komo ya.

9 On wara tî xatken̂e Eprain yepamtho komo, Amohcoko amn̂e etar̂maxi, ketken̂e yîwya so antoman̂e komo. Tukuknomaxi tî xakn̂e kaamo, etar̂matopo kom ha. Tukurui rma tî re xatken̂e krapa ke, waiwî ke marha. Porohyatken̂e tko tî okwe anarî komo cetaw.

10 Kaanî mtapotarî yewetîra tî xatken̂e okwe, Kwakrexe so oyewehcataw awya so, kachonho. Tpanatanmetopo komo tî nanwekyatken̂e kica.

11 Kar̂pe Kaan yesenpotoponho ponarora ro makî tî xatken̂e kica. Cirihnî komo rma tî re n̂iir̂akn̂e n̂examro wero ro, ero yipu ponarora ro makî tî xatken̂e okwe.

12 N̂examro porin pen komo wero ro marha cma tî re cirihnî n̂iir̂akn̂e. Exitu po exitaw so ero wa n̂iir̂akn̂e, Soan woskaran po ha.

13 Tuuna imo tî nîraconkekn̂e Kporin komo. Ero yotari tî aano n̂iir̂akn̂e. Tuuna tî nanîmexpekn̂e îîpî wara ro mak okyo.

14 Kaweresî ke tî aano n̂iir̂akn̂e katpanaw. Kosope takî tî wehto ke weipono n̂iir̂akn̂e hara cenmakaxi ro.

15 Toopu tî nîmtakekn̂e axawa imo pono. Ero yai tî tuuna mokyakn̂e n̂examro wokru. Mer̂pono pîn ke tî wokpekn̂e tuuna weyun wicakno ke.

16 Toopu yatumnawnonho rma tî tuuna n̂ekpekn̂e mer̂pono pîn, tuuna yepu wicakî.

17 Kicicme rma tko tî n̂ehtîketken̂e Kaan poko okwe. Kyopono ro tî nanwekyatken̂e axawa imo po cexitaw so.

18 Kaan yukukmacho tî nîhtînoyatken̂e kica. Twakon xe xa nas amna okre, ketken̂e tî kica. Ero wa tî Kaan nukukmetken̂e kica.

19 Kaan yanwekn̂e me tî nîmtapowatken̂e kica. On wara tî ketken̂e, Knahrî komo ma re n̂etake Kaan tan axawa imo po ha?

20 Toopu yetapetaw tuuna rma re mokyakn̂e toh yai. Mer̂pono pînî ro mak mokyakn̂e eepu wara ro mak. Knahrî komo tko na tîmîhra nai. Tîyanan komo ma re notme awya so? ketken̂e rma tî kica.

21 Yîmtapotarî komo yentache nîrwonakn̂e xa takî tî Kporin komo. Noro yanme wehto takî tî n̂etahsîyakn̂e Xako yepamtho komo poko oco. Ixaw Yana komo poko tî nîrwonakn̂e.

22 Kaanî mtapotarî ponarora tî xatken̂e kica. Noro pona tî enîhra xatken̂e, takronoman̂e me so en̂ihra.

23 On wara tko xakn̂e Kporin komo, kaapu smun tî nantomekn̂e erewusmarî komo poko. Kaapu metatan komo marha tî nahrunkekn̂e okre.

24 Maana takî tî n̂ekpekn̂e tuuna mokyasî ero wara. Kah yaino ke rma tî iyurmano n̂iir̂akn̂e.

25 Ancu yuru rma tî nokyatken̂e n̂examro rma. Ero yipu ke tî iyurmano n̂iir̂akn̂e Kaan cerepotaxi ro so.

26 Ocowo takî tî n̂ekmexpekn̂e hara resce n̂ixa. Suu n̂ixa marha tî n̂ekmexpekn̂e kar̂pe xa cexirî ke.

27 Ero yipu ke tî wooto n̂ekpekn̂e. Roowo pupuntho wara ro makî tî n̂ekmexpekn̂e. Tarin̂em komo tî mîk n̂ekmexpekn̂e mer̂pono pînî ro mak, axawa yakenon wicakî ro mak, tuuna imo yecihtawno wicak ha.

28 Tarin̂em mokuche Ixaw Yana komo yetarî yaka rma tî nar̂mapekn̂e. Yîmîn komo mîtkoso rma tî nar̂mapekn̂e.

29 Ero ke tarin̂em pun tî non̂etken̂e tmaxmitaxi ro so. Yiixe xa ehtopo komo tî nîmyakn̂e Kaan yîwya so.

30-31 Cerepore exihra rma tko tî xatken̂e. Ero ke yîmtaw so rma exitaw iyotî komo, Kaan nîrwonakn̂e poko so. Ero ke waihkano Kaan n̂iir̂akn̂e. Karitî komo xa tî waihkekn̂e okwe. Kar̂pamxan komo rma tî waihkekn̂e Ixaw Yana pen kom okwe.

32 Wara rma kicicme rma tî xatken̂e okwe. Cirihnî ciitopo rma tî re n̂een̂atken̂e, Kaan n̂iritho. Noro pona rma tko tî enîhra xatken̂e okwe.

33 Ero ke ahce na poko cehn̂axmu me takî tî n̂examro pen n̂iir̂akn̂e Kaan, waihtopo komo pona roro okwe. Cerahsom me marha tî n̂examro n̂iir̂akn̂e waihtopo komo pona roro.

34 Tpoyino pen komo waihkache tko Kaan ya ero yimaw makî tî Noro ponaro xa hara xatken̂e. Cerewre takî tî nîmtapowatken̂e xa hara Noro yakro takronomacho komo poko.

35 On wara takî tî ketken̂e, Kaanî rma nai toopu wara iipo kececetotopo wara okre. Kown̂e xa Mîk ham Kaan, Kyopono ro ha, ketken̂e tî.

36 Wara rma tî, Kir̂wan̂he xa mai ham okre Apa, ketken̂e Kaan ya tohnaw ro mak kica. Cemaronwatken̂e ro kyam mak tî kica.

37 Etowîn me ro makî tî exihra xatken̂e okwe. Yîmtapotachonhîrî ewetîra xatken̂e, Kwakrexe so oyewehcataw awya so, kachonho ha.

38 Yîpînîn yaw so rma tko tî xakn̂e Kaan. Kicicme ehtoponhîrî komo tî nîhcamnoyakn̂e mak. Waihkatîkano cirihra rma tî xakn̂e. Emapona roro tî n̂etîrwoxinkekn̂e poko so. Emapona roro marha tî yîrwonîmtîkara xakn̂e.

39 Yîpînîn yaw so cexirî ke on wara tî kekn̂e poko so, Yupun me cehsom thakwa mak mîkyam okwe. Ocowo warai kyam mak mîkyam. Miya tîtosom mîn ocowo, yaw xa marha mokuhnî me ro mak. Ero warai mak mîkyam okwe, kekn̂e tî poko so.

40 Emapona roro tko tî Kaan nanwekyatken̂e kica pohnîntaw cexitaw so axawa imo po. Noro tî nahwokamexpetken̂e roro kica iito.

41 Emapona roro tî nîrwonmekyatken̂e, Kir̂wan̂he kiin̂e ma re Mîkî Kaan? karî ke kica. Kir̂wanî ro Mîkî Kaan. Noro yipu rma tî nîrwonmekyatken̂e, ponaro Ixaw Yana komo yehtopo ha.

42 Kar̂pe Kaan yehtopo ponarora ti xatken̂e. Tîîxatî pîn komo yai taatoponhîrî komo ponarora ro makî tî xatken̂e okwe.

43 Cirihnî tî n̂iir̂akn̂e Noro yaake ro Exitu po exitaw so. Soan woskaran po tî erepokano n̂iir̂akn̂e. Ero yipu tî n̂iir̂akn̂e kyopono ro me xa cesenpotome yîwya so.

44 Tuuna yepu komo tî n̂iir̂akn̂e kamxuku me, Exipsiu komo nakwarî. Erîhnî me ro mak tak tî xakn̂e aporî komo.

45 Werewere pen tî n̂ekmexpekn̂e Kaan Exitu pono komo yemetanmecho okwe. Pororî warai marha tî n̂ekmexpekn̂e yîwîrîman̂e kom hara okwe.

46 Yînatîthîrî komo tî nîmyakn̂e orko ya ahtome kr̂a. Poko etapickachonhîrî komo yahn̂e me tî n̂iir̂akn̂e makaka warai.

47 Saraipa marha tî n̂ekmexpekn̂e yînatîthîrî komo yakuhr̂apon̂e, uupa yatî pen. Sikamoro yepu pen marha tî naxikwekn̂e ero ke rma okwe.

48 Iyokuthîrî pen komo marha tî waihkekn̂e saraipa ke, paaka pen komo okwe. Oper̂a pen komo marha tî waihkekn̂e pepe kacho ke oco.

49 Tîrwonî tî nar̂mekn̂e Exitu pono komo po cerewrem xa oko. Nîrwonakn̂e ro makî tî poko so. N̂examro pen tî n̂emetanmekyakn̂e ro mak. Ancu komo marha tî nantomekn̂e waihkacho komo poko.

50 Tîrwon yesamarî yaiwan̂e wara tî xakn̂e Kaan. N̂examro tî yîmtora xakn̂e waipîra ehtome so. Eper̂a nahsîrî me tî ciino n̂iir̂akn̂e.

51 Exitu pono mumuru komo tî waihkekn̂e poturme ewruxapunhîrî pen komo. Kao pen yepamtho komo mîkyam waihkekn̂e. Yihcirî me kar̂pe ehtoponhîrî raconho mîkyam waihkekn̂e okwe. Ero wa tî Exitu pono pen komo n̂emetanmekyakn̂e Kaan.

52 Tîyanan komo reha tî naar̂akn̂e Exitu poi. Tooku wara rma tî aano n̂iir̂akn̂e oper̂a wara. Axawa imo pore tî aano n̂iir̂akn̂e.

53 Waapa komo yai ro makî tî n̂examro naar̂akn̂e erasîn me. Yîîxatî pînînhîrî pen komo reha tî n̂enor̂atken̂e tuuna imo kwaka.

54 Ero yinhîrî tîrowonî ro yemyatkoso takî tî n̂ekyakn̂e. Îîpî pona roro tî n̂ekyakn̂e, tamorî ke nahsîyakn̂e kaari ke, ero pona roro n̂ekyakn̂e ha.

55 Mîk hak rowon pono komo takî tî nar̂mapekn̂e Ixaw Yana komo ya. Ekenhîrî komo tî n̂ekamyakn̂e tîyanan komo yeken me tak. Yukuknomache tî n̂ekamyakn̂e yîwya so. Ero wa tî Ixaw Yana komo n̂ekenmekn̂e iitononhîrî komo mîntho yaka so. Cewtoworo so tî n̂iir̂akn̂e tribu komo. Ero wa tî Ixaw Yana pen komo nakronomekn̂e okre.

56 Wara rma tî Kaan nukukmetken̂e xa hara Ixaw Yana komo kica. Kyopono ro tî nîrwonmekyatken̂e kica. Yîmtapotacho tî ewetîra xatken̂e.

57 Porohyatken̂e tporin pen komo wara rma. Cesemîknosom me makî tî xatken̂e kica. Krapa wara tî xatken̂e pataw ar̂man̂e pîntho wara kica.

58 Kaan tî nîrwonmekyatken̂e kicicme cexirî ke so îh po so. Iito so mîk hak warai me enporixaputho poko xatken̂e kica. Ero poko exiri ke so nîrwonakn̂e xa Kaan n̂examro yewyomacho ke.

59 Nîrwonakn̂e ro makî tî poko so ero yipu poko ehtopo komo yentarî ke. Ixaw Yana komo xera ro mak takî tî xakn̂e okwe.

60 Tîmînthîrî marha tî nahsîpînkekn̂e Siro pononho. Iito tî ka xakn̂e Kaan mîn tooto cheka ciixapu. Eronhîrî tko tî nahsîpînkekn̂e.

61 Tîyamatan tî narpekn̂e waapa komo ya, kar̂pe cehtopo yenpotopo. Kir̂wanî ro me cehtopo yenpotopo tî mîn nîmyakn̂e tîîxatî pîn komo ya.

62 Tîyanan komo tî nîmyakn̂e waapa komo ya kacipara imo ke waihkachome so okwe. Tînahsîthîrî komo poko tî nîrwonakn̂e xa.

63 Wehto tî xakn̂e kar̂pamxan pen komo yakn̂itopo oco. Iin̂ontan me marha tî xatken̂e emasî kom hara.

64 Tîmsom pokono pen komo tî waihketken̂e waapa komo kacipara imo ke oko. Yihcinhîrî komo tî yîwratara ro mak xatken̂e yîpînîn yaw so. Ero wa tî xatken̂e okwe.

65 Ero yinhîrî takî tî pakekn̂e Kporin komo yîwînxapunhîrî wara. Wok yeen̂enho n̂emtarakesî ero wa tî n̂emtarakekn̂e Noro.

66 Tîîxatî pîn komo tî n̂en̂epekn̂e hara. N̂examro tî n̂iir̂akn̂e tîwîrîyakaxmu me eroromero.

67 Ero yimaw takî tî Xose yepamtho komo rowon men̂ekara xakn̂e ceken me. Eprain yepamtho komo rowonî rma mîn ero tî men̂ekara xakn̂e cewton me.

68 Xuta yepamtho komo xa matko tî men̂ekekn̂e. Siaw Yîpîn marha tî men̂ekekn̂e. Ceken mexe tî n̂een̂akn̂e ero reha.

69 Iina takî tî tîmîn n̂iir̂akn̂e kawno pona. Roowo nakîhcekn̂e eroromerono me ero warai me xa marha tî tîmîn n̂iir̂akn̂e hara, eroromerono me xa marha.

70 Tapi marha tî men̂ekekn̂e tantonî ro me. Noro takî tî nahsîyakn̂e oper̂a wacan yawnonho.

71 Oper̂a yenîn̂enho tî Noro nahsîyakn̂e tîyanan komo yenîn̂e me, Xako yepamtho komo yenîn̂e me ha. Yînahsîthîrî komo mîkyam xatken̂e Ixaw Yana komo, n̂examro yenîn̂e me noro yipu n̂iir̂akn̂e.

72 Ero ke n̂examro yenîn̂e me takî tî xakn̂e Tapi. Kaan ponaro makî tî xakn̂e ahce wa na n̂examro ciitome. Takîhso marha tî xakn̂e tamorî ke ciisom poko. Ero wara takî tî xakn̂e Tapi Ixaw Yana komo yenîrî poko. Ero wa tî xakn̂e.