Waano Yaan̂e N̂enîrî On. Waihkano Cirihra Esko Okwe, Kacho Me Taasom On, Asape Wanorî.

1 On wara kes amna Apa awya, Kir̂wan̂he xa mai ham okre, kes amna awya. Meyehra nasî awosotî. Ero ke kir̂wan̂he awehtopo poko amna nîmtapowasî. Amna nîmtapowasî an̂irithîrî poko, amna n̂eserepokesî ro mak ero poko.

2 On wara mîîkes Apa amna ya, En̂ekano ritopo yukuknoman̂e Ow. Ero yimaw xa en̂ekano wiir̂asî. Takîhso mak en̂ekano wîîr̂asî.

3 Anarimaw roowo n̂esewsîyasî, iipono komo marha n̂esewsîyaxe. Ero yimaw roowo yaporwan wecehces Ow, mîîkesî. Ero wa mîîkes Apa.

4 On wara wîîkes Ow cehcoyoponkaxmu komo ya, Ehcoyoponkara ro mak tak ehcoko, wîîkesî. Kicicme cehsom komo ya wîîkes on wara hara, Tmeretkem warai amyamro. Ameretîrî komo anmîra ehcoko.

5 Kahsî ameretîrî komo yanîmn̂e warahra ehcoko, kanwekn̂e me yîmtapotara ro mak ehcoko, wîîkesî kicicme cehsom komo ya. Ero wa wîîkes Apa.

6 Anarî komo yopono me kiin̂e pîn mîkyam, tooto komo kyam mak mîkyam. Resce n̂ixan komo ero wa kirihra naxe, oesce n̂ixan komo pîra marha, suu n̂ixan komo pîra marha.

7 Kaan mak nasî kehtopo komo yenîn̂e ro me. Anarî komo xawyakan me n̂iir̂as anarî. Anarî komo yopono me n̂iir̂asî anarî hara.

8 Kporin komo yemyaw nasî parakweci kawaxiyem ke copoyem. Esmatîkaxapu mîn wooku cucurem. Ero tak narkesî kicicme cehsom komo wokru me. Roowo pono komo wokru me narkesî. Eetîkacoko men makumuru meero, kesî tak yîwya so.

9 Owî reha Kaan yehtopo wekatîmyasî miya roro yîtîhkan me ro mak. Kir̂wan̂he Kaan yehtopo poko kewanomesî, ponaro Xako yehtopo poko ha.

10 Kar̂pentho me ro mak wîir̂asî kicicme cehsom komo reha. Kir̂wan komo reha wiir̂asî anarî komo yopono me.