Waano Yaan̂e N̂enîrî On, Aasape Wanorî Raatî Yakro Taasom On, Tîyorkaxmu Yakro

1 On wara naxe Xuta yepamtho komo, Kaan yehtopo yentan̂e me naxe. Karitî xa Mîk Kaan ha, kan̂e me naxe Ixaw Yana komo.

2 Yîmîn nasî Saren po. Siaw xa nasî ekenî ro me xa.

3 Iito tak waapa yuhretho naxikwekn̂e waiwîtho. Waapa yecen̂antho komo nakuhr̂apekn̂e, kaciparanthîrî komo meero nîhkocekn̂e. Ero wa waapa me mohxapu komo kuruntho n̂iir̂akn̂e Kporin komo iito Siaw po.

4 On warai Amoro Apa, kir̂wan xa Amoro, kir̂wan̂he cesenposom xa Amoro okre. Amna n̂eserepokesî rma re îîpî poko wooto yapon poko. Apoko xa tko amna n̂eserepokesî.

5 Pukno wa mak tak naxe erasînînhîrî pen komo. Taaso thakwa tak nas emyawnonhîrî komo. Nîwînîkyaxe eromanhîrî me. Amohnîtho wara ro mak naxe waapa me mohxapu pen komo apockantan me ro mak.

6 Ponaro Xako yehtopo Amoro. Amtapotarî ke rma yîwînxapu wara tak miir̂akn̂e iyokuthîrî komo, kawaru pen, tarara pen komo yakro rma.

7 Twerî xa amna yehtopo Amoro. Onok ma re n̂ececece awepatai arwonataw?

8 Kah yawno Amoro. En̂exa rma en̂ekano miir̂akn̂e. Amtapotarî tak n̂encetken̂e roowo pono komo. Ero ke n̂eraswatken̂e, tîtken̂e mak tak xatken̂e.

9 Piiri nawomye Kaan en̂ekano ritohme. Emetanmexapu komo yakronomachome nawomyakn̂e, roowo poko hakno komo yakronomachome.

10 Kir̂wan̂he awehtopo yenpon̂e me rma naxe tooto komo yîrwonataw so rma. Miya xe xa tîrwonîmtîka xe cexitaw so tak mîtîtmamnoyasî.

11 Ero ke on wara wîîkesî, on wara kacoko Kporin komo ya, Ero wa men was amn̂e, kacoko yîwya, ponaro awehtopo komo ya. Ero wa kache amtapotachonhîrî komo yaw roro rma tak men ehcoko hara. Kaan ya tîmsom n̂ehcowpe Noro mamhokono komo, twerî kehtopo komo ya ha.

12 Kayaritomo komo yahwokamexpon̂e Mîk Kaan. Noro pona n̂eraswaxe kayaritomo komo, roowo pono kom ha.