Waano Yaan̂e N̂enîrî On Xetutun N̂enîrî. Asape Wanorî On

1 On wara wîxakn̂e, Kaan yakro kîmtapowakn̂e. Omtapotarî cma re mences Apa, wîîkekn̂e yîwya cerewre ro mak.

2 Oyesemetanmekyataw Kporin komo yenî xe ro mak wîxakn̂e. Kosope kapockanwakn̂e Noro wece. Pahkî ro mak kapockanwakn̂e. Etahworepora ro mak wîxakn̂e.

3 Apoko kesehtînoyakn̂e Apa. Ero wara oyexitaw tak keserepokekn̂e. Ahce kacho on wara ow miir̂a Apa? wîîkekn̂e. Kahwokekn̂e ro mak okwe.

4 Oyewru marha mecehcekn̂e yîwînkîra oyehtome. Keserepokekn̂e ro mak omtapotarî yarohra okwe.

5 Pahxan pen komo yehtoponho poko tak kesehtînoyakn̂e amna porin pen komo yehtoponho poko. Mer̂pora tak n̂icimn̂ipunwakn̂e n̂examro pen waihtoponho.

6 Kosope owanorî ponaro wîxakn̂e. Kaan yehtopo poko kesehtînoyakn̂e. Ahce wa xa wa nai Kaan? wîîkekn̂e.

7 On wara marha wîîkekn̂e, Eroromero ma kahsîpînke Kporin komo? Kwakrera ro mak tak nai ha ma?

8 Kîpînîn yawno me exihra ro mak ma nai okwe? Tîmtapotachonhîrî poko ma n̂ehn̂e eroromerono me okwe?

9 Kwakren̂e me cehtopo ponarora ma nai okwe? Kîpînîn yaw exihra ma nai tîrwonataw? wîîkekn̂e. Ero wara ka wîîkekn̂e okwe oropotaw.

10 Ero yinhîrî on wara wîîkekn̂e hara, Apehceme tahwokaxmutho ro mak ow ham kica. Yaake cimn̂ipu ka kar̂pe cehtopo n̂enpekn̂e Kaan, Kyopono ro ha. Tamorî ke cehtopo n̂enpekn̂e kaari ke, wîîkekn̂e.

11 Ero wa awehtoponhîrî ponaro rma wasî Apa yîtwen̂ekarîntara. Cirihnî miir̂akn̂e emapona pahxan pen komo wero ro. Ero wa awya ciino ritoponho ponaro rma wasî.

12 Miyan komo rma ween̂as Apa an̂irithîrî. Ero ke keserepokesî ero poko. Kar̂pe xa awehtopo poko kîmtapowasî.

13 Kicicitho ken̂ehra ro mak nas awehtopo Apa. Kaan xa Amoro, ponaro amna yehtopo, Amoro mak ha. Kyopono xa Amoro Apa. On wara wîîkes apoko, Anarî katî nai ponaro amna yehtopo awarai? Pîra, exihra ro mak nasî.

14 Amoro xa cirihnî ciin̂e Apa. Anarî yana komo wero ro kar̂pe awehtopo menpekn̂e.

15 Awaporî ke rma ayanan komo miir̂akn̂e Exitu pono komo yanton mera. Ero wa Xako yepamtho komo miir̂akn̂e, Xose yepamtho komo ha.

16 Taa, on wara xakn̂e tuuna ero yimaw Apa, n̂examro yaar̂ataw awya, awen̂akn̂e tuuna. Apona n̂eraswakn̂e. Tatanakn̂e ro mak weyunu rma kopi.

17 Tuuna marha tî mokyakn̂e, tuuna yewru ken̂e tî xakn̂e, xii kekn̂e ro mak. Knerere knerere kekn̂e marha tarai. Awuhre tî cekn̂e kar̂pe yarpa so.

18 Tarai tî n̂esencekn̂e an̂irithîrî. Ocowo marha tî xakn̂e, kar̂pe cetapomrisom. Ero chewno me mîmtapowakn̂e. Roowo tî katparekn̂e pepe kan̂e, an̂irithîrî marha. Nîrîrînakn̂e marha tî roowo, n̂esewsîyakn̂e xa tak.

19 Tuuna imo ratari rma xakn̂e awesamarî. Karitî mîn tuuna imo. Ero ratari rma mîîcekn̂e. Awenathîrî tko tî esenpora xakn̂e.

20 Ayanan komo maar̂akn̂e tooku naar̂asî oper̂a yosom ero wara. Moises ke rma maar̂akn̂e, Araw komo ke. Ero wa ayanan komo maar̂akn̂e.